YOBU 14
14
1Nndu ni mwana mwiire ni nndu nka;
mmbo akaa na muu mikonu myaangu iishwe ngatara.
2Kavaa sha kivaro, numa kanaa.
Karisha swany sha kirishe kamaya.
3Woi Iruva, a nkyikyi kwasara kumande ilola
na ipooka ivakyana nawe?
4Mmbi ashiidimaa yuuta kindo kisha kyuuke kindony kitefusu?
Nkwiifo nndu ashiidimaa-fo.
5Mikonu ya nndu wa vandu ya ikaa na muu mmbo ikee sheese;
woi, Iruva nkuvikye yekyena na miiri yakwe;
Na shiidima ikillya nnyanu kummbikye-fo.
6Lolaany kwaasha nta kunre;
naidimi ifurya mikonu yakwe sha nndu wa weesi lwa nkonu.
7Mashika nri ukammanywa kwiifo nsia wa immya,
ushiidimaa ioria lyingyi.
8Naakwaa miraari ya vayo ikuuya uterinyiny,
na kisinde kya vayo ifiyaa sumbai,
9Indi kwa nsiny wa mura nsi ukaorya;
ukalambara maramba sha fyaana.
10Indi nndu mmbo afwa na elo nlo ufishyony lwakwe.
Kammaa ikumba muu nkyi asaa nakyo?
11Sheelyi mura uumya iruweny,
na mfongo ukamanda isoka,
12n nyindo nndu afwee nta nnakupoo lyingyi-fo;
nnakupoo lyingyi nta iokkya-fo,
kumande elyo ngyina isheukaau.
13Ngoma kweshisurumaa kwa vafu;
kushisurumi kumande nyashi yafo yafwaa;
na fyeeri efyo kushiesye fikansia kweshikummbwaa.
14A nndu kamfwa ashiidimaa iruka lyingyi?
Mikonu myoose ya mirundye yakwe mmbo shivereyaa kutani nkonu wakwa wafika.
15Llyo kweshivaangaa shikuirikye,
kyeeri kwekundaa ishillolya yeny kyuumbe kyafo.
16Llyo kweshiidimaa yekena myeengye yakwa,
nkweraa illa nnu ulyamari lwakwa.
17Marekwa akwa nnyafungywaa nkusheny,
neewe nkweshekkyaa uravi lwakwa.
18Indi fisheshaa fyeeri mafumbu avundukaa na
masimamba moomu nasamirwa ando a vayo.
19Mweeko wa mfongo mbukombaa myaamba ukatuula nguka.
Nyindo neewe kulyamaraa ivika nsia lya nndu wa vandu.
20Yewe mmbo kwatuula nndu, nawe kasarumya llung'anu,
kwaalasha kisangu kyakwe kwamweera kwaasha.
21Vana vakwa vakaindywa we nneeshi-fo.
Vakainyalwa we nnalolye ttwa fo.
22Nyeeta mavavio a nyama takwe nsi,
na ndiyyo wa mavavio a muu wakwe.
Currently Selected:
YOBU 14: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
