YOSUA 18

Kyenga kya Uruka Kilesaa Kyaawo

1Naasa llyo vana woose va Israeli valekwaananya shilo, vakavikau yeema lyeekwaananya. 2Nalyo kukaafo ngyufyari mfungare ta vana va Israeli vakandeonisa waavi lwawo lwa uruka. 3Naasa Yosua kavia vana va Israeli, “A mmbo muvaa vapeere indi fika indii mulakundye ikutakura itira uruka elu Nndumi Iruva wa vandeye vany alemuniinga?” 4Kyasia ulaalu sauweny vandu vararu wo ufyari, neeny shivarume veende, vandesauwa neetira waavi lwawo, vasheshivia. 5Vandu yewo vaave uruka yelu fyenga mfungare, ufyari lwa Yuda lukae taari ya sinde, na vana va Yosefu taari ya ndoo. 6Mmbo mureiyaa shaasa mwaava fyenga efyo mfungare musheengye ekyo mwareiya nshemukabya kura mbee ya Nndumi Iruva waany. 7Wo Valevi mbatiri ding'u efo kwany-fo Mashika urundi elo lwa ukohani nnyo ding'u yaawo. Na ufyari lwa Gadi na Ruben na kyenga kya ufyari lwa Manase wo valemmaa iwona waavi lwawo kulya kwakulya ya Yordan taari ya ngama, llya valeniingwa ni nsero ulya wa Nndumi Iruva Mose. 8Naasa Yosua kavia valya valeenda ireiya uruka, Endeny mukandeera efo urukeny, mureiye mbony ta vayo shoose, musheny yaa, neeny nshemurambikya mbee ya Nndumi Iruva kulya Shilo, 9Llyo vandu yewo valeenda vakandereiya uruka vakaava na miri ya vayo vakaava fyenga mfungare, vakasheya Yosua kulya Shilo. 10Naasa Yosua kavakabya kura mbee ya Nndumi Iruva kulya Shilo, Yosua kaavya Israeli shaasa kisumani nawo.

Minyanu ya Benyaminy

11Naasa kikafikya kura ya vana va Benyaminy, kura yaawo ikava nnyanu na yeyo ya vana va Yuda na va Yosefu. 12Nnyanu wawo wa taari ya nndoo ukava mura wa Yordan, ukeenda fika yoo mbai ya muri wa Yeriko taari ya ndoo, ukanderwa na mafumbuu taari ya nkwaany fika kasa ka Betaveni. 13Nnyanu wawo ukeenda indo ukandekooya miri ya Lusu nto Beteli, taari ya sinde, fika Ataroti-adari kufii na ifumbu lya taari ya sinde ya Bethoron. 14Naasa nnyanu ukaenda indo taari ya nkwaany na ya sinde, na uka yoo ifumbuny lya Bethoron ukandekooya kiriat-baali nto Kiriat-yearimu, nato mmuri wa Yuda na nnyo taari ya nkwaany. 15Na nnyanu wa sinde mmbo wuukye yoo Kiriat-yearimu umandi, fika taari ya nkwaany, ukandekooya usoka lwa Nefloa yoo lurukaa nang'u. 16Naasa nnyanu ukasoka indo fika yoo ifumbu lyimandi na imungo lya Hinomu yoo kyaandaany kya Varefai taari ya ndoo, ukandefika yoo mbai ya muri wa Myebusi taari ya sinde fika Enrogeli. 17Naasa ukainduka, ukarwa fika Enshemeshi fika Geliloti underwa na Adumimu ukawuya isoka na alya iweny lya Bohani mwana wa Ruben, 18naasa ukasora Araba taari ya nndoo, ukasoka. 19Naasa nnyanu ukeenda fika Bet-hogla taari ya ndoo ukandekooya wombe lwa ndoo lwa Yeeve ya shumbi taari ya sinde yoo mura wa Yordan umandi, nto nnyanu wa taari ya sinde. 20Mura wa Yordan ukava nto nnyanu wa taari ya ngama kwa vana va Benyaminy. Yelo llo waavi lwa vana va Benyamen shaasa valeniingwa, iringitya koose.

21Miri ya vana va Benyaminy nnyo Yeriko na Bet-hogla na Emek-ko-sisi 22na Betiaraba, na Semaraimu na Betheli, 23na Avimu na Para na Ofra, 24na Kefar-amon, na Ofui na Geba. Myoose mmiri ikumi na ivii ando amwi na fyuungo fya vayo, 25na Gibeon na rama na Beeroti 26na Mispa na Kefiri na Mosa, 27na Rekemu na Irpeeli na Tarala 28na Sela na Elefu na Myebusi nto Yerusalemu, na Gibeati na Kiriat, nnyo miri ikumi na iina na fyuungo fya vayo. Yeyo nnyo ding'u ya vana va Benyamen shaasa valeniingwa.

Currently Selected:

YOSUA 18: MAS2

Highlight

Compare

Copy