YEREMIA 48
48
Moabu yakabwa
1Nndumi Iruva wa matorito, Iruva wa Israeli mmbo aamba indi;
“Woshiny llwa Nebo, mashika elyi muri wawo wallyamarwa!
Kiriatiaimu yausutwa yatirwa turuve yaawo yansutwa neewunduwa.
2Umasi lwa Moabu lwammbwa.
Vakavika kyama kyeetuula Eshboni
Naasa ndifony lundeimamita,
ilashesalala lyingyi sha isanga!
Neewe Madimani mmbo kushemalalyiswa na usu.
3“Aranya! Kyiiyo kyuuka Horonaim
‘kukeesha urumato na ilyamarwa lying'ani!’
4Moabu yallyamarwa;
na kyiiyo kyikeetiwa kyikafika Soari.
5Valya valeturunya mmbo vakeenda Luhiti,
mmbo vakeyeenda veefiira;
mashika kupookya Horonaimu,
kyiiyo kya ilyamarwa mmbo kyikeyiitiwa.
6Risha! Kwakyira muu wafo!
Kwavaka nshungu wa ngoroshony efo kasa koomu!
7Kyimmba kwevika nsia efo turuveny yafo na umasi lwaafo,
ulaalu kukeetirwa neekamarwa mifungwa;
na Shamoshi ashekurikwa ushingeny
amwi na vakoani vakwe na vasongoru vakwe.
8Veerumata mmbo vashefikya wo muri kuleefo muri usheturunyaa;
wo kindo kyikee kulya imungony kyishemamikaa,
na kulya kurambalalyi kushelyamarwa ndesa Nndumi Iruva ammaamba.
9“Kwiniinga Maobu maaru mmbo erumbuka eende kwaasha,
na muri wakwe usheva ukyiva kundo kulatiri vandu.
10Mmbo akee nn-denge yeto,
yeto aleema usu lwakwe lulapuswa samu.”
Miri ya Moabu yamamito
11Moabu mmbo akee lleke ukya aakee n-du,
kulaiyo nndu alemmukuna;
nta innletya ooka ndiviny yei,
na innletya ndiviny ingyi,
ao ikamarwa ushingeny-fo;
mmbo akee sha llya eekaa kuleefo kyindo kyaalashikye.
12Kweekyo, lola, mikonu ikeesha, ni Nndumi Iruva aamba, nsheruma veepuswa vashepuswa ooka efo ndiviny yakwe numa napapare nakori yeto. 13Numa ya vayo Moabu mmbo ashesutwaa ni Shemoshi sha valya va mmba ya Israeli vesutwa kya Beteli ulya emmbikye nsia.
14“A mmbo mushiidima inda yaamba,
‘Mmbo mukee shaamba, na vandu va mmba ya fira vatiri finya?’
15Mwimamita wa Moabu na miri yakwe ammaafukya,
na vasero vakwe vatiri finya vammbwaawa,
ni mangyi aamba we Nndumi Iruva wa matorito lyo irina lyakwe.
16ngapo ya Moabu ikee kufii,
na urumato lwakwe mmbo lukeesha uviny.”
17Yyeny yeni moose mukee vaamurasa vakwe,
neewo woose veeshi irina lyakwe mwaambe,
“Ndesa mbiiri yakwe itiri finya
Yanfishwa mbiiri ya itumbe,
18Olokeny, sumbai muuke yoo ando mukai kwa itumbe,
mushekaya uteri yoo sumbai ando kuumu vandu va Diboni!
Mashika mwiimamita Moabu ammafukya,
allyamara turuve yaany.
19Salaleny mbai ya shia mukalola,
Yeni vandu va Aroori!
Kuvese yeto akeerisha, neeto aturunnya kuvavese, nkyokyi valollya?
20Moabu yansutwa mashika yamfishwa;
kabeny kyiiyo neefura!
Via valya va mbai ya mura wa Arnoni
sheelyi Moabu yallyamarwa.
21“Holoni na Yahasi na Mefaati vanrumbuywa mwaandu, 22kimwi na Diboni na Nebo na Bet-diblataimu, 23Kiriataimu Betgamuli, Betmeoni. 24Amwi na Keri-oti na Bosra na miiri moose ya uruka lwa Moabu, ya kwaasha na kufii. 25Wombe lwa Moabu lwamrumbuwa na woko lwakwe lwamfishwa,” ni Nndumi Iruva aamba.
Moabu ishefweeriswaa
26“Nangiseny Moabu kyimaruma kya ikung'anisa lyakwe mbee ya usangu lwa Nndumi Iruva; naambo ashekwaalaa-la efo urukeny lwakwe naambo nakooye isekwa ni vandu. 27Yewe Moabu, kwammbwa shaasa kweseka Israeli; a ndesa mmbo itirwa mmanyinyi kutani kwansela indo mbee ya vandu?
28“Yeni vandu va Moabu, ukeny yefo miriny mundekaa mbangeny ta mawe!
Vakeny mbeta eto tisongosyaa fifuri,
fyavayo yoo mbai ya imungo.
29Lwammita mbony ta ikurosa na ukushobi lwa Moabu, akushoba deny,
Lwammita efyo akeekuuta nafyo,
na nrima wakwe wa umbafu.
30Nndumi Iruva kaamba; yeny shiishi;
ikutuula na umbafu lwakwe,
ikushoba lyakwe llya tangalu,
na mitannyi yakwe nshi kindo-fo.
31Mmbo shikeiya kya Moabu;
elyi vandu va Kir-heres woose vakee kyiiyony.
shifiira kya Moabu shoose;
32Mmbo shikekuyiiya yewe nnda wa Sabma!
Kyikailannya yewo Yaser,
fimu fya nnda wafo fikavesa neelamba uwe ya yeeve,
kutani fyandefika Yaser,
indi yeto mwiilyamara kasha imamita fimu efyo fyafo fya nsabibu nta kyeeri kya mwi.
33Ifura na nsia fyansamirwa,
fikootwa urukeny uviiri lwa Moabu;
kulakyiifo sabibu ikeekamwa na nndoro,
nndoro ukyeyiitiwa ni fyoova,
kulakyiifo fiimbo na nndoro.
34“Eshbony na Elealeh kabeny kyiiyo; kindefika Yahasi. Kyiiyo kyawo kyikeetiwa kyuuka Soari fika Horonaim na Eglat-shelishiya. Mashika naakwa ni mura wa Nim-rim nato mmbo wammuumya. 35Nndumi Iruva aamba, ‘Mmbo nsheengye Moabu ngapo ing'ani na valya veeninngya firaso fya ikora na muro kwa maruva aawo a wongo. 36Kweekyo nrima wakwa mmbo ukeenrovye kimaruma kya Moabu sha mwikapa fivale, nrima wakwa ukaroywa nnu sha nndu akapa fivale kya vandu va Kir-heres, mashika naakwa ni umasi veetiri mmbo lwammamika.’
37“Mashika wo nrrwe mmbo ukemuute kipalala na nguyo tikeshuute, vamamanya maako awo, na fisiny fyawo vakakufingya soori ta makunnya. 38Efo uwe ya mmba ta Vamoabu neefo fyuungony kwawo, nkwiifo kyindo kyingyi kyikeiitiwa kuuta kyiiyo-nsi-fo, mashika Moabu yafishwa ndivi ilatiri mwiisara kya-va-yo, ni Nndumi Iruva aamba. 39Lola ndesa Moabu yan-wunduwa! Arannya ndesa vakefiira! Lola ndesa vammbuya numa neesuka! Kweekyo Moabu mmbo ammba seko na nrapu kwa vamurasa vakwe.”
Moabu nnyikaa iturunye-fo
40Lola! Nndumi Iruva mmbo aamba indi;
“Mmbo lyisheshaa isanga lyirumbuka
sha ngoru uwe ya Moabu na Moabu ilyamarwa kushu.
41Miri mmbo ishetirwa mifungwa
na turuve tishetirwa,
mirima ya vasikari va Moabu mmbo ishererema
sha nka akeelyiwa ni usu lwa mwana.
42Moabu mmbo ishemamitwa kulakyivaa-fo vandu lyingyi,
mashika elyi valekurosa vakailannya Nndumi Iruva.
43Fyeeresi, mashombo na mireiyo,
mmbo fimuvereyi eni vandu va Moabu!
Ni Nndumi Iruva aamba.
44Ulya asheturunyaa weeresi,
mmbo ashewaa ishombony,
ulya asheturunyaa ni nreiyo mmbo ashetirwa nreiyo.
Mashika ngapo yei ni ya vandu va Moabu
elyi kyeeri kyawo kyisheshaa
ni Nndumi Iruva aamba.
45“Veerishiswa va Eshbon valatiri finya
vakeeruuya ando kweyoovya,
mashika muro wammaaka wuuka muriny.
Muro ukeyaaka wuuka mmba ya Shihon,
ukalyamara mbengye ya Moabu,
na fidooro fya ewo veekunnda mbony ta fira va Moabu.
46Woshiny llwafo, yewe Moabu!
Vandu va Kemoshi, vamamitwa,
mashika vaero vafo vantirwa mifungwa,
na vefu vafo vankamarwa ushingeny.
47Indi, elyi numa, Moabu ishefwaaywa,
kyeeri nkonu yeto ushefikaa ni Nndumi Iruva aamba.”
Yaa nng'u umando lwa uvingo lwa Moabu.
Currently Selected:
YEREMIA 48: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
