YEREMIA 50
50
Babilony yatirwa
1Irero Nndumi Iruva aleamba kya uruka lwa Babilony na vandu va vayo kyeendwa ni Yeremia we nkisuku:
2“Kaba weele kuvie vandu va masanga moose kulasurumi nta kindo kimwi-fo,
kwaambe, ‘Babeli yantirwa mifungwa,
iruva lya wongo beli ansutwa, na merodaki anrumatwa,
mafwanu akwe ansutwa,
na maruva akwe akamamitwa.
3Mashika isanga lyansha ikabana nawe, lyuuka na taari ya ndoo, ishemamita neerumata kulasaa-fo kindo kyimwi; vandu na mafisi a ngoroshony, mmbo fisherishyaa kwaasha.’”
Iwuya lya Israli
4Nndumi Iruva mmbo aamba, “Kyeeri ekyo vandu va Israeli na Yuda mmbo vashekuumbya amwi vashe veeffwa, neeshiruya yeny Nndumi Iruva waawo. 5Mmbo vashevesaa shia isheenda Sioni na fisangu fyawo fiindutye nafo, veshaamba, ‘Oshony, lukulunge amwi na Nndumi Iruva luvike kyaasa kya llung'anu lulakaa lurekywa.’
6“Vandu vakwa vamba moonri arekkye; veesi vawo vakavereta shia, vakandevaindutya mafumbuu, vakavevafita mafumbuu na fidoorony valamanyi kindo kweewuya kyeny. 7Vakawaawa vandu woose veekevalollya, na vakiduva vawo vakaamba, ‘Llutiri mbese-fo mashika mmbo valelyamarya Nndumi Iruva waawo wa kirishony kya dede, Nndumi Iruva eto vandeye vawo vammbikye nsia.’ 8Risheny muuke efo nnang'ani ya Vababeli mundekaa urukeny lwa Vakaldayo mundeva-fo sha woro ta mburu nnang'ani ya ironda. 9Ulaalu mmbo shikedeesya isanga lying'ani lyitiri vandu veengyi ishekabana na Babilony urukeny taari ya ndoo, mmbo vankudeesya ishekabana na Babilony ikamarwa mifungwa. Mife yaawo mmbo ivakye itorito lya fira lyilawuyaa na maako aruu. 10Vakaldayo mmbo vashetafurwaa na isokwa wo kindo vatiri na vasoki veni mmbo vashefuraa, ni Nndumi Iruva aamba.”
Iwa lya Babilony
11“Eni vasoki va masaa akwa;
naakwa mwafura na ikushela mukakillya-kyillya sha ngashe ikeelya mare
neeipoiyo sha frasi ya kyuumi.
12Mau yeto mmbo ashevaa usutu,
neeto akuwonnye mmbo ashesaveeswa.
Nayo isheva shidu yiilannyi masanga moose
isheva kasa koomu na kundo kulatiri mura.
13Kyimaruma kya nyashi ya Nndumi Iruva
mmbo Babilony kushevaa kasa koomu kundo kulakaywa mmbandu;
wo nndu asheeraa kufii na Babilony mmbo asheaukwa na ikuvesa kya.
kyimaruma kya mavavywo awo.
14Kudeesya kisha kya Babilony eni veekaba fira;
Yeni mwiishi yoomwa ngyura,
oomweny mife mulaseerise nta umwi
mashika ni elyi valelyamarya Nndumi Iruva.
15Kwiipony mukabe kyoorongye kya fira taari toose,
mashika Babilony ammiirikya katirwa turuve takwe tammbwa;
masimamba takwe tammbunduwa ni Nndumi Iruva akeetaiya kiduva,
neeni taiyeny kiduva sheelyi nawe alemutannya.
16Imeny yewo vevaaya mbeu Babilony,
neewo veekamara mikusha kyeeri kya moolullyony;
wo umwi mmbo ashewuyyaa vandu vakwe muni
na wo umwi mmbo asherishyaa urukeny lwakwe.”
Iwuya lya Israeli
17“Israeli ni ishoonri lyikeelyinngywa, lyikeerishiswa ni miiso. Llya mapookyony mmbo vemamitwa ni mangyi ya Vaashuru; na ulaalu Nabukadnessa mangyi ya Babilony eto amufisha-fishaa maffwa.” 18Kweekyo Nndumi Iruva wa matorito, Iruva wa Israeli aamba, mmbo shikeyeende ngapo kwa mangyi ya Babilony na uruka lwakwe, ngata ilya shekaba mangyi ya Ashuru na vandu vakwe. 19Mmbo shisheviryaa Israeli uruka lwawo, mmbo vashelyaa fimu fisheremwaa fyuuka Karmeli na Bashani, na shoonga tawo mmbo tishooka efo mafumbuny a Efraim na Giliadi. 20Elyi kyeeri na mikonu ishekaa ishe, Nndumi Iruva mmbo aamba, ukasha mmbo lusherumywaa llulollywa-fo lumwi Israeli-fo na ulyamari lusheruuywa Yuda, nakyo llushesaryaa valya shivaseeri-seeri-fo ni Nndumi Iruva aamba.
Nndumi Iruva autya Babilony uvingo
21Wiipony mukandekaba vandu va Meratamu,
endekabeny vandu va Pekodi.
Muvakape muvamamite kushu, ni yeny Nndumi Iruva shaamba,
“Muvatanye neefyo fyoose shammuvikya ishingo.
22Kyoorongye kya fira mmbo kyiitiwa urukeny koose,
na ulyamaro uniini.
23A mmbo kyava inda muri wekee ngumau ing'ani ikeelannya urukeny koose
wantuulwa-si nefishwa-fishwa!
Babilony kwava kirashi nnang'ani a masanga!
24Shekuvikya nreiyo neewe Babilony kwatirwa,
nta kulaore kwemanya kyavayo;
kwakooywa neetirwa kyimaruma kya imwiila
na ikweesa na Nndumi Iruva.
25Nndumi Iruva ammiirrwa mmba ya fisha,
karrwa-fo fisha fya nyashi yakwe,
mashika Nndumi Iruva wa matorito atiri mashora nafyo,
kunu urukeny lwa Vakaldayo.
26Oshony mukallyingillya muuka taari toose,
rrweny mmba ya fisike fyakwe fya shoonga
sha mbillya ta sosoko murumate kushu uruka elu,
mulaseerise-fo nta kindo kyimwi-fo.
27Mamita masiingo yoo akwe moose ra,
woose wooloke efo kundo kweeshisshwa.
Woshiny ni lwawo, mashika nkonu wamfika,
kyeeri kya ngapo yaawo.”
28Arannya! Vanrisha neekusuruma wooka urukeny lwa Babilony, vakandeamba kulya Siyony ndesa Nndumi Iruva, Iruva wa Israeli alevataiya kiduva kya mmba yakwe yeeterevya. 29Vaange yewo veekaba mife, vashekaba Babilony, rumeny wo nndu eto eeshi ilema ura. Mulyingillye muri kulave-fo nta umwi aturunyaa, mushentannya ngata aletannya vengyi, mashika kwa umbafu lwakwe mmbo aleela Nndumi Iruva, Mweele wa Israeli. 30Kweekyo vasero vakwe woose mmbo vashewaiywa efo kyuunguny kwawo na vasikari vakwe woose veekabana mmbo vasherumatwa nkonu yeto mweni, ni Nndumi Iruva aamba.
31Arannya shikuvie, yewe mbafu Nndumi Iruva wa matorito, mmbo aamba;
kyeeri kyamfika,
nkonu shishekurummya ngapo yakwa.
32Ikushela lyafo mmbo lyishekutangallwaa kuwe-si, nta kulawoni
nndu mwiikusaleesa,
shishekwaatyaa muro miriny nyafo,
neefyo fyoose fiifo fishekooya imamitwa.
33Nndumi Iruva wa matorito; mmbo aamba indi, “Vandu va Israeli mmbo valyiswaa ukyiva amwi na vandu va Yuda. Valya valekamara mifungwa, mmbo valelema ivalotora na ivalyisa ukyiva. 34Yeny mweekyi waawo mmbo shitiri finya, Nndumi Iruva wa matorito mmbwe irina lyakwe. Ni kya dede mmbo shishevakapannyaa shishevaniinga unapwe efo urukeny lwawo, indi Babilony mmbo vandu vashekooya ilya ukyiva!”
35“Shammiipoo usu uwe ya Vakaldayo, ni Nndumi Iruva aamba
na uwe ya vandu va Babilony,
na uwe ya vasongoru vakwe amwi na vandu vakwe varango woose.
36Shammipoiyo usu uwe kweewo veelafya,
naambo veengere iva vatondo!
Usu lukaipoiywa masiingo a vandu
naambo vamamitwa!
37Shammipoiyo usu uwe ya frasi na makari awo
amwi matorito eyaakkwa nnang'ani yaawo, eva marosho ngata ya vaka,
usu lwammipoiywa umasi lwakwe loose,
naambo vaidimi yaafinywa neesokwa!
38Kusheshaa-fo mwi wa kirangasi,
naambo mira yaawo ikooye yuumya,
mashika elyi kukee uruka lwa maruva a mafwanu,
nawo akee masongosye na maruva a wongo.
39“Kweekyo mafisi a ngoroshony mmbo ashekaa kyimwi na minying'a efo urukeny lwa Babilony vashesanga amwi na nyaa. Kulashesendwaa-fo vandu fyeeri fyoose, nta kulakaa-fo vandu ngyeeri na ngyeeri. 40Sha llya edenga Sodoma na Gomora na miri ilya yeefitani nawo, ni indi Nndumi Iruva aamba. Kulashekaa kusamye-fo nndu, nta mwana wa nndu ashekaa-fo.
41“Arannya shikuvie, mmbo vashaa vandu wooka na taari ya ndoo;
isanga lya vandu vatiri finya na vamangyi veengyi
vakekudeesya wooka na taari ta kwaasha ta uruka.
42Veeshi itira mafumu na ngyura,
vandu vannyaasi valatiri ilyillya.
Irunduma lyawo lyikavaka yoona lya yeeve;
veeshi isaama frasi,
vamma ikudeesya ikabana fira na yewe, Ee mfu wa Babilony!
43“Nawe mangyi ya Babilony ammiita mbony eto,
na maako akwe akava nsele-sele;
katirwa mmbweerei,
na mavavyo sha nka alyiwa ni usu lwa mwana.
44“Arannya, mmbo nshaa sha miiso ya kuruka efo ngoroshony ya Yordan, nshaanga irondeny lya moonri lyitiri finya neeny pari-pari, shishevaanta varishe wooke-fo. Neeny shishesaleesau nndu ungyi yeto shishensauwa mashika mmbi ashivakye? Mmbi ashiidimaa ishivesa? Ni mwiisi ungau akarya ishilemmya? 45Naasa arannya uramba lwa Nndumi Iruva ammbika kya Babilony na fiteve shamma ideesya kya itannya Vakaldayo. Kya dede vana vawo mmbo vasherufuwa sumbai, kusheva na kyiiyo na weeresi efo kwawo. 46Babilony yammbwa na ntiri wa vayo ulereremisa uruka na kyiiyo kyawo kyishiitiwa nnang'ani a masanga.”
Currently Selected:
YEREMIA 50: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
