YEREMIA 51

Uvingo lwa mmwasi kya Babilony

1Arannya Nndumi Iruva mmbo aamba,

“Mmbo nshiipoo mumuyo wa uraato lutiri finya imamita Babilony,

na valya vakee Ukaldayo.

2Nsheruma-fo uraato lwa kivivita luuka taari toose,

elyi nkonu wa ngapo ufikaa,

lushemmbivita lushemaa-fo wo kindo kyiifo.

3Kulashevaniinga mwaanya ushelamya ngyura tawo,

na yeera mife, nta soori tawo ta fira-fo

kulare-fo nkoo nta umwi-fo, mamita kushu itorito lyoose lya fira.

4Mmbo vashewaa-si neewaiywa efo urukeny lwa Vakaldayo,

na vengyi vawe efo shia vekee vapopore.

5Yeny Nndumi Iruva wa matorito, nshilerekywa kya Israeli na Yuda-fo;

lla neelyi valenshilyamarya kyifye indo,

yeny mweele waawo Israeli.

6Risheny muuka efo Babilony,

wo nndu nakire muu vakwe!

Mulawaiywa kunu kyimaruma kya ulyamari lwakwe,

mashika ekyi nkyo kyeeri kya Nndumi kyeetaiya kiduva

ekyo kyikwaani nawe.

7Babilony mmbo vekee kikombe kya saabu maakony a Nndumi Iruva,

kyikanangisa uruka loose;

masanga akana mfinyu wakwe,

kutani masanga atirwa ni ukwale.

8Pari-parii Babilony yammbwa neefika-fika,

yiiyeny mukafiira kya Babilony!

Ruuyeny nri wa mavavavyo awo,

kwakooya vashiidima ishiiswa.

9Lulekunda yeekya Babilony nashie;

indi nkileidimika-fo,

Lulakane nawe lweende kyeru;

wo umwi urukeny lwakwe;

mashika uvingo lwakwe lwamfika iruveeu

lwansaamiswa fika nginii-u.”

10Nndumi Iruva ankaa kyaalu kyeru kalufwaaya,

“Ndifony kulya Sioni lundeamba

kya mashora mesha a Nndumi Iruva, Iruva weeru.”

11Nnweny mife yaany,

mukeepo ngao!

Mashika Nndumi Iruva ammbika uramba kwa vamangyi va Medes naambo vandelyamara Babilony kyiike ni itaiya kiduva kyuuka kwa Nndumi Iruva kyimaruma kya mmba yakwe yeeterevya.

12Kudeesye ikabana fira na Babilony;

ikara veelola vatiri finya;

saleesa varingyi veeringa elyi kio;

neevika uramba lwa misa,

mashika Nndumi Iruva amma ideesya na itana

ekyo akunndye itannya vandu va Babilony.

13Oo kweeke urukeny uviiri,

lukatira umasi na mira miingyi,

indi ulaalu kyamfikya ufishony

nraari wa muu wafo warrumbuwa.

14Ni Nndumi Iruva eefo na muu,

arera kwa irina lyakwe kaamba;

Ni kya dede mmbo shishekuishuryaa matorito na matorito a vandu vafye sha nrie

nawe vashekapaa kilewa kyeevinga!

Kyiimbo kyeyaarafuma Iruva

15Mmbwe yeto atannyi uruka kwa wiidimi lwakwe,

kavika-fo ulana kwa urango lwakwe

na kwa umanyo lwakwe kaala-fo nginiiu.

16Kyeeri oonisa unyanga lwakwe nginiiu ikarerema,

mmbwe yeto eende ifishi lyikasaama lyuuka masiiyony a uruka.

Mmbwe aata fimwii fya mmbwa,

kava mwiiyeende uraato luuka efo kitesheny kyavayo.

17Vandu woose mmbo vakee matondo kuleefo umwi atiri umanyo.

Veekaba minya woose mmbo vasutwa ni mafwanu akwe,

mashika mafwanu yoo a ulembi;

nta nnyatiri mumuyo nnang'ani akwe-fo.

18Nnyatiri mbusha-fo, ni mashora a ulembi;

elyi vasheywa ni ngapo mmbo vashemamikaa.

19Yeto Iruva wa Yakobo nnyakee shawo-fo,

we mmbwe yeto atannyi findo fyoose,

neewo va mmba ya Israeli mmbo vaya-ding'u vakwe.

Nndumi Iruva wa matorito llyo irina lyakwe.

Ngumau ya Iruva

20“Yewe mmbwe ngumau na kyisha kyakwa kya fira:

yewe kwasheekya ifisha-fisha masanga

kwasheekya ituula ngyumangyi;

21kwasheekya ifisha frasi fyenga-fyenga neeto mwiisaama wakwe;

makari ayoomuwa ni frasi neeto mwiyoora shia makari yoo.

22Kwasheekya ipopora vomi na vaka;

kwasheekya ipopora vandu vakuu neewo vakoo;

kwasheekya ipopora vakoo va kyuumi neewo vakoo va kyika;

23kwasheekya ifisha fyenga-fyenga mwiisi na ironda lyakwe

kwasheekya ifisha fyenga-fyenga nremi neewo akeerema nawo;

vamangyi na vasongoru vawo.”

Ngapo ya Babilony

24Mmbo shivarikya ngapo ing'ani vandu eva va Ukaldayo na Babilony mwiilollye na miso any kya ulyamari valetana kulya Sioni, ni Nndumi Iruva aamba.

25“Arannya mmbo shikabana neewe yewe ifumbu ilyamari

elyo lyilamarye uruka loose,

mmbo nsheorrwa woko lwakwa ikabana na yewe shishekweera-si kuuka mabangaleny a mawe,

shikwaallwe ifumbuu ikore muro

ni Nndumi Iruva aamba.

26Nkwiifo iwe lyisheipowaa lyuuka kwafo lyisheva iwe lya ndumba-fo

nta lyive iwe lya nsuka-fo,

indi yewe mmbo kushevaa kasa koomu llung'anu,

ni yeny Nndumi Iruva shaamba,

27“Kudeesye kya ikaba wombe kwa masanga yaa urukeny;

deesya masanga kyeekabana fira nawe,

umbya vamangyi ishekabana nawe,

wooka Ararati, Minni na Ashikenasi

endavika vasongoru va fira ikabana,

nawe vasheende frasi tifye sha ikamba iniini lya nrye.

28Deesya masanga ikabana nawe,

vamangyi va Medes amwi na vashilyi na vasongoru vawo;

na uruka lungyi loose elo lukee sumbai ya ushilyi lwakwe.

29Uruka mmbo lukeererema na ikwaalaa-la neevavywa,

mashika ikusaro lya Nndumi Iruva, ni ikaba Babilony,

na yallwa uruka elo luve ukyiva kulakaa kushekaa-fo nndu.

30Veekabana va Babilony vammanda ikabana,

ni yefo turuveny yaawo vakusurummyi;

mashika vansiyyo ni finya vakava sha vaka,

na mmba tawo tankorwa na muro ngiri tawo ta minya tanfishwa.

31Wo umwi mmbo akeerisha, nakooye ungyi,

na varundi vandekwaanannya,

naambo vandevia mangyi ya Babilony sheelyi muri wakwe wantirwa taari shoose.

32Fitara fya mariko a mura fyoose fyantirwa,

na turuve tankorwa muro,

na veekabana vantirwa nkyitaku na weeresi.

33Mashika Nndumi Iruva wa matorito, Iruva wa Israeli: mmbo aamba;

mfu wa Babilony mmbo avakye uvasha

lwa ikoninndya nganu elyi kyeeri lukeedeesywa,

irisha kyaangu kyeeri kya mailullyony kyikaveesha.”

34Nebukadnessa mangyi ya Babilony anshimira kashisa,

kashaallwa sha nungu ilatiri kindo,

kashimira sha shoka ing'ani,

kaishura ndeu yakwe na umasi lwakwa;

kawuya kashifishya-si sha uraako.

35Ngapo ileshikooya yeny na vandu vakwa, mmbo ilooka Babilony,

kweekyo ni kuti ishekooya ngapo yuuka Sioni ishetaiya kiduva.

Nndumi Iruva mmbo asheekkya Israeli

36Kweekyo Nndumi Iruva mmbo aamba indi;

“Lola! Mmbo shishemukabannya,

shishevataiya kiduva kyimaruma kyany.

Yeeve isheummya

na usoka lusheummya;

37Babilony mmbo kushevaa mmbillya ya mmba ta marama,

kusheva mmba ta mabarwe,

kusheva kundo kuvaa ikaywa ni vandu

38Mmbo vasherundumaa kimwi sha miiso;

vashekulaiya sha vana va miiso.

39Veekunndye fyeelya, Yeny shishevadeesikya fyelya na fyeena

Vani vanangwa, valale varekkye rony

valakaa vakwiipo lyingyi;

ni Nndumi Iruva aamba.

40Shisheveera kiroriny,

sha ngurana ya ishishwa ya suva na woro.”

Ngapo ya Babilony

41Ni kindo kya iting'a, Babilony itirwa,

itirwa muri weishiwa ulaniny koose!

Babilony yammba weeresi na usutu nnang'ani a masanga.

42Yeeve lyammiwala-wala uwe ya Babilony,

lyikasikywa ni matundulu a ifwaalangya.

43Miri yakwe yammba usutu,

uruka lwankaluka lukava kasa koomu.

Uruka kundo kulatiri vandu,

nta kundo kulavaa yiira mwana wa nndu.

44Nshekaba Beli iruva lya Babilony,

kutani araaka efyo alemmira fyuuka efo kaniny kyakwe

kulakaa-fo masanga allatya lyingyi isimamba lya Babilony lyammbwa.

45“Ukeny efo nnang'ani ya vandu vakwe, eni vandu vakwa!

Wo nndu atirishe muu wakwe

wooke efo nyashiny shinyaasi ya Nndumi Iruva!

46Mirima yaany ilaaukwa nta yuumiswa kya mbony eti,

tikeyiitiwa kunu urukeny,

kyeeri mukeyiita mbony mwaaka yeu,

mwaaka ungyi mukeeta tingyi,

mbony ta uwai urukeny,

na mbony ta uriiti ushilyiny uwe ya ushilyi lungyi.

47“Arannyiny, shimuvie, mikonu ikeesha,

shishefisha-fisha mafwanu a Babilony;

urukeny kwakwe koose kushevaa-fo usutu,

na vandu vakwe woose vashewaawa.

48Efyo fyoose kunu urukeny,

na kullya iruveeu mmbo fisheemba na ifura,

kyeeri yeto muni ngapo asheshaa ooka taari ya ndoo ishemamita Babilony

ni Nndumi Iruva aamba.

49Eni Babilony mmbo mutevetye vandu ulaniny koose vakawaawa,

kweekyo ni kuti muwaawa kyimaruma kya Israeli.”

Nrumi yuuka kwa Iruva kwa vandu va Israeli vakee kya Babilony

50Eni muleturunya ufu ukeny kunu,

nta mulashekyeeywa,

naakwa nnyelyi mukee urukeny lwa kwaasha.

Kummbweny Nndumi Iruva na muri wa Yerusalemu.

51“Mmbo mukeyaamba lwansutwa, neesaveeswa;

lwamminyalwa kikailannya,

mashika lwamiinyalwa fika kundo kweele kwa mmba ya Nndumi Iruva.’

52“Arannya! Mikonu ikeesha kyeeri Nndumi Iruva asheutyaa uvingo mafwanu a Babilony,

neefo urukeny lwakwe woose vashekulaiyaa kya mavavyo.

53Naakwa Babilony yasaama indefika nginiiu, ando kwa uwe deny,

indevika-fo turuve itiri finya,

yeto muni ngapo mmbo ashuuka kwakwa nandenkaba,”

ni Nndumi Iruva aamba.

Ngapo ya kilanya ya Babilony

54Arannya, kiyyo kyuuka Babilony!

Unyanga uniini lwa mavavyo luuka urukeny lwa Kaldayo!

55Mashika Nndumi Iruva akeemamita Babilony,

na unyanga lwakwe uniini lulakaa lwiitiwa lyingyi

matundulu a vayo mmbo akeyoona sha mura mwiingyi,

ntiri wa unyanga lwawo ikeengera isaama.

56Yee! Mwiirumata ansha irumata Babilony;

veekabana vakwe vantirwa,

ngyura takwe tanfishwa-fishwa fyenga,

mashika yeny Nndumi Iruva ni Iruva shisuuye ulyamari

ni kuti shitannyi Babilony ekyo kyikwaani nawe.

57Mmbo nshenangisaa vasongoru na vandu vakwe varango,

veetori na veeshillya amwi na vasikari vakwe mmbo vashelalaa

valakaa vakuboo lyingyi ni mangyi aamba,

we Nndumi Iruva wa matorito, llyo irina lyakwe.

58Nndumi Iruva wa matorito mmbo aamba:

“Isimamba iniini lya Babilony mmbo lyishaalalwaa sumbai,

na myaango yakwe myaasha ishemamitwa na muro,

vandu mmbo vakekwaatara kyaru,

mashika kya mafurumyony ni murony.”

Nrumi ya Yeremia yarawa Babilony

59Yeremia we nkisuku mmbo eruma Seria mwana wa Neria, mwana wa Mehseia, kyeeri eenda na Sedekia mangyi ya Yuda, kulya Babilony, kwiike mwaaka wa kaana wa ushilyi lwakwe 60Yeremia kareiya kyitabuny ulyamari loose lushekaa lushe Babilony, marero yoo shekooya isheya Babilony. 61Nalyo Yeremia kavia Seraia, “Kyeeri kundefika Babilony mmbo kundevasomya marero yaandi moose. 62Kuvavie, ‘We Nndumi Iruva mmbo aamba kya uruka elu, sheelyi mmbo ashelurumataa.’ 63Kyeeri kumaa isoma kyitabu ekyo mmbo kushekifingya iweny kundekyoolota mureny wa Eufrate, 64kwaambe, Babilony, ‘Mmbo kurekkya sha mareiyo yaa kulakaa kusaame lyingyi kyimaruma kya ulyamari elu shakweengye.’ Yoo nng'u mafurumyony a marero a Yeremia.”

Currently Selected:

YEREMIA 51: MAS2

Highlight

Copy

Compare