YEREMIA 23
23
Ivika nsia
1Nndumi Iruva aamba; “Woshiny lwa veesi valyamara na inanata moonri a mare akwa!” 2Kweekyo Nndumi Iruva, Iruva wa Israeli aamba indi kya veesi yewo vafurukannyaa vandu vakwa; “Yeni mmulenanata ironda lyakwa, mukalyirishisya kwaasha nta mmulelyilela-fo. Loleny, yeny shikeemusheya kya uravi muletana, ni Nndumi Iruva aamba. 3Llyo eny shishesangyiryaa sasari ta ironda lyakwa uka ngyurukeny yeto shiletinanata, shitiviire miriny ya vayo, ntishefyaa na ikweengyera. 4Yeny nshishesauwaa veesi vatifurukannyaa, nta tilasheereyaa lyingyi nta isaukwa, kuleifo imwi iwiikaa, ni Nndumi Iruva aamba.”
5Nndumi Iruva aamba, Loleny mikonu ikeesha elyi shishemiisya Davidi maa ya usumanu, isheshillya sha mangyi na itana na urango, na ileta na usumanu urukeny. 6Mikonuny yakwe Yuda nnyikyirwaa na Israeli ikee na unapwe. Na irina lyakwa nnyavaangwa: “Nndumi Iruva ni usumanu lweru.
7“Nndumi Iruva aamba; Kweekyo loleny, mikonu ikeesha vandu valakyaamba lyingyi, ‘Shaasa Nndumi Iruva eefo na muu yeto aleuta vana va Israeli urukeny lwa Misri,’ 8Indi vashaambaa; ‘Shaasa Nndumi Iruva eefeo na muu eleende na isalallya ngyeeri ya mmba ya Israeli uka urukeny lwa taari ya ndoo na uka ngyurukeny evaumbutya.’ Llyo vashekaa urukeny lwawo luveni.”
Ukisuku lwa Vakuhani
9Kya vakisuku: Ngoo yakwa nnyiriikkye nnang'ani yakwa,
maffwa akwa moose nnyakeiring'ina;
nshikee sha nnangwa,
sha nndu allyimbwa ni wari,
kyimaruma kya Nndumi Iruva
na kya marero akwe meele.
10Mashika uruka mmbo luisshwe veetusa na veetuswa;
kyeendwa ni kyidengo uruka mmbo lukeeffwa,
na mare a nng'alo nnyammuuma.
Mbony tawo ni uravi na finya tawo nshi ta usumanu-fo.
11“Nkyisuku na nkohani amwi mmballyang'aa,
naakwa ni yefo mmba yakwa shankooya-fo uravi,
ni Nndumi Iruva aamba.
12Kweekyo shia tawo ntishaalukaa kyirendeeya ireeminy,
woombutwa na iwa-fo;
kya elyi shikeeyeende makasha kwawo mwaakeny va ikapwa lyawo,
ni Nndumi Iruva aamba.
13Kwa vakisuku va Samaria
ukasha uniini,
mmbaleawuya fisuku kwa irina lya Baali
vakareta vandu vakwa Israeli.
14Indi kwa vakisuku va Yerusalemu
nsilelollya-fo kyindo kya yeerese nnu:
mmbakeetusa na ilatya marero a wongo;
mmbakeiikara maako a valyamari kuleifo mwiikurya;
woose kwakwa mmbavaka Sodoma
na veekaa va Yerusalemu sha vakavaka Gomora.”
15Kweekyo Nndumi Iruva wa matorito nnyaamba ule kya vakisuku;
“Lola mmbo shivaniingaa kyindo kyivava nnu na ivaaka mura uteri suumu;
mashika uka kwa vakisuku va Yerusalemu utefusu llulekwaana urukeny.”
16Nndumi Iruva wa matorito aamba indi; “mulaarannye marero a vakisuku yewo vakeemwawuya-fo, veemuniinga nsia va ruu; mmbakeeyamba moorya a mirwe yaao veni nshi ooka kaniny kya Nndumi Iruva-fo. 17Wo mmbavyaa yewo vakeiipala irero lya Nndumi Iriva sheelyi, ‘kyivaa kippwa kyany’; na kwa wo nndu alatyaa umbafu lwa nrima wakwe, vakaamba, ‘Nkwiifo ukasha lukukooyaa-fo.’”
18Mashika, ni wovi alesalala shileny ya Nndumi Iruva
naranngwe naarannye irero lyakwe
ao ni wovi aleindya na yaarannya irero lyakwe?
19Loleny ngova ya Nndumi Iruva!
Nyashi yammiisshwa,
nnyikeetita-si kyuumu;
nnyiriikkyaa mirweny ya varavi.
20Ngoo ya Nndumi Iruva nnyitiyyaa-fo
fika yatana na imaa fya makusaro a nrwe wakwe.
Mikonuny ya mafurumyony musheimanyaa nisha.
21“Yeny nshileruma vakyisuku-fo,
lyo mmbaleenda veerishaa;
Yeny nsherera nawo-fo lyo vakaawuya fisuku.
22Indi kwakooya lyo vesalala shileny yakwa,
vevambisaa marero akwa kwa vandu vakwa,
vemanya ivaiduta woke shieny tawo ta uravi
na mitannyiny yaao ya uravi.
23“Nndumi Iruva aamba; Yeny ni Iruva shikee kufii nta nshi Iruva shikee kwaasha-fo. 24A ndesa nndu ashiidimaa ikusuruma ando kwa kyisurukumu naambo shilallollye? Ni Nndumi Iruva aamba. A shiishurye-se ngyina na uruka? Ni Nndumi Iruva aamba. 25Yeny shammiita yekyo vakisuku vaamba, yewo vakeyaawuya fisuku fya wongo na irina lyakwa veeshaamba, ‘Shammorya, shammoorya!’ 26A nkivaa indo kufike indii wongo lukaa miriminy ya vakisuku yewo vakeeyawuya fisuku fya wongo ureti lwa mirima yaao, 27yewo vakusarye yeengye vandu varekkywa irina lyakwa kya moorya vakeevia umwi na ungyi, fika sha vamiku vawo verekkywa irina lyakwa kyeendwa ni Baali? 28Nkyisuku atiri yoorya navambise yoorya lyakwe, lyo yeto atiri irero lyakwa nalyaambe shaasa kyikwaani. A ndesa muulu mmbwiinani na nganu? Ni Nndumi Iruva aamba. 29Nndumi iruva avesa; A irero lyakwa nshi llyikee sha muro, lyikavaka kyiria kyifishaa ngyina fiparwefiparwe? 30Kweekyo lola, Yeny shikee kyilasha kya vakisuku, ni Ndumi Iruva aamba, yewo vavyaa wo umwi na amrasa wakwe marero akwa. 31Lola, Yeny nshikee kyilasha kya vakisuku, ni Nndumi Iruva aamba, yewo veepoo ngyulumi tawo vakaamba, ‘Ni Nndumi Iruva aamba.’ 32Lola, yeny mmbo shikee kyilasha kya yewo vaawuya moorya a wongo, ni Nndumi Iruva aamba, yewo vavia vandu vakwa na ivapaaya na wongo na ikurosa lyawo, kulare shilevaruma nta ivavavasa; kweekyo mmbalewonisya usha lumwi vandu yeva-fo, ni Nndumi Iruva aamba.”
Irryo lya Nndumi
33“Elyi umwi va vandu yeva ao nkisuku ao nkohani akuvesaa, ‘A iryo lya Nndumi Iruva ni kyokyi?’ Yewe nkushevaviaa, ‘Yewe ni iryo lya Nndumi Iruva, na yeny nshikekweera kwaasha, ni Nndumi Iruva aamba.’ 34Na kwa nkisuku ao nkohani ao nndu umwi wa vandu ashaamba, ‘Iryo lya Nndumi Iruva,’ yeny nshikapaa nndu yeto na mmba yakwe. 35Yewe nkushaambaa, wo nndu na amrasa wakwe, wo nndu na mwanamaaye, ‘A Nndumi Iruva nnyarouwa inda?’ Ao ‘Nndumi Iruva nnyarera kyokyi?’ 36Indi lyo, ‘Iryo lya Nndumi Iruva’ nkulyisendaa lyingyi-fo, mashika iryo ni irero lya wo nndu, na yeni mmulealasha a Nndumi Iruva eefo na muu. 37Nkuvia nkisuku indi, ‘A Nndumi Iruva nnyaamba kyokyi?’ 38Indi kwakooya kwaamba, ‘Iryo lya Nndumi Iruva,’ ni Nndumi Iruva aamba, mashika mmulerera marero yaa, ‘Iryo lya Nndumi Iruva,’ elyi sheruma kwany, shaamba, ‘Yeni mmushaamba, Iryo lya Nndumi Iruva,’ 39kweekyo loleny, ‘Yeny nshishemwiipoo shu shimweere kwaasha na usangu lwakwa, yeni na muri shemuniinga yeni na vamiku vany. 40Neeny shimweengyee yiipalwa na sony ilarekyiwaa.’”
The Holy Bible in Kimashami © Bible Society of Tanzania, 2016.