HOSEA 11

Ikunda lya Nndumi Iruva kwa yevo valankundye

1Nndumi Iruva mmbo aamba indi,

Kyeeri Israeli ekee mwana mmbo shilenkunda

shambaanga nauke Misri.

2Shaasa shileengera immbaanga niindo aleengera

ikaa kwaasha neeny. Vandu vakwa mmbo valentya

Baali firaso fyeekora na muro

vakafumbirya maruva a wongo nsu.

3Lyo ni yeny shiletetera Israeli keedima yeenda,

shakamara vandu vakwa na mayi.

Lyo mmbashirikyaa sheelyi shilevalela-fo.

4Ni ikunda na usisiryo shilewoomwa nalo na kwakwa

Shaveepoo shavavika yaa kipooteny kyakwa,

shakwiinyika shavalola.

5Mmbo valelema ishiwuiya, nkyo nkuti vawuye

na Misri, na Vasirya vashevashillya.

6Mmbo vashelollyaa fira miriny yaawo,

nayo isherua ngiri toose ta miri.

Fira mmbo ishelyamaraa vandu vakwa mashika

mmbo vatana ekyo kikee kisha misony awo veni.

7Mmbo vakeengera ishira tupu.

Numa lyo nkuti vashefwa kimaruma kya iryo elyo lyivarovyaa,

lyo nkushekaa-fo mwiwoota-fo.

8“Israeli a niinda nshidimaa ikweera efo?

A mmbo nkuraa inda?

A nshidimaa ikumamita shaasa shetannya Adima,

ao shikutannyi shaasa shetannya Zeboiimu?

Nrima wakwa mmbushekeyaa shitani indo-fo

Ikunda lyakwa kwafo yewe lyitiri finya nnu,

9Nshishekukapaa kimaruma kya unyafi lwakwa-fo

Nshishelyamara Israeli lyingi-fo

Kimmba shikee Iruva nta nshi nndu-fo,

Yeny, shikee mweele, mmbo shikee neewe

Nshikusheyaa na unyafi lwakwa-fo.

10“Vandu vakwa vasheshilatyaa elyi nshedinaa sha miiso kwa vakiduva vawo. Mmbo vasheangusyaa ishisora wooka na taari ya nkwaany. 11Vashe wooka Misri, veerumbukaa sha ndeye, na wooka Siria sha mbeta. Nshevaviira lyingyi kyeny kwawo. Ni yeny Nndumi Iruva shaamba indo.”

Israeli na Yuda vaminwa

12Nndumi Iruva kaamba, “Vandu va Israeli mmbo vashilemba na yaamba wongo, nawe Yuda kava erunda kilasha na yeny Iruva Mweele.”

Currently Selected:

HOSEA 11: MAS2

Highlight

Compare

Copy