YOELI 3

Iruva Asheutyaa Masanga Uvingo

1Nndumi Iruva mmbo aamba, kyeeri ekyo nsheviyaa Yuda na Yerusalemu ngata ilya ya mbee, 2mmbo nshesanyiryaa vandu va masanga woose, vasheutyo uvingo kya efyo fyoose valetannya vandu vakwa, elyi valenyanyata vandu vakwa Israeli efo masangeny engyi. Vakaava na uruka lwawo, llo lwakwa. 3Vakavekapya vandu vakwa kura. Vakakumba vana va Kyuumi na va kyika vawoni wari. 4A yeni nkyoki-deny, yeni va Tiro na Sidon, na ngyuruka ta Vafilisti? A ndesa musheshitaa? Neeny mmbo nshemuviryaa! 5Mmbo mulekurika fesa takwa na saabu na masaa akwa mukavika efo mukeny tany teerasya. 6Na vana va Yuda na va Yerusalemu mukavambya Vagriki. 7Lyo ulaalu nshevaviraa vauke-fo. Efyo mulevatanya nshemutanya yeni indo. 8Vand vany va kyuumi na va kyika vashekumbywa Yuda, vashekumbywa Vaseba, kwaasha deny. Ni Nndumi Iruva aamba indo. 9Na eki vieny vandu va masanga woose.

Deesyeny vasero va fira vasalale itorito woose

10Alasheny makumbi any nave ngyusu.

Na makasi a matavi nave mafumu.

Na kava mfwafwa nkuti neende fireny.

11Sye kutakureny, yeni vandu va masanga woose, mukusanyirye. Woi Nndumi Iruva, ruma itorito vafo vashekapana. 12Vandu va masanga nkuti vakusanyirye uviny yoo imungony lya yaanduywa. Alya nng'u yeny Nndumi Iruva nsheutyaa vandu va masanga uvingo. 13Kimmba vakee varavi nnu, vashevewa sha nganu yoo mailullyony, Vavefotwa sha ndunda ta nsabibu tikamwaa tuutwa mfinyo. 14Mashika nkonu eto wa Nndumi Iruva, ukee kufii;

Yoo imungony elyo mmbo kushekumbya-u nsemu nniini deny wa vandu kwa yuutywa uvingo.

15Nkyeere na mwiiri fikoyaa fyanreta sa yavayo, na nyinyiri ntikivaa-fo. 16Nawe Nndumi Iruva mmbo asheitiwaa auka Sioni na Yerusalemu. Ngina na uruka fishereremaa. Lyo Nndumi Iruva ashevaa kirishyony kya vandu vakwe na kya vana va Israeli

Iruva Ashevikyaa Vandu Vakwe Mbora

17Llyo mushemanyaa, yeni Israeli, sheelyi yeny ni Nndumi Iruva, Iruva waany, shikee ifumbuny lyakwa yeele lya Sioni. Nato Yerusalemu mmuri mweele. Vandu va masanga mmbakaa vauvinge-se-fo. 18Kyeeri ekyo llyo mafumbu avayo ashesikyoo ni misabibu, na ng'umbe, na ngyusoka toose ta Yuda tisheishwaa mura. Na usoka lusheeka luuka efo mmba ya Nndumi Iruva lushenisa Imungo elyo Shitimu. 19Misri kushevaa nrapu, na Edomu kuve uruka umunu, kimaruma kya efyo valetannya vana va Yuda, vakapuswa samu ilatiri mbese urukeny lwawo. 20Lyo Yuda ashekaau llung'anu, na Yerusalemu nsalale marika na marika. 21Neeny, yeny Nndumi Iruva nshekaa uwe ya ifumbu lya Sioni.

Currently Selected:

YOELI 3: MAS2

Highlight

Compare

Copy