HOSEA 1
1
1Elyi lyo irero lya Nndumi Iruva aleniingya Hosea kyeeri kya vamangyi va Yuda wo Uzia, Yotam, Ahasi, Esekia na Yeroboamu wa Yeheoashi we ekee mangyi ya Israeli.
Nka na Vana va Hosea
2Kyeeri Nndumi Iruva alepooka irera na Hosea mmbo alemmbia, “Hosea, Enda ora nka ntuusi na vana vave va utuusi sha we. Vandu vakwa mmbo valeshira yeny vakava vatuusi.”
3Llyo Hosea kandeora nka avangwaa Gomeri, mfu wa Diblaimu. Vekiira mwana waawo mmbe wa kyuumi, 4Nndumi Iruva kavia Hosea, “Mmbaange Yezreeli, nkyo kyaamba nkushiraa-u fyeeri fyaangu kulore shikape mangyi ya Israeli kyeendwa ni uwai lwa Yehu aletannya Yezreeli. Mmbo nshemamita umangyi lwa Yehu, llo umangyi lwa Israeli. 5Na kulya imungony lya Yezreeli mfo nshemamityaa finya ya itorito va Israeli.” 6Gomeri kaira mwana wa kavii, kava wa kyika. Nndumi Iruva kammbia, “Mmbaange, Loruhama nkyo kyaamba Nalakunndywa, mashika nshishekyoraa ikunda lyakwa kwa vandu va Israeli ao ivasarya-fo. 7Lyo kwa vandu va Yuda ikunda lyakwa lyishelollywa. Yeny Nndumi Iruva waawo mmbo nshevakiraa, lyo nsheshetanaa indo fireny vakapani na ngyusu ao mife na ura ao na itorito va frasi-fo.” 8Naasa Gomer kaira mwana wa kararu. 9Nndumi Iruva kavia Hosea mmbaange, “Lo-ami nkyo kyaamba yeni mmukee vandu vakwa-fo, nta yeny nshikee Iruva waany-fo. Mashika vandu va Israeli mmbakee vandu vakwa-fo, neeny nshikee Iruva waawo-fo.”
Israeli Ivikyoo Mbora
10Vandu va Israeli mmbo vashevaa sha nsanga wa yeeve, ulavaa yeekyena. Naasa Iruva kaamba, “Mmukee vandu vakwa-fo.” Lyo nkonu usheshaa nashevavia, “Mmbo mukee vana va Iruva yeto muni muu!” 11Vandu va Yuda na vandu va Israeli mmbo vashelungwaa vave vamwi. Vakusauye nsongoru umwi nsi, vapookeny lyingyi ivesywa urukeny lwawo. Yee, nkonu wa Yezreeli mmbo usheng'anaa.
Currently Selected:
HOSEA 1: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
