FIIYO 3
3
Ngapo, Ikurya na Ivika Nsia
1Yeny mmbwe shiishi kimaruma nkyikyi elyi shikeewonisa ngapo yeti tuuka kwa Iruva;
2Kashoolota si,
si nnu deny shooloka ireeminy yuu
3Kashikapa keengyi na keengyi kuleefo isarya.
4Mmbo aleshishisha kashira-u
indo na mafua akwa kafisha-fisha
5Kashivika kifingyony kya ukiva na mavina.
6Kashivika ireeminy lya ufu lyilasembeyaa nta.
7Kashifinga na mise ya minya shava mfungwa
nalavikye nsia wa yaawuka.
8Shaffwa na unyanga waasha,
lyo Iruva kalema fushu yaaranya.
9Kashinga shia yakwa na mawe,
kashivikyaa isimamba taari toose shilaire.
10Kashivereya sha ngare,
kashifisha-fisha sha miiso,
11Kashirishia efo shia,
kashirandwa-randwa, kashira-u.
12Keepoo ura lwakwe kashaasa na mife yakwe.
13Mife yakwe ikaanga deny mwiiliny wakwa.
14Vandu vakashiseka nkonu piti,
kwawo shava kindo kyeeseta.
15Ngatara shiroo tikava nnyo shoonga na kyeena ashiniinga.
16Kisangu kyakwa kasinga nakyo efo si na mayoo akwa kafisha-fisha
17Mmbo shilenrekyo ifura na ufoo nkyokyi,
na finya ya mwiili.
18Nta nshikiiyo kavii-fo, nshikivikye Nndumi Iruva nsia-fo.
19Mavavyo akwa, itura kirembo,
efi ni nri uvavaa, uwaa.
20Mmbo nkeekusara nnu deny na nrima wakwa ukafwa
21Lyo ivika nsia lyakwa lyikawuya kyeeri shakumbwa ekyi:
22Ikunda lya Nndumi Iruva lyilasiaa
na ilyillya lyakwe lyiifo-da.
23Mmbo lyikee yiiya sha ngama,
lyikavaka nkyeere lyilakyeywaa nta.
24Nndumi Iruva wakwa mmbwe fyoose shitiri,
nkyo mmbo shinkusirye we.
25Nndumi Iruva mmbo akee nsaari kwa woose vankusirye.
26Kisha mmwasi kweru ni immbera na usisiryo naambo nalukire.
27Lukuloshe usisiryo elyi lukee vakoo.
28Lwiivavyoo lumalallye sau lwimberaa.
29Lukunyiise neevika nsia,
mashika mwaanya wekia wiifo.
30Na kyikava lulekapwa lukavira,
nkuti luwarye fyoose indo
31Nndumi Iruva mmwiilyillya,
nnyashelulemaa llung'anu-fo.
32Ashidimaa ilweengye makiva,
lyo ukundi lwakwe llwa dede luvangye deny.
33Nta nyafuraa neelyi lwawona ngatara na mavavyo-fo.
34Nndumi Iruva eeshi shaasa lwafwa nrima meendi lukee kifingyony.
35Kavemanya na kyeeri lwasokwa usumanu llwa aleluniinga
36Kyeeri usumanu lwarevetwa efo makwaanuny, eeshi-da.
37Kilya Nndumi Iruva akundye nkyo kitanyikaa.
38Fisha na fikasha mmbwe afiniinga mumu.
39A niindaany lukunung'unaa kyeeri lwakapwa kya ulyamari lweru?
40Lusununnde meengye yeeru lwalashike luwuiye Nndumi Iruva.
41Luruye mirima yeeru Iruva lutereve indi.
42Mmbo lulekura lukakulyamarya,
neewe Nndumi Iruva kulelusarya-fo.
43Kwalusya kwalumamita,
ilyillya lyafo lyikasikyo ni unyafi lwafo.
44Fiterewo fyeru mfileidima iira unyaasi lwafo-fo mbee.
45Mmbo kulelwaallwa lukava sha kirashi yaa ulaniny.
46Vakiduva veru vakaluseka neelumina.
47Lukeewa urumatony na rengeny,
lukakaa usauny na weereyiny.
48Miso akwa akapusuka mira ya misoru,
elyi vandu wakwa vakeemamika
49“Misoru yakwa mmbo isheeka usoka lulamandaa
50Kutani elyo Nndumi Iruva ashelwaamaiyaa ooka iruveeu nalulole.
51Ngoo yakwa yarovyo nnu kyeeri shalola filya filekooya vaka va muri weru.
52Mmbo shiletirwa ni nsoori wa vakiduva,
valatiri kimaruma kyeelusua
53Mmbo valesheerya irininy vakashilyikya-fo veevikaa iwe yoo uwe.
54Mura ukashiraya-fo, shalollya dede ufu lukee neeny.
55“Shikee kulya irininy si,
woi Nndumi Iruva shilekufuuya,
56Na llya shilekutereva kushaaranyi, kweeta,
57Kwashirouwa kwashivia shilairyae-fo
58Kwashisheya Nndumi Iruva kwashikira.
59Shyaanduya kya ishilyillya,
elyi kwiishi uravi elo shiletanywa.
60Kwiishi shaasa vakiduva vakwa vashisuuye,
na shaasa valeshiringitya.
61“Kuleeta shaasa valeshaarara,
woi Nndumi Iruva kwamanya na mitambo yaawo.
62Wo nkonu mmbo vashisenda veesongosya misoori yaawo.
63Pookya ngama fika nkwaany mmbo vashiteenda.
64Woi Nndumi Iruva vakapeeny dwa kimaruma kya efyo valetana.
65Vadenge Nndumi Iruva naambo vafwe nrima deny.
66Valeveye kuvamaa vauke yaa ulaniny deny!”
Currently Selected:
FIIYO 3: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
