VAEBRANIA 7
7
Nkohani Melekizedeki
1Mashika mangyi yeto wa Salemu we Melekizedeki ekee nkohani wa Iruva akee uwe, yeto alekwaanannya na Abrahamu llya ekewuya ooka ikapa vamangyi valya, kammbikya mbora. 2Mmbwe ulya Abrahamu alenninga kyenga kya ikumi kya findo fyakwe fyoose; (udongo lwa irina lyakwe ni “Mangyi wa usumanu”, na lyingyi “Mangyi wa Salemu”, nkyo kyaamba ni mangyi ya urilalyi. 3Nnyatiri ndeye nta maye-fo, nnyatiri kyeeri apookye-fo, nta mafurumyony a muu wakwe-fo, lyo mmbo alevakaniswa na Mwana wa Iruva); yeto mmbo akaa llung'anu.
4Naasa, loleny shaasa nndu yeto ekee nsuri, yeto Abrahamu nkuu weeru, alenninga kyenga kya ikumi kya masaa akwe. 5Neefo kwa vana va Levi valya vetira ukohani, mmbo vatiri ivavaso ipoo kyenga kya ikumi kive kya vandu vawo, mmbo va ufyari lwawo, ni ivavaso, lla elyi vaukye kwa Abrahamu. 6Lyo we, ufyari lwakwe lulaukye kwawo, mmbo alewarya kyenga kya ikumi kwa Abrahamu, yeto atiri kyaasa ekyo kammbikya mbora. 7Mmbo kimanyikye deny, yeto mwivikya mbora mmbo ailannyi yeto avikyo mbora. 8Na Vakohani yewo vawaryaa kyenga ekyo kya ikumi vakee vandu vashefwaa, lyo nkwa yeto akureekyo sheelyi eefo na muu. 9Na lyo ivaa yaamba kyeendwa ni Abrahamu, naakwa Llevi mwiwarya kyenga kya ikumi mmbo aleniingya kyenga kya ikumi; 10mashika mmbo aukye kwa ndeye, yoo Melekizedeki alekwaananya nawe. 11Naasa kukooye kweiyo usongovisi efo ukohaniny lwa Levi, (mashika vandu yewo mfo valewonisa uvavaso); nkuti ki se yeiyo yewonisa nkohani ungyi avakye Melekizedeki, nta nare nalavakaniswa na Aron? 12Mashika ukohani lulya lukammaalashika, na ivavaso nalyo mmbo lyishalashikaa. 13Mashika yeto mbony takwe tilererwa mmbo aleakaniswa na ufyari lungyi, neefo nkweifo nndu ungyi mwirundya kitara kyeerasya-fo. 14Mashika nkindo kya paa Nndumi weeru mmbo ookye efo ufyariny lwa Yuda, na Mose nnyalererau kya ufyari yelo kyikee kya ukohani-fo.
Nkohani ungyi
15Yefyo lukerera yese mmbo fimanyikye mmwasi, kyimmba alewonika nkohani ungyi avakye Melekizedeki; 16nalakee nkohani kyeendwa ni ivavaso lya uvavaso llwa lwa ngata ya mwiili, akee wa wiidimi lwa muu ulamandaa. 17Mmbwe alekureekywa kyeyaamba,
Nnyewe Nkohani llung'anu
kuvakye Melekizedeki.
18Mashika kwiiyo yuuta-u ivavaso llya lya mbee, kimaruma kya ufwafwa lwa vayo, neelyi kulore lyilemaa; 19(mashika ivavaso llya lya mbee lyileinutya kindo-fo); na ando amwi na ifyo mmbo kulesha-u ivereya iiya isha mmwasi lyelusembera kufii na Iruva. 20Na kimmba kulaore kweiyo ilyiswa mboo, 21(mashika valya mmbo valevikwa vave makohani kulaiyo ilya mboo, kyaindi we, ando amwi neelyiswa mboo kwa yeto alemmbia,
Nndumi mmbo alelya mboo nta nnyashalashaa-fo,
yewe mmbo kukee nkohani llung'anu);
22naasany kiinani na efi Yesu mmbo aleva mwisalallya kyaasa ekyo kyikee kyisha mmwasi. 23Na valya valevikwa makohani veengyi, mashika elyi valeimwa ni ufu valakee-u. 24Kyaindi we, kimmba aiyo llung'anu mmbo atiri ukohani lwakwe lulamandaa. 25Kimmba ni indo we mmbo ashidimaa ikira deny yewo vasheyaa Iruva na irina lyakwe, mashika we akee na muu mikonu myoose evaterevyaa. 26Mashika mmbo kilelukooya lutire Nkohani nniini wa ngata yei akee mweele, nalatiri uravi, nalatiri nta ivara, akee nrauwe na varavi, kavekaa uwe kairya iruveeu; 27nalatiri kimaruma kya yuuta mbele kiraso kimaruma kyeekwilyisa ulyamari lwakwe muni shaasa vakohani valya vengyi vaniini valetana, numa nooteny kiraso kimaruma kya ulyamari lwa vandu yewo, mashika we mmbo aletana indo lyimwi-nsi llya alekuuta we muni. 28Mashika uvavaso mmbo lwavika vandu vakee vafwafwa vave makohani vaniini, kyaindi irero elyo mboo yeyo ilesha numa ya uvavaso mmbo lyilevika-u Mwana, yeto amaa fyoose fika llung'anu.
Currently Selected:
VAEBRANIA 7: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
