HOSEA 13

Uvingo lwa Ifurummya uwe ya Israeli

1Elyo mbee kyeeri vandu va Efraimu valerera, Vaisraeli vengyi mmbo veiryaa. Lyo vandu vakalyamara elyi vaindya Baali, nakyo kiveengye ufu. 2Mmbo veengera ilyamara elyi vasongosya mafwanu a minya vakaiindya mafwanu a fesa, atanwa mmaako a vandu. Nawo vakaamba, “Niingyeny firaso!” Nndu mmbo ashiidimaa inda imiminda ifwanu ifwanu lya shau! 3Vandu yeva mmbo vasheekaa sha ituu lya ngama elyo lyareka swany kyeeri kya ngama. Ao sha elyi nsu wavivitwa ni uraato.

4Nndumi Iruva mmbo aamba, “Yeny ni Nndumi Iruva wafo, shilekuuta Misri Nkutiri Iruva ungyi kuuta yeny-fo. Nta nkwiifo Mwiikira kuuta yeny-fo. 5Mmbo shilekutetera kulya kasa koomu. 6Lyo kwikyifika urukeny usha, kwawuura, kwakurosa neeshirekywa. 7Ulaalu mmbo nshemulaaya sha miiso. Shivevaka nyamandu shikuvereye yoo shia kushiraa. 8Mmbo shishenyaasyaa sha ngare yareta vana va-vayo, shikuratwe-ratwe. Shive sha miiso shimulye.

9“Eni vandu va Israeli mmbo nshemumamitaa! A mmbi ashemweekyaa? 10Mmbo mulekunda muniingwa mangyi neevikywa vasongoru. Yewo mmbo vashidimaa imukira? 11Mmbo shilemuniinga va-mangyi shiitirwa ni unyafi, shooka-fo shamusoka.

12“Ulyamari lwa Israeli na uravi lwakwe lwamfumbuka, nalo lukaumbywa ando amwi. 13Israeli ekee wekaa-u, lyo mmbo akee nrung'ani kavaka mwana amfikya iwonika, lyo nalakunde isomukya. 14Nshishekiraa vandu yeva shivaute efo ulaniny lwa vafu-fo, ao efo finyiny ya ufu-fo. Ewe ufu ende ngapo tafo! Ende finya yafo ya urumato, ewe ulana lwa ufu. Nshikilyillyaa vandu eva-fo. 15Naakwa Israeli avesywa sha mooro, mmbo nshendee uraato lwa muro luuka taari ya ngameny ya kasa, Lusheumisya ngyusoka na mbora toose. Wo kindo kiiyo kimamike. 16Samaria nayo nkuti ikapwa kimaruma kya ishira yeny neeshilema. Vandu vakwe mmbo vamamikyaa fireny, vakoku vavavarywa efo si, na vaka vakufingye vaporomuwa noosu.”

Currently Selected:

HOSEA 13: MAS2

Highlight

Compare

Copy