YEREMIA 43
43
Yeremia arawa Misri
1Elyi Yeremia emaa irera na vandu woose marero moose a Nndumi Iruva, Iruva waao, yoo Nndumi Iruva, Iruva waao enruma kwawo, 2Asaria mwana wa Hoshaya na Yohana mwana wa Karea na vandu vambafu vakavia Yeremia, “Nkukeeyaamba wongo. Nndumi Iruva, Iruva weeru nnyalekuruma kushaamba sheelyi, ‘Muleende Misri mundekaafo-fo;’ 3indi ni Baruku mwana wa Neria akwaaya kyilasha kyeru naambo lutirwa ni Vakaldayo naambo valuwae ao valukamare mifungwa fika Babilony.” 4Kweekyo Yohanani mwana wa Karea na vasongoru woose va vasikari na vandu woose vakalema yiindya unyanga lwa Nndumi Iruva, vasee urukeny lwa Yuda. 5Indi Yohanani na vasongoru woose va vasikari vakeepoo sasari toose ta Yuda yewo vemmbuya ishekaa urukeny lwa Yuda uka masangeny moose venrishisywa 6Womi, vaka, vana na vefu va mangyi na wo nndu yeto Nebusaradany nnini wa vasikari erambikkya Gedalia mwana wa Ahikamu, mwana wa Shafany; amwi na Yeremia nkisuku na Baruku mwana wa Neria. 7Vakasha fika uruka lwa Misri, kya elyi kulaore valeindya unyanga lwa Nndumi Iruva. Vakafika Tapanesi.
8Llyo irero lya Nndumi Iruva lyikasheya Yeremia kulya Tapanesi lyikaamba: 9Ipoo mawe maniini maakony afo, kwaasuruma uteriny-lwa-ikapa-matofali, asurumi yoo mwaangony wa mmba ya usuri ya Farao yefo Tapanesi 10vandu va Yuda veelollye, kwavavia, “Nndumi Iruva wa matorito, Iruva wa Israeli aamba ule: Loleny, nshikeevaanga na iipoo Nebukadnesa mangyi ya Babilony nrundi vakwa, nnyashaa navike kyitima kykwe uwe yam awe yaa shaasuruma, na asheala yeema lyakwe uwe ya vayo. 11Nyashaa nalyamare uruka lwa Misri, na niinge ndwari sheeresi yewo vakwaani iwaawa ni ndwari sheeresi, neepoo mifungwa yewo vakwaani iipowa mifungwa, nawee na usu yewo vakwaani ifwa na usu. 12Nnyashaataa muro mmba ta maruva a Misri; nnyatikoraa na muro na iyeepoo mifungwa; nnyashiilyisaa uruka lwa Misri, sha mwiisi va findo fya ivikkya avivaa makuru. 13Nnyashefishaa ngo ta Heliopolisi tikee urukeny lwa Misri; na mmba ta maruva a Misri nataate muro.”
Currently Selected:
YEREMIA 43: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
