VALETI 6
6
Gidion
1Naasa vana va Israeli vakawuya itana lyingyi meesi mbee ya Nndumi Iruva, nawe Nndumi Iruva kavavika maakony a Vamidian ando a myaaka mfungare. 2Vamidian vakatira finya ngota Vaisraeli. Nawo Israeli vakasuma mindeshe ya yoovya kimaruma kya yiirya Vamidian. 3Naasa kyeeri Vaisraeli vemmaaivaaya fimu fya maremeny Vamidian na Vaameleki na vengyi va taari ya ngama vakarwa 4vakashekudeesya indelyamara fimu efyo vakamaa fyoose fika Gaza, valare-fo kindo efo Israeli, nta ng'umbe nta mburufo. 5Mashika mmbo valerwa na ng'umbe na mburu na meema, vakava sha nrie shaasa vekee veengyi, wo na ngamula tawo mbevaa yeekyena-fo. Nawo mmbo valerwa tupu, ishelyamara-fo. 6Israeli vakafotwa nnu ni Vamidian, nawo vakafuuya Nndumi Iruva.
7Naasa va Israeli veekifuuya Nndumi Iruva kimaruma kya Vamidian 8Nndumi Iruva karuma nkisuku neende kwa vana va Israeli, nawe kavavia, Nndumi Iruva wa Israeli aamba indi, “Yeny mmbo shilemusaamisa shimuute kulya Misri mmba ya ushinga. 9Shamwondwa maakony a Vamisri na kwawo yewo vekeemufota Yewo woose mmbo shilevaumbuta wooke mbee yaany, neeny shamuniinga uruka lwawo, 10Neeny mmbo shilemuvia yeni, ‘Yeny ni Nndumi Iruva waany, mulasheetira maruva engyi, a Vaamori yewo mukee nawo-fo. Lyo mmulearannya unyanga lwakwa-fo.’”
11Naasa nsu wa Nndumi Iruva kandekaa rembo sindeny ya nri wa Yoashi alya Ofra, na nri yeto ni Yoashi Mwabieseri, na mwana wakwe Gidion mmbo ekeela nganu efo kari kirisi naambo Vamidian valalollye. 12Naasa nsu wa Nndumi Iruva kasheya Gidion, kammbia, “Ewe nsero nkaari! Nndumi Iruva mmbo akee neewe.” 13Gidion nawe kamwallwa kammbia, “Ale Nndumi Iruva wakwa, elyi Nndumi Iruva akee neese da nkyiki elyi lulewoyo ni makiva yaa moose? A mashora akwe a finya nkwi akai, alya vande veru valeluvia veshaammbaa, ni Nndumi Iruva alelurosa aluuta Misri. Lyo ulaalu mmbo allura kaluvika maakony a Vamidian.” 14Lyo Nndumi kallola kammbia, “Enda indo shaasa kukai, kundeauwa Israeli maakony a Vamidian, ni yeny shikeekuruma.” 15Gidion kammbia, “Ale Nndumi Iruva, mmbo nshidimaa inda ikira Israeli? Na vandu vakwa mmbo vakee vakiva deny efo ufyariny lwa Manase, neeny mmbo shikee n-du wa woose efo kwa nde.” 16Naasa Nndumi Iruva kammbia, “Yeny mmbo nshekukayaa, kukabe Vamidian sheelyi kukabaa nndu umwi.” 17Nawe kammbia, “Naasa Nndumi Iruva kwakooya kwanshisauwa, shoora wende-te mmbee, lushisununndye efo kwarera neeny.” 18Kavia nsu ulya, “Mmbo shakutereva kuleende mbele-fo, kutani nkweenngye simbo yakwa.” Nawe kammba, “Kweenngye kusheshikooyaa yaa kweni.” 19Nalyo Gidion kaanga na mmba kandedeesya ngurana ya mburu, na mikate ilatiri ntarang'o, kavika nyama ilya ya mburu kikapuny, na supu kaivika nunguny, kamweenngye yoo boo sinde ya nri. 20Nsu ulya wa Iruva kammbia “Nkye iboo nyama yei na mikate yei kuivike yaa lveny-nyelyi kufipusuye na supu yei.” Nawe katana indo. 21Naasa Nsu ulya wa Nndumi Iruva kabaana nyama ilya na mikate ilya na nsenngye yeto eerye wokony, llya atana indo muro ukooka kulya iveny lyilya ukamamita nyama na mikate ilya. Nsu ulya wa Nndumi Iruva kookau nalakillollyese.
22Kive indo llyo Gidion alemanya deny yeto ni Nsu wa Nndumi Iruva Gidion kaammba, “Oshiny lwakwa, woi Iruva Nndumi Iruva! Elyi shalollya Nndumi Iruva na miso.” 23Nndumi Iruva kammbia, “Ufoo lukukaye, nta kulairyae-fo, mashika nkufwaa-fo.” 24Naasa Gidion katanya-u Nndumi Iruva kitara kyeerasya, kaivaanga, Yehova-shalomu#6:24 Yehova-Shalomu: Nndumi Iruva ni Ufoo. Nayo ekakayo iiyo fika inu kulya Ofra ya Waabieseri.
25Naasa kio ekyo kyeni Nndumi Iruva kashevia Gidion, “Iboo ngoleta ya ndoo, imwi ngoleta ya kavii ya myaaka mfungare, kuterwe kitara kya Baali kyeerasya ekyo ndoo atiri, kurummbwe na iruva lya kyika Ashera lyiwe si.” 26Yoo kitara kyeerasya Baali kyeekai tannya-u kitara kiniini kyeerasya Nndumi Iruva wafo, na ngoleta ilya kuyuutyeny kiraso kwa Nndumi Iruva na Ashera ilya ive nnyo ngwi ta muro. 27Naasa Gidion keeboo varundi vakwe ikumi natane shaasa Nndumi Iruva alemmbavasya, lyo kimaruma kya yiiryaa vandu va muri ya ndeye na va muri ulya nalatane efyo nsanyiny, katana indo kio. 28Nalyo kyeeri vandu va muri valekuboo ngama shuru vakakooya ate kitara kilya kyeerasya Baali nkiwunndwe na Ashera nayo nnyikiiyo-fo, na ngoleta yamuutwa kiraso kitareny kilya kiletanwa. 29Vandu valya vakakuvesa veni, “A nyira mmbi yeu aletana indi?” Kyeeri valeruuya runya ivesa vakashevio ni Gidion mwana wa Yoashi mmbwe aletana kindo ekyo. 30Naasa vandu va muri vakavia ndeye Yoashi, Ende mwana wafo Gidion nafwe “inu, mashika elyi alesammbwa kitara kya Baali neerumbwa Ashera ilya yeeiyo.” 31Yoashi kavia vandu valya vekeerukana nawe, “A mmbo mukeekabannya baali-ro? A mmbo mukunndye inkira? Yeto ashekabannyaa Baali na waawa ngama yei sheni, kwankooya we ni Iruva nakukabannye we muni, mashika ni nndu umwi asammbwa kitara kyakwe.” 32Naasa vakafishya Gidion Yerubaali uka nkonu yeto, nkyo kyaammba Baali nawaane nawe muni, mashika elyi asammbwa kitara kyakwe.
33Kyeeri ekyo kyeni Vamidian na Vaameleki na vandu yewo vataari ya ngama vakakuummbya vakashemannya ulale alya imungony lya Yesreeli. 34Mumuyo wa Nndumi Iruva ukasheya Gidion nawe kakaba iranda, na vandu va ufyari lwa Abieseri vakansora. 35Naasa karuma vandu vakwaane efo ufyariny lwa Manase koose. Nawo-da vakasha insora, karuuyase va ufyari lwa Aseri na va Sablon na Naftali, nawo-da vakarwa ishembinngya.
36Naasa Gidion kavia Iruva, Kwankooya dede yewe kushekiraa Israeli na woko lwakwa shaasa kuleammba, 37ulaalu mmbo shivikaa isara lya yoonri yoo boo, na kwankooya isara elyo yeni llyo lyishewoyoo llaura, lyo summbai yo iveshuumu, naasa llyo nshemanyaa dede kukiraa Israeli na woko lwakwa shaasa kuleammba. 38Nakyo mmbo kileva indo dede. Gidion mmbo alekuboo ngama shuru kakama isara llya nalyo lyikooka mura bakuri shapu. 39Naasa Gidion kawuya kavia Iruva, “Mmbo shakutereva nnu, kulasheetirwa ni unyafi kimaruma kyakwa, kushaara mmbee summbai shoose iwoyo llaura na isara lyo yeni lyisaaunye elyi lyimwi-nsi, mmbo shakutereva shilole lyingyi isara elyi, Ulaalu lyiikee yuumu.” 40Nawe Iruva katana indo kio kilya, mashika ni isara llya yeni lyeekee yuumu na summbai ikava laura shoose.
Currently Selected:
VALETI 6: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
