HOSEA 4

Ndumi Iruva asswo kya Israeli

1Aranyiny-te, Nndumi Iruva atiri mwaandu na vandu va kunu urukeny, nawe mmbo aamba indi, “Nkwiifo dede nta ikunda kunu urukeny-fo. Nta mmbashilollye yeny Iruva-fo. 2Vakavika fyaasa mmbo vafifisha. Vakaamba wongo, vakawaa, vakaiva, neetuusa. Uravi mmbo lukeengereka tupu, wo nkonu ni ikuwaa tupu. 3Nkyo uruka mmbo lukeesia, wo kindo kiifo kifwe, mafisi, ndeye naakwa mmakunga.”

Ndumi asswo kya Vakohani

4Nndumi Iruva mmbo aamba, “Kulave nndu asakira vandu nta natire nawo mwaandu-fo. Mwaandu wakwa ni yeny na vakohani. 5Wo nkonu mmbo mweera mbai, nta nkisuku nawe nnyava nta ngwaana-fo. Nkohani kalyamara manyiny, nkisuku mmbo alyamara kio. Mmbo nshekulyamaraa na mau deny. 6Vandu vakwa mmbo vakee vadenge mashika elyi valashiishi. Yeni vakohani mmushiishi-fo, mukalema na ufundo lwakwa, nkyo neeny shamulema yeni, nta vana vany mmbasheva vakohani-fo. 7Shaasa vakohani valeengereka niindo na ulyamari lulefumbuka. Mmbo nshefullwa wiindi lwany luve seko. 8Efo ulyamariny lwa vandu vakwa mfo mwaviiya masimba nawo vakeengera ilyamara kavii kararu. 9Mmbo mushekapwaa kimwi nsi sha wo. 10Mushewaryaa waavi lwa firaso lyo mweengere itirwa nshaa. Mmbo vashetuusaa, lyo nta mmbashengerekaa-fo, mashika elyi muleshilema mukasora maruva engyi.”

Nndumi Eesityou Veeindya maruva

11Nndumi Iruva mmbo aamba indi, “Mfinyo mwiiya kiwo neeto nkuu mmbo wasoka vandu vakwa urango! 12Vakaruuya mumuyo wa ukisuku efo findony fyeepasha na maako! Kiri nkyo vai kivavyaa ekyo kivasumanyi imanya! Vanshilema deny. Mmbo vammbaka nka wa shia nawo mmbo vakundye kwa maruva engyi. 13Mmbo vandenta firaso efo mafumbu-u, neefo fidoorony vakakorya-fo firaso, kundo kutiri miri myaasha itiri ifweera isha! Naasa kikavaany vana vany va kika mmbo vava vatuusi na valyi vany vakatuusa. 14Lyo nta nshishevakapaa kimaruma kyavayo-fo, mashika naakwa nnyeni mmbo mwasora ngata ya utuusi elyi mwaanga iindya maruva any mukatuusa mfyo firaso fya vandu valaishi Iruva. Kyaaso ekyi mmbo kyamuronga, ‘Vandu valatiri umanyo mmbo vasherumakaa.’ 15Lyo ra elyi yeni vandu va Israeli mulakutiri neeny, lyo vandu va Yuda valawe ulyamariny sha elo lwany-fo. Muleende Gilgali indeendya-fo-fo na Beth-aveni mularwe nafo-fo. Nta mulavikye-fo Nndumi Iruva fyaasa-fo 16Vandu va Israeli mmbo vavakye nshungu kwa ukaidi. A mmbo nshevalelaa inda sha moonri ashiiswaa kyaandany? 17Vandu va Israeli mmbo vashillyo mmaruva a wongo. Ra vakae shaasa vakai! 18Vakannangwa ni mfinyo mmbo vakushangala utuusiny, vakakureveesa neekusuta wo veni. 19Mmbo vashevivitwa ni uraato, vasuke nnu kimaruma kya yuutya maruva a wongo firaso.”

Currently Selected:

HOSEA 4: MAS2

Highlight

Compare

Copy