YONA 2
2
Kiterevo kya Yona
1Yona ekee kulya ndeuny ya ikunga katereva Yaave Iruva wakwe,
2kaamba, Mmbo shilefuuya Yaave kyeeri shekee ngatareny,
Nawe kashiirikya.
Shikee si kwa vafu llyo shiletarwa, Neewe kweeta kyeerero
kyakwa.
3Mashika mmbo kuleshisivika efo si mureny.
Efo nnang'ani ya yeeve
Nkuka wa mura ukashiringitya taari toose
Matundulu na mura wafo moose ukashimira.
4Neeny llyo shileamba, Ulaalu shameenda kwaasha na Yewe
Llyo mmbo ushipoiyoo ando kwafo kweele miso akwa
5Mura mmbo uleshiringitya riti, koose ukashifumba,
Mamburu a yeveny akashe koososya nrweny
6Shasokya si deny efo uvasheny lwa mafumbu,
neefo si deny kulavaa yuuka-se
Kyeendi yewe Iruva yaave wakwa
kwawuya ishilukwa-fo shikee na muu
7Kyeeri shilelollya muu wakwa wammaya
Llyo woi Nndumi Iruva shilekufuuya
Neewe kweeta unyanga lwakwa efo mmba yafo,
8Valya vafiirya maruva a wongo ndi vakaeendya
Mmbo valakana na ikwiiryaa yewe
9Kyeendi yeny nshembaa kyekurumisha,
shikuutye firaso fyeekora na muro
shitani kilya shivikye kyaasa
Ukiro mmbo lwasha luuka kwa Nndumi Iruva!
10Naasa Yaave llyo alevavasya ikunga llya lyikanderaakya Yona alya mbai ya yeeve ilya.
Currently Selected:
YONA 2: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
