YEREMIA 1
1
Yeremia
1Yeti ni mbony ta Yeremia mwana wa Hilikia ulya ekee umwi wa vakohani va muri wa Anatoti wa uruka lwa Benyaminy. 2Na Nndumi Iruva mmbo alerera na Yeremia mwaaka wikee wa ikumi na kararu wa ushilyi lwa mangyi ya Yuda Yosia mwana wa Amon. 3Nawe Nndumi Iruva karera lyingyi na Yeremia kyeeri Yosia mwana wa Yehoyakimu ekee mangyi ya Yuda. Yeremia keengerase ivariya marero auka kwa Nndumi Iruva, fika masiyyony a mwaaka wa ikumi na lyimwi wa ushilyi lwa mangyi Sedekia mwana wa Yosia. Mwaaka yeto-da mwiiri wa karaanu llyo vandu va Yerusalemu valekamarwa ushingeny.
Uvaango lwa Yeremia
4Nndumi Iruva mmbo eshivia Irero lyakwe ule, 5“Kulaore kwenraamiswa mmbo sheekwishi, kulaore kwemmbonika mmbo shekusauwa, nshilekuvaanga kuve nkisuku masangeny.” 6Sharouwa shaambaa, “Woi Nndumi Iruva, nshiishi irera-fo, mashika mmbo shikee n-du.” 7Kyeendi Nndumi Iruva kashivia, “Kulasheamba, nshikee n-du-fo, nkuti kweende kwa vandu nkurumaa kwawo, kuvavie wo kindo nkuvyaa. 8Yewe kulaereye vandu yevo-fo, kimmba mmbo shikee neewe nkuringe. Ni yeny Nndumi Iruva shaamba indo!” 9Nalyo Nndumi Iruva kaorrwa woko lwakwe kapaana kana kyakwa, kashiivya, “Lola mmbo shavika marero akwa kaniny kyafo. 10Inu mmbo shakuningaa wiidimi uwe ya vandu na vamangyi, kuwe na wiidimi lwa iillwa, isambwa, ilyamara na imamita deny, wiidimi lwa itana na ivaaya.”
Filya Yeremia Aleorwa
11Irero lya Nndumi Iruva lyikashisheya, “Nkyoki kulollye Yeremia?” Neeny shammbya, “Nshilollye urungo lwa nlosi.” 12Nndumi Iruva kashivia, “kwanlollya songosiny, yeny mmbo shikudeesye isalallya irero lyakwa lyiinukye.” 13Irero lya Nndumi Iruva lyikarera neeny lya kavii lyikaamba, “A nkyokyi kulollye?” Neeny shammbya, “Mmbo shilollye nungu ikeerura nayo mmbo ikwiinyikkye na kunu shikai yuuka na kwandoo.” 14Nndumi Iruva kashivia, “Urumato mmbo lupooka luuka taari ya ndoo lusheye vandu woose va uruka yelu. 15Mashika mmbo nkevaanga ngyumangyi toose tishe. Vamangyi vawo mmbo vashereiyaa fitima fyawo yoo mwangony wa Yerusalemu vaveuringitya riti, sanda na miri ingyi myoose ya Yuda ishingillywa. 16Na yeny mmbo nshevautyaa uvingo kimaruma kya utefusu lwavo lwa ishikashikapa mungo, vakarasya maruva a wongo, vakaindya mafwanu valesongosya veni. 17Indi ulaalu, yewe Yeremia kudeesye kwipoo kwandevavia wo kindo shakuruma. Nta kulavaireye-fo shilasheekwallwa irosho mbee yawo. 18Na Yeny, lola, Yeny mmbo shakwaallwa kuvake muri ukee mwiikare na ngo ta minya na isimamba lya arera kyilasha kya vamangyi va Yuda, vasongoru va vayo, vakohani va vayo na vandu woose urukeny. 19Mmbo washekapanaa neewe, kya indi mmbakuvingaafo, mashika mmbo shikee neewe shikukire, Ni yeny Nndumi Iruva shaamba indo.”
The Holy Bible in Kimashami © Bible Society of Tanzania, 2016.