ISAYA 51
51
Marero a iviirya muu Yerusalemu
1Sharannyiny yeni va usumanu; yeni mukelatya Nndumi Iruva; loleny iwe nlya mundeutwa na irina llya mulesumwa-fo. 2Kumbweny ndeye waany Abrahamu na Sara alemwira; mashika llya ekee umwi-nsi mmbo shilemmbaanga shammwallwa kava veengyi. 3Mashika Nndumi Iruva ammbiirya Sayuni muu, ando kwekyee ukiva kukava kusha, kaallwa ando kwa kasa kukawa sha nnda wa Eden na ngorosho ya vayo ikava sha nnda wa Nndumi Iruva, ifura na seko fikalollyo nnang'ani ya vayo na yaana na iimba:
4Shaarannyi yeni vandu vakwa; shaarannyi isanga lyakwa, mashika ivavaso lyishuuka kwakwa, na yeny shishaallwa uvingo lwakwa luve ifura na sa ya vandu va masanga. 5Dede yakwa ikee kufii, ukiro lwakwa luvaa paa, na maako akwa ashuutyaa uvingo vandu wa masanga a vandu, maruva ashiveraa nang'u mmbo avikaansia woko lwakwa. 6Inweny miso any na iruvee-u kurumakaa sha nsu, kunu si, mashika na uruka lukkwaa sha soori, na yewo vakee nnang'ani ya vayo vafwaa-indo; indi ukiro lwakwa mmbo luvaa lwa llung'anu na dede yakwa nnyitiri umando-fo.
7Shaarannyi, yeni mwiishi usumanu, yeni vandu mutiri mavavaso akwa miriminy yaany; mulairee fyararo fya vandu, nta mulasavae kimaruma kya fiila fyawo. 8Mashika mmbo valyiwaa mmakuru sha soori, na sava tivalye sha sufu, indi usumanu lwakwa ni lwa llung'anu, na ukiro lwakwa ni lwa marika moose.
9Kwipoo, kwipoo, voi Nndumi Iruva,
kwalweekya, lweekye na finya tafo
sha kyeeri kilya kya kasha,
sha kyeeri kilya kwevinga ishoka lyilya lya yeeve lyavaangwa Rahabu.
10Nnyewe kulerummbwa-rummbwa Rahabu fyenga fyenga
Kwakora na ishoka lya;
Nnyewe kuleumisa yeeve,
na mira a ndilyi shiniini,
kwaallwa ndilyi tikava shia,
naambo veere vandu valekirwaa-ndi?
11Neewo walekirwaa ni Nndumi vashaa,
wafike Sayuni veshiimba;
ifura lya llunganu lyive uwe ya mirwe yaawo,
vakukyele na ifura;
ukiva na ilwaa firishe.
12“Nnyeny, yee, nnyeny, nnyeny shimuviiryaa muu,
yewe nnyewe vi kutani kweryaa nndu afwaa,
na mwana wa nndu ashaluuwaa sha mare?”
13Kwarekywa Nndumi Iruva,
Mwuumbi wafo,
yeto alevika mafishi,
na ivika uvasha lwa ulana,
neewe kwereya nsanyiny moose,
kimaruma kya unyafi lwakwe
yeto akekusisa kyeeri akee kufii irumata;
na nkwi unyafi lwakwe yeto akekusisa lukai?
14Yeto alesamiswa kandefingwa mmbo aruwa uviny;
nta nnyafwaa nooloke irininy-fo,
nta shoonga yakwe nnyishaangywaa-fo.
15Mashika yeny ni Nndumi, Iruva wafo,
shaaruva yeeve, uraato lwa vayo lukekwipoo
Nndumi Iruva wa matorito nlyo irina lyakwe.
16Neeny shammbika marero akwa kaniny kyafo,
na yeny shakusuruma kirisheny kya woko lwakwa,
na shivike mafishi iruvee-u
na ivika nsuka wa ulana
na ivia Sioni, Yeni ni vandu vakwa.
Ufishony lwa ngatara ta Yerusalemu
17Kwipoo kumuni, kwipoo kumuni, salala, Ewe Yerusalemu,
Yewe kuleniiya wokony lwa Nndumi Iruva,
kikombe kya unyafi lwakwe,
bakuri ya kikombe kinangaa-nangaa
kwakiniiya na ikimarisya.
18Nkwiifo nta umwi wa intetera-fo
nnang'ani ya vana woose kuleveera,
nta nkwiifo umwi wa intira woko-fo,
nnang'ani ya vana woose alevalela.
19Mbony eti toose tankukooya;
mmbi ashidimaa ikutinnywa?
Kwitirwa ni uraato, na shaa na usu;
shiidimi inda ikuviirya muu?
20Vana vafo vafwa nrima,
vanlala shia shilangari,
vakava sha kinamburi kyatirwa ni nsoori;
vakaishwa unyafi lwa Nndumi Iruva,
na ikoomyo ni Iruva wafo.
21Naasany, kimaruma kya vayo, kwaarannyi irero elyi, yewe kwalyiswa ukiva na inangwa lyo nshi mfinyu-fo. 22Nndumi, Nndumi Iruva, na Iruva wafo yeto akee ikureekya vandu vakwe, ni indi aamba, Lola shammuuta wokony lwafo kikombe kinangaanangaa, pakuri yeyo ya kikombe kya unyafi lwakwa; nkukinaa lyingyi-fo; 23na yeny mmbo shikivikaa maakony a yewo wakekulyilyisa, walevia nrima wafo, kufiikye, wiidimi iira, neewe kwaallwa mungo wafo ukava uteeri na shia, kwa yewo vakeira uwe ya vayo.
Currently Selected:
ISAYA 51: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.