ISAYA 30
30
Kyaasa kilakee kya tokyi na Misri
1Nndumi Iruva mmbo aamba indi, “Woshiny ni lwa valya valeshimina, yewo vakeerunndya uramba lwawo lulakee uramba lwakwa, vakeevikyana fyaasa kilasha na uramba lwakwa, vakaummbya ulyamari uwe ya ulyamari. 2Mmbo vakeekwiipo vakeenda Misri indetereva-fo weekyi kuleefo ishivesa makusaro. Kweekyo kundo vavikye nsia ni Misri kwa mangyi Farao. 3Kyeendi uringyi lwa mangyi Farao, mmbo luvaa usutu kwany. Kiwo na uringyi urukeny lwa Misri mmbo kivaa kyiila kwany. 4Naakwa vasongoru vawo valemfika Soani na vateteri vakandefika kutani Hanesi, 5woose mmbo vashesutwaa amwi neewo valashiidimaa ivaniinga weekyi nta mbusha kuuta kyiila na usutu.”
6Irero lya Iruva mmbo lyaamba indi kya mafisi a taari ya sinde. “Veetetera mmbo vakeira efo kasa kundo koomu kwiifo ukyiva na maariso, kutiri miiso, shoka titiri suumu na mashoka arumbukaa. Veerye mario a masaa awo uwe a ngamula verwaaya vandu valashiidima ivaekya kindo. 7Mashika weekyi lwa Misri llutiri kindo lushiidimaa iveekya-fo. Kweekyo shafishya Misri irina, “Ishoka lyilatiri finya!”
Vandu valatiri wiindi
8Iruva kashivia, “Ulaalu iboo kyitabu kyeereiya kwareiya mbony ta vandu yeva ndesa vakai kyive ukureekyi mbee yakwa llung'anu. 9Vandu yeva mmbalyang'a mmbandu vashaamba wongo valakunndye yaarannya miloshye ya Nndumi Iruva. 10Mmbo vavyaa vakisuku malallyeny, mulaluvye ekyo kikee kya usumanu-fo luvyeny ekyo lufuryaa nakyo, ambeny mbony ta wongo. 11Alashikeny mukalatya shia ta wongo mulalwiimi ilatya shia teru. Llukunndye yiita mbony ta Iruva waany mweele wa Israeli-fo.”
12Kweekyo Iruva mweele wa Israeli mmbo aamba, “Yeni mmbo mwallema irero lyakwa, mukakunda fya ilammya na ulembi. 13Kweekyo ulyamari yelu mmbo lushemweenngye urumato, ni kimwi sha isimamba lyaasha lyifikye, mmbo lyiwunduka tiny neewa sumbai. 14Iwunduka elyo mmbo lyivaa sha nungu yaparika fiperengesha kilawonikaa-u nta kiparwe kyeyuuta muro yoo rukony ao iraa mura yoo kiroriny.”
15Nndumi Iruva Mweele wa Israeli; aamba: “Mukashiwuuya neekusirya-u, mushekirwaa kwa waarya neeshivika nsia mmbo mushekooya finya indi yeni mmulekunda-fo. 16Kilasha, mmbo mulaamba, ‘Oode, yese mmbo lusaama frasi tiishi irisha.’ Kyasia mmbo musaama frasi tiishi irisha indi frasi ta vakiduva vany mmbo tiishi irisha tikamwiilannya. 17Vandu vany kyiku kyimwi mmbo varisha askari umwi nkiduva na vaskari varaanu vakiduva mmbo vafye imurishisa yeni moose piny. Mafurummony valya vasaa-u, mmbo vashevaa sha nnara wa bedera uwe ifumbuu!” 18Naakwa ni indo Nndumi Iruva mmbo akeevereya namufwaaye, mmbo asheshaa neemulyillya. Mashika Nndumi Iruva, ni Iruva wa llung'anu.
Iruva avikyaa vandu vakwe mbora
19Yeni vandu mukee Yerusalemu, ni kya dede mmukaa mukape kyiiyo lyingyi-fo, kyeeri ashiita mwiimfuuya mmbo amulyillya neemutarama. 20Nndumi mmbo amulyisaa ukyiva na maariso, indi we mmbwe mwiilosha waany nta nnyakusurumaa-fo mmbo mullollya kwa miso any muveni. 21Naakwa mwareka shia mukeenda taari ya woko usha ao woko umuso, mmbo mushiita unyanga numa yaany, lushaamba, “Shia nnyaa ikai ilatyeny.” 22Mmbo musheebo maruva any a wongo akee maambe fesa na saabu. Mushefyeeryaa kwaasha sha findo fitefusu mwiishambaa, “Endemarukukyeny kwaasha.” 23Kyeeri mushemweengye mbeu tany, Nndumi Iruva mmbo ashemweengye mmbwa, nayo ishemiisa na yuulula fimu fyiingyi na findo fyany fya mmba fikooye milyiiye imaaye. 24Ngoleta na mishungu ya irema mmbo fikooya mare mesha akee mavike munyu. 25Elyi kyeeri kyisheshaa, vakiduva vany vashewaawa na turuve tawo tiwunduwa, ngyusoka ta mura mmbo tishoshoka tuuka wo ifumbuu na wo kidooro. 26Mwiiri mmbo ushemikaa sha mwi na mwi ushevaa mmwasi ka mfungare, kyimwi sha mwi wa mikonu mfungare kwa nkonu umwi. Mbony yeti mmbo tisheutika kyeeri Nndumi Iruva eefo avafingaa nevavara fyaasha filya aleengye vandu vakwe.
Ngapo ya uruka lwa Ashuru yuuka kwa Iruva
27Finya na itumbe lya Nndumi Iruva mmbo ishiidimaa ilollywa yuuka kwaasha. Muro na nsu mmbo fikeeyoora nyashi yakwe, marero akeyuuka kaniny kyakwe mmbo akee ikora sha muro. 28Karika uraato ngata ya mura mwiingyi ukeyeeka ukakurika wo kindo kyikee mbee yavayo. Lukasununda neesanngya ukasha loose nnang'ani ya masanga. 29Indi yeni vandu va Yerusalemu mmbo mushefuraa na yiimba sha kyeeri mulele rembo mwikyesaa kyeeri kya sukukuu. Mmbo mushiishwa ifura sha vandu vasheenda veeshiimba na iranda yelyi veefo vasheenda ifumbuu mmba ya Nndumi Iruva nringyi waawo. 30Vandu woose mmbo vashiita unyanga lwa itumbe na finya ya Nndumi Iruva na nyashi yakwe. Kusheva-fo fipala-pala fya muro, maruruma na ngova na mmbwa ya masaawe. 31Vaashuru mmbo vashetirwaa mmbwerei, kyeeri vasheeta unyanga lwa Nndumi Iruva. 32Wo ngapo ishuuka kwa Nndumi Iruva ya Vaashuru, mmbo isheenda ndesa ngoma na filimbi tiifo tikabwa. Iruva mmbwe muni ashekapana na Vaashuru. 33Ando kweekorywa mangyi ya Ashuru mmbo kulemma ideesywa mikonu miingyi. Ando yoo mmbo kutiri irina lying'ani taari shoose. Muro wiiyo na ngwi tifye. Nndumi Iruva mmbwe muni ashaata muro yeto.
Currently Selected:
ISAYA 30: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
