YEREMIA 44
44
Nrumi ya Nndumi Iruva kwa Veisraeli kulya Misri
1Irero lyesheya Yeremia kya Vayuda woose yewo vekee urukeny lwa Misri, kulya Migdoli, kulya Tapanesi, kulya Memfisi, na urukeny lwa Patrosi lyikaamba; 2“Nndumi Iruva wa matorito, Iruva wa Israeli aamba ule: Yeni mmulelollya makasha moose shileengye Yerusalemu na miri myoose ya Yuda. Loleny, inu myoose mmbo ikee sama kuleifo nta nndu umwi akaafo, 3Kyeendwa ni uravi valetana, veshirosyaa ngoo, vakandekorya ubani na yiindya maruva engyi kulaore veeshi, wo nta yeni nta vamiku vany. 4Ra na indo shamurumya varundi vakwa vakisuku kuleefo yiimuya shaamba; ‘Yeni mulatane utefusu yelu-fo, nshilusuuye nnu!’ 5Indi lyo mmbearannya ao ishilootya kuri vakurye varevakorya ubani maruva engyi-fo. 6Kweekyo nyashi yakwa na ngoo yakwa ikaletwa ikakora miri ya Yuda na shia ta Yerusalemu; vakaaluka kyiraa na sama shaasa kyikai nkonu va inu. 7Ulaalu Nndumi Iruva wa matorito, Iruva wa Israeli aamba: A nkyikyi ndesa mutanyaa mirima yaany ukasha uniini indo, imamita nndu mmi na nka, mwana ashoongaa na sambura urukeny lwa Yuda, kulare muraa nta sasari? 8A nkyikyi ndesa elyi mushirosyaa ngoo na mashora a maako any mwiikoryaa ubani maruva engyi urukeny lwa Misri kundo muleshekaa, naambo mumamitwa na yaaluka kyidengo na kyiila masangyeny a uruka? 9A ndesa mmwanrekkywa uravi lwa vamiku vany, uravi lwa vamangyi va Yuda, uravi lwa vaka vaawo, yelo valetana urukeny lwa Yuda na shieny ta Yerusalemu? 10Wo mmbalekunyiisa fika nkonu va inu-fo, nta mmbaleereya nta ilatya mavavaso na vaarya lwakwa, yelo shilevika mbee yaany na mbee ya vamiku vany-fo.
11“Kweekyo Nndumi Iruva wa matorito, Iruva wa Israeli aamba: loleny nshikeipoo usangu lwakwa kyilasha kyany kya makasha, imamita Yuda shoose. 12Yeny nshishiipoo sasari ta Yuda yewo valesumanisa ngyusangu tawo vakashekaa urukeny lwa Misri, nawo vamamitwa; mmbashefiyyaa urukeny lwa Misri na usu na shaa; uka n-du fika nniini, mbawaawa ni usu na shaa; mmbashaaluka iting'a, weeresi, kyidengo na kyiila. 13Yeny nshishekapaa yewo vakaa urukeny lwa Misri shaasa shekaba Yerusalemu na usu na shaa na ndwari sheeresi, 14naambo kulakeefo sasari imwi ya Yuda ileshekaa urukeny lwa Misri irishaa ao iturunyaa ao iwuya urukeny lwa Yuda, yelo valanngye nnu iwuya vandekaafo; mashika mmbawuyaa kulaore ni vaangu deny yewovarishaa-fo.”
15Llyo womi woose veeshi vakamanya vaka vawo mmbalenkorya ubani maruva engyi, na vaka woose yewo vesalala-u, ikwaanu iniini, vandu woose yewo vekaa Patrosi urukeny lwa Misri vakarouwa Yeremia vakammbia: 16“Kya marero ya kwaluvia kwiisenda na irina lya Nndumi Iruva, llukwaarannyaa-fo. 17Indi llutanaa filya fyoose lwallyiyya mboo, ikorya ubani nka-mangyi va ngyinii-u na illetyaa firaso fyeena, shaasa luletana yese na vamiku veru, vamangyi veru na vasongoru veru miriny ya Yuda na shieny ta Yerusalemu; kya elyi lwewona shoonga nkuka, lukavessywa nta lulalollye makasha. 18Indi lyo uka lwinra lulakorya ubani nka-mangyi ya ngyinii-u na ira lulalletya firaso fyeena, lluletura wo kyindo, lukawaawa ni usu na shaa.” 19Na vaka vakaamba, “Elyi lwekorya ubani nka va mangyi ya ngyinii-u na illetya firaso fyeena, llwetana indo kulaore womi veru veerikkya, lukasongosya mikate itiri fwana yakwe na illetya firaso fyeena!”
20Llyoony Yeremia kavia vandu woose, womi na vaka, vandu woose yewo venrouwa indi: 21“Kya ubani mwekorya miriny ya Yuda na shieny ya Yerusalemu, yeni na vamiku vany, vamangyi vany na vasongoru vany na vandu va uruka, a ndesa Nndummi Iruva nnyerekkywa? 22A kyekyisha-se nrweny vakwe? Nndumi Iruva nnyakyisisiryaa lyingyi uravi lwany na utefusu muletana-fo; kweekyo uruka lwany lwammaluka sama na kyiraa na kyidengo, kuleifo nndu vekaafo shaasa kyikai nkonu va inu.” 23Ngapo yeti mmbo tamuwoya fika inu mashika mmbo muleniingya maruva firaso, mukalyamarya Ndumi Iruva llya mulelema iindya unyanga lwakwe, ilatya ivavaso lyakwe na uramba lwakwe.
24Yeremia kavia vandu woose na vaka woose, “Arannyiny irero lya Ndumi Iruva yeni moose va Yuda yeni mukee urukeny lwa Misri, 25Nndumi Iruva wa matorito, Iruva wa Israeli aamba; Yeni na vaka vany mmwaamba na kana fyany muveni na mukainutya na maako any mukaamba, ‘Yese ni kya dede llutanaa kya mboo yeru lulyiyye, ya ikorya ubani nka va mangyi ya ngyinii-u na illetya firaso fyeena.’ Ulaalu vangiseny mboo yaany na itana mboo yaany! 26Kweekyo arannyiny ni irero lya Nndumi Iruva yeni moose va Yuda mukaa urukeny lwa Misri: Loleny, shallya mboo na irina lyakwa iniini, ni Nndumi Iruva aamba sheelyi; irina lyakwa llyikyisendwaa lyingyi kaniny kya nndu moose wa Yuda urukeny lloose lwa Misri eshaamba; ‘Nndumi Iruva eefo na muu.’ 27Lola, mmbo shikeeveesa kya makasha nshi kya mesha-fo; vandu woose va Yuda vakee urukeny lwa Misri mmbawaawa ni usu na shaa fika umariso lwawo lwafika. 28Na yewo varisha usu mmbawuyaa urukeny lwa Yuda wooka urujeny lwa Misri, vandu vaangu deny; na sasari ta Yuda yeto tileshekaa urukeny lwa Misri vashemanyaa ni irero lyavi lyitiri finya, ni llyakwa ao ni lyawo. 29Yekyi nkyishevaa kyiring'isyo kwany, ni Nndumi Iruva aamba, sheelyi nshimukapyaa yaandi naambo mumanye ni kya dede marero akwa nnyashiinukya kya makasha kwany: 30Nndumi Iruva aamba, Lola Yeny nshiniingya Farao Hofra mangyi ya Misri wokony lwa vakyiduva vakwe na wokony lwa yewo vakeeruya muu akwe, shaasa sheningya Sedekia mangyi ya Yuda wokony lwa Nebukadnesa mangyi ya Babilony, yeto ekee nkyiduva vakwe na mwiiruuya muu vakwe.”
Currently Selected:
YEREMIA 44: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
