VALETI 5
5
Kyiimbo kya Debora na Baraka
1Naasa llyo Debora na Baraka mwana wa Abinoam valeimmba kiimbo kyawo, vakaammba,
2Kimmba vasongoru valesonngwa kunu Israeli,
Na vandu nawo vakakuvika-u na nrima moose
Ng'aniseny Nndumi-te.
3Arannyiny-te yeni vamangyi,
neeni vasongoru looteny maarwi
Yeny mmbo nshiimmbyaa Nndumi Iruva
Shing'anise Nndumi Iruva, Iruva wa Israeli
4Kyeeri Nndumi Iruva alooka Seiri,
Llya kulooka Edomu kweenda fireny
uruka mmbo lulererema, na ngina tikoolota mura
Yee, mafishi mmbo aleolota mura
5Na mafumbu akaeka mbee ya Nndumi Iruva
Yee naakwa Sinai yoo mbee ya Nndumi Iruva wa Israeli.
6Kyeeri kya Shamgari we mwana wa Anati
Kyeeri kya Yaeli, shia niini nteetiri vandu-fo
7Vashilyi mmbo valemanda kunu Israeli, yee vakamanda,
Kutani elyi yeny Debora shilekwiiboo
Shakwiiboo yeny nka kunu Israeli
8Vakasauwa maruva a wongo
Nato fira tikavasora
A kulelollyo-fo nta ngao ao ifumu?
Efo fikuny makumi aana fya Israeli?
9Nrima wakwa mmbo ufurye na vashilyi va Israeli
Yewo valekuvika-u na nrima umwi nsi
Ng'aniseny Nndumi Iruva-te.
10Sye kwaaniseny mbony koose, yeni musaammye mishungu myaa.
Neeni mukee mmba shaale findo fimamiri
Neeni mukeenda na marende.
11Mulakee sheewo varye mife, na ando eeraiya mura
Yoo ng'ung'u vashekwaanisaa mbony ta mashora a usumanu a Nndumi Iruva
Yee mashora akwe a usumanu eeshillya kunu Israeli
Llyo vandu va Nndumi Iruva valeserikya yoo mwaangony.
12Kwiipoo, kwiipoo Debora
Kwiipoo, kwiipoo immba kiimbo
kwiiboo Baraka, iboo yewe kulekamarwa mifungwa
Valya valekukamara mfungwa, Yewe mwana wa Abinoam,
13Llyo valya valesaa-fo valesoka
Nawe Nndumi Iruva kooloka nashekabannya yewo vakaari
14Ukaa Efraimu mmbo valesoka vauka kwa Vaameleki
Yoo numa yafo yewe Benyaminy, efo vanduny vafo,
Na vashilyi vakasoka vauka Makiri
Na vauka Tabulon ni yewo varye nsengye wa mwiireiya,
15Na vasongoru va Iskari veekee ando amwi na Debora.
Shaasa Iskari eekai niindo na Baraka.
Vakaoloka na imungony veerishyaa
Efo ngyusokeny ta Rubeny
Efo nrimeny kukaafo kiteve kiniini
16A niinda kulekaa efo mfiriny wa moonri
Kwaarannya fivale efyo fyeevaanga maronda yoo?
Efo ngyusokeny ta Ruben
Efo nrimeny kukava-fo kiteve kiniini.
17Gileadi mmbo alekaa kwakulya ya Yordan.
A Dani we nkyiki elyi alekaa efo yeeveny?
Aseri we kamalallya sau yoo mwaangony wa yeeve,
Kakaa yoo mundiny wa vayo
Sablon wo vakakaa nrengeny kindo kyamaa ifwa
Nawo Naftali vakakaa ando a kyaandaany.
18Vamangyi mmbo valesha vashekapana fira
Nawo vamangyi va Kanaani vakaipoo fira
19Kulya Taanaki mureny wa Megido
Mmbaleonisau mbusha ya fesa-fo.
20Vakakabana wooka iruveeu
Nyinyiri ta iruveeu tikakabana na Sisera
21Mura wa Kishoni ukaveenga
Mura ulya wa kasha, to Kishoni
Ewe nrima wakwa, kaarya yeenda na mbee
22Llyo mbungashu ta mburu tilevavara
Naambo tisirye-sirye
Isirya sirya lya yewo vatiri finya
23Nsu wa Nndumi Iruva kaammba, Dengeny Merosi
Dengeny vandu va vayo deny
Kimmba kulore valesha yeekya Nndumi Iruva
Yeekya Nndumi Iruva kimaruma kya vaafinya yewo.
24Yaeli navikyo mbora ngota vaka woose
Niwe nka wa Heberi, Mkeni
Mmbo avikyoo mbora ngota vaka woose kwa vandu
25Mmbo aleterewa mura, kaniingya malela
kanniinga na mafura akee kiiyeny kisha.
26Koorwa woko lwakwe katira kyaasi,
Na woko lwakwe usha lukatira kiria kya muni
Kakaba Sisera na kiria ekyo, karrwa nrwe wakwe
Yee, mmbo alenkaba kadosha kisangu
27Kawa si yoo marendeny, kafwa
Yee kawa yoo marendeny akwe.
Yoo alekwiinyika ng'ng'u alewa kafwa.
28Mmbo aleamaiya idirisheny kaiya
Maye wa Sisera mmbo aleyya yoo idirisheny
A nkyiki elyi ikari lyakwe lyakyeeyo isha?
Na fireto fya vayo filakeesha?
29Vakyeku vakwe varango vakarouwa
Yee, kakurouwa we muni
30A valetirase mifungwa na yaava uraa?
Kishinga ao fivii wo nndu kawonisa?
Kwa Sisera masara a fwana shiingyi
Uraa lwa masara a fwana shive na shive,
Na fwana ta taari i vii.
Yoo singony ta mifungwa yeyo.
31Vakiduva vafo woose Nndumi Iruva vavemamika
indo woi Nndumi Iruva.
Lyo yewo vakukunndye vave sha nkyeere kyeeri
ukeefuma na finya ya vayo ya sa
Nalo uruka lukaona ufoo ando a myaaka makumi aana.
Currently Selected:
VALETI 5: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.