YOBU 18
18
Nrerye wa Kavii wa Bildadi
1Naasa Bildadi Mshuhi karouwa:
2Mmbo kusyaa marero a irera kufike indii?
Kusununde nisha neese lurere.
3Nkyiki kukee kwaalwa sha ng'umbe?
Ni inda kukelwaalwa masembo?
4Yewe mmbo kwakuratwa-ratwa kumuni kwa unyafi lwafo.
Nkukusarye ulana llurewaa nrabu kimaruma kyafo
Ao mafumbu akasamiso nauke ando avayo?
5“Yee, sa ya nndu nravi irumyoo;
Muro wa vayo mmbumikaa-fo.
6Kyeny kwakwe sa ni ireema
Taa immikkyaa irumyoo.
7Irambu lyakwe lyaasha lyifiswaa;
Mialye yakwe intulaa si.
8Ngyayo takwe muni tinrwaa nreiyony;
Wo kyeeri nyasheendaa eekwaananyaa na nreiyo.
9Nreiyo umwaraa tutuny,
Nsoori unkamare tabu.
10Ansurumyo nsoori uteriny;
Ambikkyo nreiyo nshieny yakwe.
11Weerei uniini llumweresee wo taari,
Lunlatyaa wo ando ashendaa.
12Etiri finya indi ulaalu shaa yamusisya;
Ngatara tikee kufii tintuule.
13Ndwari sheesi ikaperesha shonyi yakwe,
Mavina a ufu akalya filungo fyakwe.
14Akekuruwa mmbeny evikye nsia,
Na irawa kwa mangyi ya weeresi.
15Mmba yakwe ya ruu vengyi vakaefo;
Mawe a kiberiti ammaalalwa ando akwe ekaa.
16We nnyakee sha nri wammuuma mirarii,
Maramba a vayo akanaa.
17Urukeny nkwiifo nndu ankummbwaa-fo;
Irina lyakwe llyikisendwaa lyingi shia-fo.
18Amwuutwa seny kaerwa ireeminy;
Kaumbutywa kwaasha kautwa ulaniny.
19Nnyatiri vana nta vashuku-fo;
Nkwiifo nta ngyeeri yakwe-fo.
20Vandu va taari ya nkwaany vanting'wa kya efyo filenkooya,
Weresi lukawoya vandu va taari ya ngama.
21Yefyo mfyo fikooyaa vandu valaindyaa Iruva;
Yoo mmbu ando a valaishi Iruva.”
Currently Selected:
YOBU 18: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
