YOBU 22
22
Kirouwo Kya Kararu
(22:1–27:23)
Marero a Elifasi
1Llyo Elifasi Mtemi, karouwa Yobu:
2Ndesa nndu wa vandu avaa kyi kwa Iruva?
Kya dede nndu atiri urango usha mmbo akuviiya mbusha yakwe muni nsi.
3A mmbo kukusarye nkufurisaa Iruva kwa worotu lwafo?
Ao kuwonaa mbusha kyi kwa kooya kulatiri mbese?
4Mmbo kukusarye nyakee kusakira na ikuutya uvingo
kimaruma yewe kumwiindyaa
5Oode! Uravi lwafo ni uniini nnu!
Ukasha lwafo llutiri umando fo!
6Yewe nkulesoka mwana mau soori ya nreke;
kwaipoo soori yeyo imwi nsi eitiri.
7Kwa vaima mura valya vearaye;
kwa vaima kyeelya valya vetirwa nnshaa.
8Kwalekeya nndu atiri finya keepoo uteeri loose;
kwara yeto akekundywa akaa fo.
9Kwara vaka va ding'u vakweengye na maako aruu;
kwaima vana vangwera wiidimi lwawo.
10Kwa yekyo misoori mmbo ikurungukkye taari toose,
weresi lwa tiny lwankuwoya.
11Ireema lyankuwoya kulalollye kindo;
mura mwiingyi wankufindikira.
12Lwiishi Iruva akee efo uwe iruveeu,
lola nyinyiri ta uwe deny shaasa tikee kwaasha!
13Indi yewe mmbo kukeamba, “Iruva nkyi eeshi?
Ndesa ashiidimaa irorova mafishi autye uvingo?
14Mafishi maroo mmbo anrungukkye alakooye ilollya
we mmbo arwarwa uwe ya ngina ya ulana!”
15A-mmbo kukunde ilatya shia ta kasha
yeto vandu varavi veetilatya?
16Yewo mmbo veaiywa kulaore kyeeri kyawo kyansia,
uvasha lwawo lukafwallywa kwaasha ni mura.
17Yewo mmbo vevia Iruva, “Lakana neese!
Na Yewe Iruva muni finya nkyi kushiidima uwe yeeru?”
18Indi Iruva mmbwe aleishura mmba tawo ivesyo,
kya indivakammbika kwaasha na mialye yaawo.
19Woorotu mmbo valollyaa vakafura,
vandu valatiri mbese vakavaseka na ivaila,
20wakeamba yee dede vakiduva veeru vammamitwa,
na kilya valesarisau kyammamitwa m muro.
21Ulaalu Yobu irikkyana na Iruva kuwoni unapwe,
Llyo mesha akusheyaa.
22Warya ufundo luukkye kwakwe;
na kuvike marero akwe nriminy wafo.
23Kwa wuiya Iruva na ikunyiisa,
kwanta uravi lukee kwaasha neewe.
24Kwa erya masaa afo sakeny,
kwa era saabu ya Ofiri waambeny lwa mura.
25Iruva muni finya kava mmbwe saabu yafo,
na fesa yafo ya uuru;
26naasa llyo kushiidimaa ifurya Iruva muni finya
na illola na nsia;
27Nkunterevaa nawe akuarannyi,
neewe kushiinutyaa fyaasa fyafo.
28Yekyo kyoose kurummbwaa nkishiinukkyaa nisha,
na sa imikkyaa shia tafo.
29Kimmba Iruva atuula veekurosa,
indi kakira vekunyiisa.
30We mmbo akiraa nndu alatiri mbese;
yewe mmbo kukirwaa kwa mitannyi yafo misha.
Currently Selected:
YOBU 22: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
