VALETI 10
10
Tola
1Naasa Abimeleki eekifwa, Tola mwana wa Pua, niwe nshuku wa Dodo wa ufyari lwa Iskari, kashekabannya Israeli kwakwe ni Shamiri kulya urukeny lwa fidooro lwa Efraimu. 2We mmbo aleva mwiileta Israeli ando a myaaka makumi avii na iraru, eekifwa kaarwa efo Shamiri.
Yairi
3Numa kasha Yairi wa ufyari lwa Gileadi nawe kaleta Israeli ando a myaaka makumi avii na ivii. 4We mmbo eetiri vana makumi araru wo umwi katira nshungu wakwe weesaama. Nawo mmbo veetiri miri makumi araru efo urukeny lwa Gileadi irina lya vayo ni Miri ya yairi fika inu. 5Yairi ekifwa vakamwaara kulya Kamoni.
Yefta
6Naasa vana va Israeli vakafuluta lyingyi Nndumi Iruva unyafi na maravi awo, vakarunndya mabaali na mashtoreti na maruva a Siria na a Sidon, na a Moabu, na maruva a vana va Amon na a Vafilisti vakara Nndumi Iruva, valakindunndye. 7Unyafi lwa Nndumi Iruva lukawoya Israeli nawe kavavika maakony a Vafilisti na a Vaamoni. 8Nawo vakavaatara neevawonnya kyeeri ekyi Vaisraeli yewo vekee kwakulya ya Yordan urukeny lwa Vaamori ikee Gileadi, ando a myaaka ikumi na nyanya. 9Vaamoni nawo vakaruuka Yordan naambo vandekabana na Vayuda na Vabenyamin, na va-Efraimu. Nkyo Vaisraeli vakaatarika nnu. 10Naasa vana va Israeli vakafuuya Nndumi Iruva vakaammba, “Yese mmbo lulekulyamarya, elyi lulera Iruva weeru lukawuya irunndya mabaali.” 11Nawe Nndumi Iruva kavia vana va Israeli, “A ndesa shilemwaauwa-se maakony a Vamisri na a Vaamiri na a Vaamoni na a Vafilisti? 12Vasidoni nawo, na Vaamaleki na Vaamoni mmbo veemusisye, mukashifuuya, shamuuta, 13lyo mmbo muleshira yeny mukarunndya maruva engyi, nkyoony, yeny nshikimukabaunnyaa-fo. 14Endeny mukandefuya maruva yoo any imwaauwe kyeeri kya ukiva lwany.”
15Vana va Israeli vakavia Nndumi Iruva, Nndumi Iruva mmbo lulekulyamarya, ulaalu lutannyi ekyo kikusennyaa yewe, lyo lwakutereva, lukire nkonuyeu mweni. 16Naasa vakoota-fo maruva alya a wongo eekee kwawo, vakabooka yiinndya Nndumi Iruva, nawe Nndumi Iruva kalollya ukyiva lwa Israeli.
17Nalyo Vaamoni vakakusang'irya, vakamannya ulale kulya urukeny lwa Gileadi. Na Vaisraeli nawo vakakuummbya kulya Mispa 18Vasongoru va Giliadi vakaumburana, vakaammba, “A ni vi yeto ashebokaa ikabana na Vaamoni? Yeto mmbo asheshillyaa Gileadi.”
Currently Selected:
VALETI 10: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
