ISAYA 57
57
Utuusi lwa Israeli lwadengwa
1Atiri usumanu arekaa nta nkwiifo amanyaa nriminy mmbwakwe-fo; vandu veele nawo vakautwa-u, nta nndu umwi amanyaa-fo nndu nsumanu ammauwa kyuuka na ngapo. 2We kaanga urilalyiny, nawo vakemuya fitareny fyawo, wo nndu shaasa akeyeenda na ngaa yakwe.
3Indi yenu oshony yaa, yeni vana va nka nsavi, ufyari lwa nka ntuusi na nka wa shia. 4Mmbo mukeilya ulai na vi? Mmbo mwambira kana kyany na isomuta ngyulumi tany? Ndesa yeni mmukee filemi na valembi. 5Yeni mukeyaanta lango tany nnang'ani ya mialoni; kwasi ya wo nri utiri mare mavisi; yeni mukevaya vana efo mamungony nnang'ani ya mbanga? 6Waavi lwafo mmbo lukee efo songorony ta imungo, efyo mfyo waavi lwafo, mmbo kuleletya kiraso kya kindo kya ina, na kya nswa; ndesa shiirikye na mbony yeto? 7Mmbo kwavika kitara kyafo uwe ya ifumbu yaasha lyikee uwe-deny; kweenda efo kundeuta kiraso. 8Numa ya myaango na masimamba kwavika-fo findo fya ikukumbura; mashika kwantarambwa nrima wafo kimaruma kya nndu ungyi nshi kimaruma kyakwa-fo, kwaasaama uwe, kweengera kitara kyafo, neewe kwalya mma nawo, kwakunda kitara kyawo kyeeri kulelollya umbereto lwawo. 9Mmbo mukeindya mangyi moleki mukamweegye mafura afwaamaa nnu, kwaruma ironda lyafo lyeende kwaasha, ikuruuyya maruva kutani kwafika kwa warumu. 10Mmbo kwemmaraa kimaruma kya shia shaasha, indi nkulaamba-fo, nkwiifo ivika nsia-fo, kweonisyo finya tafo; kimaruma kya yekyo nkuleuma-fo.
11A lyo mmbi kulemwereya na inreremya kutani kushaamba wongo, nta kuleshikummbwa yeny-fo, nta ivika findo efyo nriminy-fo? A! Yeny nshileora urilalyi lwakwa kwa fyeeri fyaasha, nta nkuleshereya-fo? 12Yeny nshaambaa usumanu lwakwa na mashora akwa nnatiri mbusha na yewe-fo. 13Kyeeri kufiraa, mafwanu yewo kulewasanyirya nakuvarye lyo uraato lushekukamara kwaasha na mumuyo ukavaipoo. Indi yeto ashivikye nsia asheonisaa uruka, naasheva muya ding'u ya ifumbu lyakwa yeele.
Kyaasa kya Iruva kya yeekya na ikyira
14Nawe ashaamba:
“Songosieny, songosieny, sakkweny
shia uteny-fo wo nsindara wiifo efo shia ta vandu wakwa.
15“Mashika yeto akee uwe akee mwarafumi, mmbo akaa llung'anu; we irina lyakwe lyikee yeele; aamba: Mmbo shikaa ando kukee uwe, kukee kweele, na akee ando amwi na nrima wa ikurya na ikunyiisa, naambo mirima ya yewo wakunyiisye irutwa, na irrwa mirima ya yewo valekurya. 16Mashika nshivakyanaa na vandu kyeeri kyoose-fo; nta nshitirwaa ni unyafi mikonu myoose yakwa, na mirima yeyo shileiumba yeny. 17Kimaruma kya ulyamari lwa lango takwe shiletirwa ni unyafi, shankapa, shasuruma kisangu sharosa unyafi; nawe keengera iva nnriiti, kalatya shia ya nrima wakwe muni. 18Shallolya shia takwe; na yeny shinkiraa, na intetera-da, shimmbiryaa muu wakwe, we na yewo vakeemwiiya. 19Yeny shikeisongosya ndunda ta kana; urilalyi, urilalyi kwa yeto akee kwaasha, na yeto akee kufii, ni indo Nndumi Iruva aamba na yeny mmbo shinkiraa. 20Indi varavi mmbo vavakye iruva lyifwalangyikye; mashika llyishidimaa imalallya-fo, na mura wa vayo mmbo utiri mabwashi na kirinda kyiingyi. 21Nkwiifo ufoo kwa varavi-fo; ni Iruva wakwa aamba.”
Currently Selected:
ISAYA 57: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.