YEREMIA 2
2
Uringyi lwa Iruva kwa Israeli
1Irero lya Nndumi Iruva lyikashisheya, 2Enda kwavia paa vandu va Yeresalemu sheelyi, Nndumi Iruva mmbo aamba indi, “Mmbo shikumbuye usaari lwafo llya kweekee nkoo,
na shaasa kweshikundye sha tindi yafo,
kwiishisora nakwa nkasa koomu,
urukeny lulandevaaywa mbeu.
3Yewe Israeli mmbo kweekee mweele kwakwa,
Mmbo kweekee fimu fyakwe fya mbee.
Valya woose vekupaana neewo velya vakalyamara; vakawoywa ngapo. Ni yeny Nndumi Iruva shaamba.”
Ulyaamari lwa vakuku va Israeli
4Aranyiny irero lya Nndumi Iruva, yewe mmba ya Yakobo,
na ngyeeri ya mmba ya Israeli.
5Nndumi Iruva mmbo aamba indi,
“A ni ukasha lwa ngata kyi vamiku vany vekooya
kwakwa naakwa vanderishya kwaasha neeny
vakendelatya maruva a tangalu, vakaaluka tangalu sha-fyo.”
6Nta mmbalekuvesa, “N-kwi Nndumi Iruva akai,
yeto alelwaauwa urukeny lwa Misri,
kalusongoya kulya kasa koomu,
uruka lwa mawe, nsanga na marina,
urukeny wuumu kany na ireema yuu piti,
uruka luleerwaa mmbandu,
nta nndu akaa-fo?
7Mmbo shilemweende urukeny uviiri,
muwuure ndunda ta vayo na findo fya vayo fisha.
Indi mukyaafukya-fo mukatefusa uruka lwakwa
na iyaallwa sha kyirashi dingu yeyo yakwa shemuniinga.
8Nta vakohani mmbalekuvesa,
‘N-kwi Nndumi Iruva akai?’
Veesalallya mavavaso vakashirekwa;
Vasongoru nawo vakashikapa mungo;
Vakisuku nawo vakaawuya fisuku na irina lya Baali,
na iindya mafwanu alatiri mbusha.”
Mwaandu wa Nndumi Iruva na vandu vakwe
9Nndumi Iruva aamba, kweekyo yeny mmbo shivakyanaa neeni, naakwa ni vashuku vany nshivakyana nawo. 10Naasa ruukeny kwakulya ya yeeve mundefika Kipro mulollye, ao rumeny mmbandu vafike Kedari neese na waantu; lola kwakooya kulenkaa-fo kyindo sha yekyi, 11Kulenkaafo isanga lyilemmaalasha maruva a vayo, naakwa neelyi alakee maruva? Lyo vandu vakwa mmbo valealasha itumbe lyawo na kyindo kilatiri mbusha. 12Ising'ang'eny, yeni ngyina kya mbony yei matukeny, mamikeny deny; ni Nndumi Iruva aamba. 13Kimmba vandu vakwa valetana ngyulyamari ivii: mmbo valeshikapa mungo, usoka lwa mura wa muu, na isuma firori fyawo, firori fidoshikkye filashiidima itira irony lya mura.
Ndunda ta uravi lwawo
14“A Israeli ni ishinga? A nyakee mwana wa ishinga? A nkimaruma-ki elyi akeelyinngywa? 15Mmbo miiso tikeedina kyakwe, ntikeedina kyuumu. Ntanreta uruka lwakwe; miri yakwe yammaaluka sama; ilatiri vandu. 16Kya mmwasi, ni vandu va Memmfisi na Tapanhesi valefishafisha ureto lwa nrwe wany. 17A nshimulekweengye muveni ngatara yei mukyikapa mungo Ndummi Iruva, Iruva waany, llya evasongoya yefo shia? 18A ulaalu nkyokyi mwawonisa-u elyi mweenda Misri, ni indena mura wa Naili? Ao ni mbusha-kyi mwawona yeenda Ashuru, ni indena mura wa Frati? 19Uravi lwafo kumuni llo lushekukapaa, na elyi kuleshikapa mungo nkishekuukya uvingo. Manyisywa na ilolya sheelyi ni uravi na uvavisi kwany ikapa mungo Nndumi Iruva, Iruva waany; ishiindya llyikee nnang'ani yaany-fo, ni Nndumi Iruva, Iruva wa matorito aamba.”
Israeli alema iindya Nndumi Iruva
20“Uka kyeeri kyaasha, mmbo kulenfisha yookyi na iporommwa fyoove fyafo; na kwaamba, ‘Yeny nshikyifurukanaa-fo.’ Yee, uwe ya wo kidooro kyaasha na sindeny ya wo nri mmbisi nkwetuuswa sha isonga. 21Naakwa ni indo, mmbo shilekuvaaya nsabibu nsauwe, nsha wa mbeu ilakeeshikape. A ni inda kulefuluka na iwa nsabibu wa ngoroshony? 22Naakwa kwakusangya na mmbala na irewekwa sabuny, iparanga lya uravi lwafo llyishuuka mbee yakwa-fo, ni Nndumi Iruva, Iruva aamba. 23A nkushidimaa yaamba inda, ‘Yeny nshilekutefusa-fo, nshilelaty Mabaali-fo.’ Lola shia yafo kulya imungony; manyisywa yekyo kuletana nkukee ngamula shaangu wuyany irisha na shia ta vayo, 24yewe mmbo kuvakye nshungu wa ngoroshony uishivye kasa koomu, ufuraa mmbwa kya yoomwa uraato nkuka! A mmbi ashiidimaa ibaaya lango tafo? Nkwiifo nndu moose akutinnywa akwaarisaa-fo; kwa mwiiri wakwe mmbo ankooya. 25Kuleende kularee fyaaru nta kulare ikoro lyafo lyaakuke-fo. Indi nkuleamba, ‘Ni ruu, mashika shilekunda veny na yeny mmbo shivasoraa.’”
Israeli nkuti nakapwa
26“Shaasa inyinyi lyisukaa elyi lyatirwa, ni indo mmba ya Israeli ishetirwaa ni sony: wo, vamangyi waawo, vasongoru vaawo, vakohani vaawo, na vakisuku vaawo, 27yewo vavia nri, ‘Yewe nkukee nde wakwa, na iwe, ni yewe kushiwonnye.’ Kimmba mmbaleshikapa mungo ando a ishisora. Lyo kyeeri kya ukiva lwany mukaamba, ‘Salala kwalutarama!’
28“Alee, nkwi maruva any akai, alya mwesongosya? Asalaleny, kwakooya ashiidimaa imukyira, kyeeri kyany kya ukiva; mashika shaasa miri yaany ikee miingyi ni indo maruva any affye, yee Yuda. 29Nkyiki deny elyi kwashikunung'unnya? Moose mmbo muleshikaba mungo, ni Nndumi Iruva aamba. 30Nshilekaba vana vafo nta nkileekya-fo, mmbalesongovika-fo; usu lwafo kumuni llulewaa vakisuku vafo sha miiso irattwaa. 31N a yeni, yee ngyeeri ya vandu, arannyiny ni irero lya Nndumi Iruva. A yeny mmbo shileva kasa koomu kwa Israeli, ao uruka lwa ireema yuu piti? A nkyokyi yekyi kyeengye vandu vakwa vakaamba, ‘Lwammba valeke, llukyishaa lyingyi kwafo?’ 32A ndesa nkaa nkoo ashidimaa irekywa fipulyi fyakwe fya saabu ao nka wa walyi isara lya walyi? Lyo yeni vandu vakwa mmbo muleshirekywa ando a mikonu ilavaa yeekyena. 33A ni kyisha inda mulesongosya shia tany ta iruuya vakunde! Indo naakwa ni vaka varavi nkwambalosha shia tafo. 34Naakwa nsoori tafo mmbo tifwani samu ya vakiva valatiri mbese; nta nshi kulevakooya veeshiivaa-fo. Sanda na findo yefi fyoose, 35nkukeeyaamba, ‘Nshitannyi ukasha lumwi-fo; ni kya dede nyashi yakwe yammuuka kwakwa.’ Lola, Yeny nshishekuutyaa uvingo kya elyi kwaamba, ‘Nshilelyamara-fo.’ 36A ni inda kuraaraa kwishaalwa mariko afo! Mmbo kusutwa ni Misri sha llya kwesutwa ni Ashuru. 37Na ukafo-da kusheshaa kwivikkye maako nrweny, mashika Nndumi Iruva allema yewo kuvavikye nsia, nta nkuwona iviiri kwawo-fo.”
The Holy Bible in Kimashami © Bible Society of Tanzania, 2016.