VAEBRANIA 4
4
1Naasany, kwakooya kyaasa ekyo kyeyaanga ifureny kyisalalyi-u, lweereye, nta kulave umwi waany asheturaa ifura elyo. 2Mashika naakwa ni yese mmbo luleongoyo Nrumi ya Nsia kimwi sha wo. Lyo irero elyi lyileitiwa llyilevasennya-fo, mashika elyi lyiletura-u kyikusiryo kyeelyiwarya. 3Mashika yese lulekusirya-u mmbo lushangaa ifureny elyo shaasa aleamba,
Shaasa shilellya mboo kya unyafi lwakwa,
mmbashangaa ifureny lyakwa-fo;
na kyikava ishora elyo lyilemarisyo uka elyo uvasha lwa ulana lulevikwa. 4Mashika kwiiyo ando alesenda nkonu wa mfungare kaamba, “Iruva mmbo aleimuya nkonu wa mfungare, karau mashora moose.” 5Na yoo nang'u, “Mmbashangaa ifureny lyakwa-fo.” 6Kyasiany, kimmba irero elyi lyiiyo-da kyeyaamba veefo vasheangaa-fo, na valya valeongoywa mbony yeto kasha vakalemwa yaanga-fo kimaruma kya ulyang'a lwawo, 7kavika nkonu ungyi, kaamba na kana kya Davidi numa ya fyeeri fyaasha, “Inu” shaasa kyilererwa uka kasha,
Inu yeni, kwakooya musheita unyanga lwakwe,
mulasheumisa mirima yaany.
8Mashika kukooye Yosua evaniinga ifura, nnyesendaa nkonu ungyi wa numa-fo. 9Naasany mmbo kusaye-u ifura lya nkonu wa iimuya kwa vandu va Iruva. 10Mashika yeto aleanga ifureny lyakwe mmbo akeekyesa we muni kya mashora akwe, shaasa na Iruva nawe alefura kya mashora akwe. 11Kyasiany neese lukutakure yaanga ifureny elyo, naambo kulashekaa-fo nta nndu afwa kimaruma kya ngata yeyo yelyang'aa. 12Mashika Irero lya Iruva mmbo lyitiri muu, lyikatira finya, lyikaveva lyoovi ngota usu lukee unnwe kunu na kunu, lyikaidima ikora na yaavanisa miili na mirima, na filungo na mafura a vayo. Na lyingyi kwa vayo nkyaangu imanya makusaro na fyama fya mirima. 13Nta nkwiiyo kyuumbe kilalollyo paa mbee ya vayo-fo, na findo fyoose mmbo fikee mbereto yoo misony a yeto arye mbony teru toose.
Yesu ni Nkohani Nniini
14Kyasiany, kimmba lutiri Nkohani yeto aleanga na iruveeu, we Yesu, Mwana wa Iruva, lukutire deny na iirikyo lyeru. 15Mashika Nkohani yeu weeru Nniini nnyalelemwa itamballya neese kunu ufwafweny lweru-fo, mashika we mmbo aleeswa kimwi sheese-da kya findo fyoose, lyo nalatani ulyamari. 16Kyikeeny indo, luserikye kitima ekyo kya isarya lukee nookaari, naambo luwoni ilyillyo, na iwona isarya yelyo lyishelutaramaa kyeeri kya yaanguywa.
Currently Selected:
VAEBRANIA 4: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
