VALETI 11
11
1Naasa kweefo nndu umwi nkaari wa ufyari lwa Gileadi, irina lyakwe ni Yefta, maaye mmbo ekee nka wa shia na ndeye ni Giliadi. 2Ndeeye Gileadi, nawe mmbo eetiri vana vengyi va nka wakwe. Nawo vana yewo vakwe elyi valengana vakavia Yefta, “Yewe nkutiri ding'u yaa kwa ndeeru-fo, mashika mmbo kukee mwana wa nka ungyi.” 3Llyo Yefta karishafo nalakikaese na vana va ndeeye, keenda uruka lwa Tobu. Na vandu vafiri vakeenda veeriani na Yefta.
4Elyi numa vana va Amoni vakashekabana na Israeli. 5Na kyeeri valekabana nawo, vasongoru va Gileadi vakandeonndwa Yefta kulya urukeny lwa Tobu. 6Vakammbia, “Osho-te yewe kulusongoye lundekabana na Vaamoni.” 7Yefta kavia vasongoru yewo va Gileadi, “A yeni nshi muleshiswa mukashifuna efo mmba ya ndeyaakwa? Mmbo kyavaany inda ulaalu isheshisora kyeeri mutiri ukiva?” 8Vasongoru yewo vakavia Yefta, “Yee, ulaalu kimaruma kya ukiva llyo mirima yeeru yakuwuiya yewe naambo kweende neese indekabana na Vaamoni. Neewe mmbo kushevaa nsongoru weeru efo ufyariny lwa Gileadi loose.” 9Naasa Yefta kavavia, “Kwakooya ulaalu mukeeshiviira kweru naambo lundekabana na Vaamoni, na kwakooya Nndumi Iruva avafuna mbee yeeru, ndesa nshevaa yeny ni nshilyi waany?” 10Vasongoru va Gileadi vakammbia, “Yee, na Nndumi Iruva mmbwe yeto akee nkureeki weeru, neese nkuti lutane indo.” 11Naasa llyo Yefta alekupoo na vasongoru yewo va Gileadi, na vandu va Gileadi vakambika nniini waawo, kava mangyi waawo, Yefta karera nawo ekayo ni Nndumi Iruva efo Mispa.
12Naasa Yefta karuma vandu veende kwa mangyi ya Vaamoni, kaammba, “Nkyoki kikutiri neeny kutani kwashisheya ishekabana na vandu vakwa?” 13Mangyi wa Vaamoni kavarouwa, kaammba, “Mmashika elyi Vaisraeli valetira uruka lweru kyeeri kilya valeuka Misri, pookya Arnoni fika Yaboki na fika Yordan. Naasa ulaalu viiran uruka yelo noofoo.”
14Nawe Yefta karuma vandu lya kavii vee nde kwa mangyi ya Vaamoni, 15Kammbia, “Yefta akuvia indi, Israeli mmbaletira uruka lwa Moabu nta uruka lwa vana va Amon-fo,” 16lyo kyeeri Israeli valesaama wooka Misri nawo vakashefika kasa ka Yeeve ya Siria, neefika Kadeshi, 17llyo Israeli valeruma vandu kwa mangyi ya Edomu, vakaammba, “Mmbo shakutereva-dwa kushiniinge muumu wa yiira urukeny lwafo, Lyo mangyi ya Edomu kalema. Na mangyi ya Moabu, kalema. Naasa Vaisraeli vakakaa mbele alya Kadeshi.” 18Naasa vakaringitya kasa ka Edomu, na Moabu vakakaa taari ya Arnon vakamanya ulale fika nnyanu wa Moabu. 19Naasa Israeli vakarumbo vandu kwa mangyi Sihoni wa Vaamori, na mangyi ya Heshboni, Israeli vakammbia, “Mmbo lwakutereva kuluniinge mumu lwiire urukeny lwafo sheende kwakwa.” 20Lyo mangyi Sihoni nnyalevairikya-fo, lyo Sihoni kasang'irya vandu vakwe woose kulya Yahasa naambo vakabane na Israeli. 21Nndumi Iruva, Iruva wa Israeli kavika mangyi Sihoni na vandu vakwe maakony a Israeli vakavakaba, nawo Vaisraeli vakatira uruka lwa Vaamori. 22Vakatira uruka elo lwa Vaamori loose uka Arnon fika Yaboki na kasa eko fika Yordan. 23Naasany Nndumi Iruva, Iruva yeto wa Israeli mmbo asoka Vaamori uruka elo vare valalollyo mbee ya Israeli. A yewe mmbo kukunndye ivakaya? 24A yekyo iruva lyafo lya Kemoshi lyilekuniinga mmbo kilakufye? Neese ekyo Nndumi Iruva wa Israeli ammulemaa nooke mbee yeeru mmbwe yeto lushenshillyaa, 25A ndesa yewe mmbo kukee nsha ngota Balaki mwana wa Sipori yeto wa Moabu? A we aleidimany isalala mbee ya Israeli neekabana nawo? 26A nki kyeema mulaidimi isoka Vaisraeli miri ya Aroeri na Arnoni na Heshboni nafo mmbo valekaafo ando a myaaka mayana araru? 27Lyo yeny nshalekutannya ukasha-fo, ni yewe kukeeshitannya kya kiila elyi kwakunda ikabana neeny. Nawe Nndumi Iruva yeto akee Mwiileta kya dede nave mwiirummbwa kya Israeli na Vaamoni inu. 28Lyo we mangyi ya Vaamoni nalaite marero a nrumi yeyo Yefta alenrummya.
29Naasa Mumuyo wa Nndumi Iruva ukasheya Yefta nawe keera efo urukeny lwa Gileadi na lwa Manase na Mispa ya Gileadi, na Mispa ya Gileadi kandekooya Vaamoni. 30Naasa Yefta kavikya Nndumi Iruva kyaasa, kaammba, 31Nndumi Iruva kwakooya kushevikaa Vaamoni maakony akwa elyo shivingaa, ekyo kishuukaa efo kyeny kwakwa isheshaammbya elyi shammbona urilalyi, ekyo mmbo nshekyuutaa kive kiraso kwa Nndumi Iruva kyeekora na muro. 32Naasa llyo Yefta aleruuka kalatya Vaamoni nandekabana nawo, nawe Nndumi Iruva kavavika maakony akwe. 33Kavakaba abookya Aroeri fika Miniti, miri makumi avi myoose na fika Abel-keramim, vakafwa vandu veengyi. Niindo Vaamoni valevingwa ni Vaisraeli.
Mmfu wa Yefta
34Veekimaa ivinga Yefta kawuya na kyeny kwakwe efo Mispa na mwana wakwe wa kyika kashemwaammbya. Kakaba ngoma neefina mbasa, nawe Yefta nneetiri ungyi-fo, nta wa kyuumi ao wa kyika-fo. 35Yefta eekilollya indo kasokyo mfyoova nnu, kaammba, “Woshiny lwakwa, mmwanakwa mmbo kwashirovya nnu, kwaveva umwi wa yewo veeshivavisa. Na kimmba shilevikya Nndumi Iruva kyaasa shilashidimaa ikifisha.” 36Mwana yeto wakwe kammbia, “Ndeyaakwa, kwakooya yewe kulevikya Nndumi Iruva kyaasa, naasa inutyany yefyo kulemmbia, kimmba Nndumi Iruva alekweekkya itaiya vakiduva vafo, Vaamoni yewo.” 37Naasa kavia ndeeye, “Naasa shitannya indi, shira shikudeesye ando a miiri ivii shikee kyaanya kyakwa, shindeiya efo mafumbuu na vengyi elyi shilandealyikwa nta.” 38Nawe kammbia, “Kyasia endaany-te.” Nawe karawa kwaasha ando a miiri ivii, kakaa-fo na wooroye, kakapya-fo kiiyo. 39Miiri ivii yiikyisya kawuya kwa ndeye nawe kantannya shaasa emmbikya Iruva kyaasa. Nawe mmbo ekee mwana kulore ensanga na nndu nndumi nta. 40Naasa efo Israeli wo mwaaka kyikava kindo kya miishivye ikummbwa mwana wa Yefta wa ufyari lwa Gileadi ando a mikonu yiina.
Currently Selected:
VALETI 11: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
