VAEBRANIA 1
1
Iruva mmbo arera neese na kana kya mwanaakwe
1Iruva mmbo alerera neese kasha kalya ka vande veru wo vakisuku, karera na shia shiingyi na kundo kwiingyi. 2Matika yaa a ulaalu mmbo arera neese na shia ya Mwana wakwe, yeto alemmbika nave muya ding'u wa fyoose, na kyeendwa mmbwe kaumba ulana loose. 3Kimmba we akee ngyesa ya usuri lwakwe na wende lwakwe, eshipoo fyoose na ivavaso lya wiidimi lwakwe, ekimaa ivika wiilyiso lwa ulyamari, mmbo alekaa rembo woko usha lwa Uniini lwakwe efo iruveeu; 4mmbo alevikwa nailannyi vasu woose, shaasa irina elyo lyikee ding'u yakwe lyileng'annya lyawo.
5Mashika lyo mmbo alemmivia nsu ungau nta lyimwi,
Nnyewe mwana-kwa,
“Inu mmbo shakwiira.”
Na lyingyi,
“Neeny mmbo nshevaa Nde kwakwe
nawe kwakwa nave mwana.”
6Na lyingyi-se, elyi aende mwana wakwe mmbee ulaniny kaamba,
“Vasu woose va Iruva vamfiirye ndi.”
7Na kya vasu kaamba,
“Yeto avika vasu vakwe vave va ngata ya mumuyo,
na varundi vakwe vave fipala-pala fya muro.”
8Kyaindi kya mbony ta mwana mmbo aamba,
“Kitima kyafo kya itumbe,
woi Iruva nkya llung'anu na llung'anu;
na ndata ya umangyi lwafo ni ya usumanu.
9Mmbo kwalanga usumanu, kwasua uravi.
Naasany Iruva, we Iruva wafo, ankwaamba mafura,
mafura a nsia ngota a wooroo.”
10Na lyingyi, yewe, Nndumi, llya kipooka mmbo kulevika uvasha lwa ulana,
“Na iruveeu mmashora a maako afo.
11Yefyo fyoose fishelyamarikaa,
lyo yewe kushesalala-u,
nato shoose tisheekaa sha soori.
12Kushetilemaa sha masara, nato taalashike.
Kyaindi yewe mmbwe ulya da,
na fyeeri fyafo mfishemandaa-fo.”
13A ndesa kwiifo nsu alemmuvia nta lyimwi,
“Kaa yewe yoo woko lwakwa usha,
kutani shavika vakiduva vafo yoo-si ya ngyayo tafo?”
14A-yeyo myoose nshi mimuyo mifurukani, yeerumwa indefurukannya valya vashevaa veni ding'u ya ukiro?
Currently Selected:
VAEBRANIA 1: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
