YOBU 15
15
Kirouwo kya Kavii
(15:1–21:34)
Marero a Elifasi
1Naasa Elifasi Mtemani kaverouwa:
2A ndesa nndu wa urango usha mmbo arouwaa marero a urung'ani?
A, ndesa yeto mmbo eeshwe marero a ruu?
3A ndesa nndu wa urango usha mmbo akureekkyaa marero alavaa
ao kwa marero alatiri mbusha?
4Indi yewe mmbo kukeeila wereesi lwa Iruva;
na ilema iitumuso mbee ya Iruva.
5Uravi lwafo llo lukee losha kana kyafo,
neewe kwa sauwa irera sha nlembi.
6Mmarero afo kumuni akekuuttya uvingo n shi yeny fo;
mirerye yafo yakukureekkya kumuni.
7A ndesa nnyewe nndu wa kipooka iwonika?
Mmbo kuwonikkye kulaore mafumbu a mmbikwa?
8Kwammiita marero yoo a kirika auka kwa ruva?
Ao nnyewe kumuni kutiri urango usha?
9Nkyokyi kwiishi kulaore yese lwiishi?
Nkyokyi kwaidima imanya, yese lulamanyi?
10Nnang'ani yeeru mmbeefo vamiku vatiri urango usha,
vatiri myaaka miingyi ngota ndoo.
11A ndesa iviiryo muu ni Iruva n kindo kyaangu deny?
Ao ndesa irero lyakwe lya ufoo kwafo nshi kindo?
12Nyindo ngoo ikekukuna iroywa nngoo
na ing'atwa miso a unyafi?
13Kutani kwa rengya Iruva
na irera marero maravi indo?
14Nndu nkyokyi kutani aidima iva nsaari?
Ao yeto akeemwiire ni nndu nka kutani aidima iva nsaari?
15Kwa kooya Iruva nalairikye nta veele vakwe,
nta ngina ntikee shaa mbee yakwe-fo,
16nng'a nndu wa vandu akee kiraa na nreti
nndu atanaa uravi sha ina mura.
17Ulaalu shiarannya shikoore,
shikuvie filya shilenllolya,
18ufundo lwa vandu vatiri urango usha
mbony tilya vamiku vao kulaore vetisuruma,
19valya Iruva evaniinga uruka wo weni,
nta nkwiifo nndu eira nnang'ani yao fo.
20Nravi nnyalyaa ukiva lwa mavavio wo nkonu,
myaaka myoose vavikkyo variiti
21Ngyunyanga ta weeresi tikapaa kyorongye maarwiny awo,
kyeeri vakusarye ufoo vasoki mbavavoyaa.
22Nravi nnatiri nsia wa yuuka ireminy fo;
ufishyony lwakwe ni ifwa na upanga.
23Nnaraaraa eruyaa shoonga,
eambaa “Nkwi ikai?”
Eshi sheelyi nkonu wa ireema uke kufii.
24Ngatara na mavavio fikemwerese;
f1ikansheya sha kilung'ati kya mangyi ngapanuny.
25Kimaruma aleorwa woko lwakwe amini Iruva,
kakara imina Iruva muni finya;
26karisha kwa umbafu nakapani nawe,
kunu arie ngao itiri matibo ang'ani.
27Kisangu kyakwe kikapollya mafura,
na kisi kyakwe kiishwe mafura.
28Nnakaa urukeny lwa nrapu mmbeny tikee sama,
mmba tesenyi tive irina lya urumato.
29Nndu yeto nnavaa isimba ttwa fo;
nta umasi lwakwe llukaa urukeny fo,
30nnashiiyamaa ireema lya ufu-fo.
Vipala-pala fya muro fishumisaa maa takwe,
vivaro fya vayo fivivitwaa ni uraato,
31ngoma nndu nalavikaa nsia findo fya urung'ani na ikulemba,
mashika urung'ani llo luvaa utore lwakwe.
32Atawaa kya usumanu kulaore amfwa,
na ngyeeri yakwe nnyikaa urukeny-fo!
33Nnyavaa sha nsabibu ushaangarisaa ndunda mbisi,
sha nseituni ushaangarisaa fivaro fya vayo,
34woose valashiindyaa Iruva mbaonisa vana fo,
muro ushemamitaa matengo a veelya mbaria.
35Wekurika ulembi na iwona uravi,
mirima yawo ialyaa ulembi.
Currently Selected:
YOBU 15: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
