HOSEA 2
2
1Nkyo ulaalu vaanga vandu va Israeli, “Vandu va Iruva” na “Vakunde va Iruva.”
Utuusi lwa Israeli
2Vana vakwa tereveny mau, lyo nnyakikee nka wakwa-fo, neeny nshikikee mmi wakwe-fo. Ntereveny nare utuusi lwakwe. 3Anra nalatana indo mmbo nshemutaa soori shinreu mbereto shallya awonika. Nave sha uruka wuumu, nawaawa nnyura. 4Nshishelyillyaa vana vakwe-fo mashika mmbana va utuusi. 5Maye waawo mmbo aletuusa, katana findo fya usutu, llya aleamba, “Ra shisore vakunde vakwa, mmbo vashiningaa shoonga, na mura, soori na mafura na mfinyo.
6“Neeny mmbo nshendingityaa na uvare lwa miinga, na shia yeemfikya shiiraye. 7Narishye vakunde vakwe lyo nare nalavakooya. Navaruuye navature. Nookefo naambe, ‘Ra shiwuiye mmi ulya wakwe wa mbee, llya shekee kyeni ngota ulaalu.’ 8Nta nnyashiirikyaa sheelyi nnyeny shilenniinga nganu, na mfinyo na mafura, na fesa na saabu eto aleutya baali-fo. 9Naasany kyeeri kya yuulula mmbo nshensokaa findo fyakwa, nganu na mfinyu na ruu ta yooka soori shinningye. 10Shimwaammbwe soori shinreu ruu mbee ya vakunde vakwe woose, na nkwiifo nndu ashiidimaa imweekya-fo nemwaauwa maakony akwa-fo. 11Sukukuu takwe toose nshetimaa, suku kuu ta myaaka na miiri, na Sabato tawo, fyoose fishemandaa. 12Mmbo nshelyamaraa misabibu na mikuu ya ndunda ilya aleamba ni nkunde wakwe alenniinga. Misabibu yakwe na miri ya ndunda nshefyaallwa ngorosho, mafisi a ngoroshony ashesamya-fo. 13Na kya fyeeri efyo aleshira nshenkaba. Na kya llya alefumbirya Baali uvumba, na yoo alekwaambika na pete maaruny akwe na findo fya wuuru. Yoo ni marero a Nndumi Iruva.”
Ikunda lya Nndumi Iruva kwa vandu Vakwe
14Mmbo nshemmbiiraa lyingyi na kasa, shimuute-fo shimuni na marero mafoo. 15Shimmbiirye misabibu yakwe na Imungo elyo lya Ukiva lyive ando a ivika nsia. 16Nawe nasheshivaanga mmi wakwe-nta kwakwe nshishekivaa sha baali-fo. 17Nta nshishekimweekeyaa nasende irina lya baali-fo.
18Kyeeri ekyo llyo nshevikaa kyaasa na mafisi moose na ndeye, nafyo nta mfivikaa kiduva na vandu vakwa-fo. Fisha fyoose fya fira mmbo nshefimaa-fo kunu ulaniny, ngyusu na ngyura. Vandu vakwa vakae na ufoo na ifura.
19Israeli, mmbo nshekuruyaa kuve nka wakwa,
Shive wafo wa nrima deny.
Shikoore usaari, waarya, usumanu na ilyillya lyakwa,
kuve wakwa llung'anu
20Mmbo nsheringaa kyaasa kyekwaallwa wakwa
Neewe kushiirikye shive Nndumi Iruva wafo.
21Llyo nsharanyaa fiterewo fya vandu vakwa Israeli
Sheende mmbwa urukeny,
22Nalo uruka lweende nganu na misabibu na mafura
23Nsheviirya vandu vakwa uruka lwawo vakooye iveswa.
Yewo vensuwa shivaore ikunda lyakwa,
Na valya kulore vekee vandu vakwa shivaviire kwakwa.
Llyo nshaamba, “Yeni mmbandu vakwa,” nawo vaambe,
“Yewe ni Iruva weeru.”
Currently Selected:
HOSEA 2: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
