ISAYA 49
49
Israeli sa ya vamasanga
1Aranyiny eni maruva, looteny maarwi any eni ngyufyari ta vandu mukee kwaasha, Nndumi Iruva ammiita ukya kulaore shammiirwa; shikee efo nsangeny wa maaye vakwa kashivaanga na irina lyakwa. 2Nawe kaamisa kana kyakwa kakava sha usu lwoovi; kashivika ando afoo ifweereny lya woko lwakwe. Nawe kashaallwa mfe mwaami ukee munwe, kashisuruma efo allyeny ya vayo, eshiviaa, 3“Yewe ni ishinga lyakwa israeli, nnang'ani yafo shisheitikiswaa. 4Kya indi shaamba, shankuvinisa ruu, shavina kikee kya ruu parany; kilatiri mbusha.” Kya indi ni kya dede uvingo lwakwa llukee kwa Nndumi Iruva na mbusha shishewonaa mmbwe atiri.
5Na ulaalu Nndumi Iruva mmbo aamba indi, we aleshitana ukya efo nsangeny wa maaye akwa shive ishinga lyakwe, naambo sheende Yakobo na Israeli vakusanyirye-se mbee yakwe (kimmba yeny shaindywa mbee ya usangu lwa Nndumi Iruva na Iruva wakwa kaveva nnyo finya yakwa). 6Eeda Nndumi Iruva aamba indi, “Ni kindo kyaangu yewe iva ishinga lyakwa naambo kuinwe ngyufyari ta Yakobo, na ivaviira vandu va Israeli, vasurumi; na kya mmwaasi shishekuutaa kuve sa ya va ulana; kuve nkira wakwa fika ufishony lwa ulana.”
7Nndumi Iruva na mwikira wa Israeli, mweele wakwe, aamba indi, yeto ainyalwa ni vandu va ufyari elu, we eto akee ishinga lyawo vakee ishillya, vamangyi vashelollyaa, vashesalala na vaniini vawo vashevafirya-ndi kimaruma kya Nndumi Iruva akee wa dede, alatiri ulembi, mweele wa Israeli ankusauwa.
Ivauwa lya Yerusalemu
8Nndumi Iruva aamba endi, “Kyeeri kisumani shilekurouwo, na nkonu wa ikuauwo shilekweekya na yeny shishekuningaa, shishekuuta yewe kuve ni kyaasa kya vandu eva; kushesaleesa uruka elu na ivaniinga dingu yekee nrabu. 9Kuviaa yewo vakee vafinge, naasa somukeny na ewo vakee ireeminy, somukyeny mulollyo. Vashellyaa efo shya naakwa ni fya myaambeny myuumu. 10Mmbasheityaa shaa nta itirwa nnyura-fo, mmbashekorwaa ni mwi nta iitya nrike nkasha-fo, kimmba yeto alevaauwa ashevasongoyaa; eeda, ashevateteraa efo ngyusokeny ta mira.
11“Na yeny shishesongosya shia shirambalalyi nnang'ani a mafumbu na shia takwa niini tisheitikiswaa shoose. 12Eva vasheshaa vauka kwaasha, vengyi vauka taari ya ngama na eva taari ya nkwaany; na eva vauke uruka lwa Sinimu.”
13Imbeny eni ngina, fura ewe uruka;
kapa kyorongye na iimba eni mafumbu,
kimmba Nndumi Iruva ammbirya muu vandu vakwe,
nawe ashevalyillyaa ewo vakee iliswa ukiva.
14Kya indi Sioni nyaleamba
“Yaave anshira,
Nndumi Iruva anshirekywa,”
15A ndesa kwiifo nndu nka aidima irekwa vana vakwe vakeeyoonga nta nalalyilye mwana wa nsanga wakwe?
Eeda, eva vashidimaa irekywa,
kya indi yeny nshikurekywaa-fo.
16Lola, mmbo shikureiye yaa kidauny kya maako akwa,
masimamba afo akee mbee ya usangu lwakwa kyeeri kyoose.
17Vana vafo mmbo vakee ikutakura na ewo vakulyamarya,
na ewo valekura na ewo nrabu vasheukaa kwafo.
18Inwa miso afo kulole taari toose,
ewo woose mmbakee ikuumbya vakusheye.
Kyeeri ekyi shiyyo,
Nndumi Iruva aamba,
ni kya dede nkushevavingaa woose ewo
kwakooya ni kimaruma kya usha, mmbo kusheraa ewo sha mwali.
19Mashika kya mbony tafo,
ta efo kwafo kushevaa nrabu ando kulakayoo mmbandu,
na uruka lwafo lulyamarwa,
ulaalu lushennyaa, nta llushekimaa-se ikaafo vandu vafo-fo,
Valya veefo vasherishaa.
20Vana kuleipoo mifungwa vashekuvyaa ando yaa ni kunnywa, nkushelumaafo. Shiniinga mwaanya shiidime ikaau. 21Lyo kusheambaa efo nriminy kwafo, “A mmbi aleshiirya vana eva na yeny mmbo shemfiywaa ni vana vakwa? Mmbo yeny shekee shimuni, shasamirwa sharaaraa efo na efo. A mmbi alelela vana eva? Yeny mmbo sherewo shimuni, a ndesa nkwi vekai?”
22Nndumi Iruva aamba indi, “Lola shisheinwaa woko lwakwa uwe ya vandu va ulana; na ivatira mifungwa vandu vawo na isaalesa ngiri bendera ya umangyi lwakwa; nawo vashendee vana vafo na kipoota, na sambura tafo tishekurikwa meeveny awo. 23Vamangyi vawo vashelelaa vana vafo na vaka va kimangyi vashelela na ishukura vana. Vashewaa mbee yafo na ifiirya-ndi na ikomba kiluulyi kya marende afo, llyo kushemanyaa yeny ni Nndumi Iruva na yewo vashivereye mmbashesukaafo.” 24A ndesa nndu nrango ashidimaa isokwa mifungwa yakwe? Ao nsemu va vasikari vakee vadeesye nisha vavingwa? 25Kya indi Nndumi Iruva mmbo aamba indi, “Naakwa ni yeto nranngo ashesokwaa mifungwa yakwe na mifungwa ya eto akulollye atiri finya ashekirwaa. Mashika yeny mmbo shishekabanaa na eto akabana neewe; mmbo shisheengyee vana vafo ukiro. 26Na ewo vakeikuwonnya mmbo vashelyaa nyama ta miili yawo veni. Vashenangwa ni samu yawo veni sheelyi vanangwa ni mfinyu; llyo vandu woose vashemanyaa dede sha elyi yeny mmbwe Nndumi Iruva, nkira wafo, mwauwa wafo, mmbwe mwiitorya wa Yakobo.”
Currently Selected:
ISAYA 49: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
