HABAKUKI 2
2
Nndumi Iruva Arouwa Habakuki
1Mmbo nsamaa kulya nnareny wa uringyi shiimaiye ekyo Nndumi Iruva ashiviaa kyeyaamba, shilole na kirouwo kya kiiyo kyakwa.
2Nawe Nndumi Iruva kashirouwa indi, “Reiya nisha maboony a woyo ekyo nkekoora naambo kisomwa kulaiyoo tamba. 3Reiya, mashika kyeeri kyavayo nkilefika kiutike-fo. Lyo kyeeri ekyo kikeesha uviny, neefi fisheutikaa indo. Naakwa kwalollya kyakyeeywa, lyo kushelollyaa, nta nkikyeywaa-fo. 4Rumi sheni nnyo yei, ‘Varavi woose mmbasherumakaa, lyo valya vasaari mmbafwa-fo kimmba vavikye Iruva nsia.’”
Urumato lwa Varavi
5Lyo masaa atiri ulembi. Veetalauwa ndeu mmbo vakurosa neesavaa mmbo vavakye ufu mashika lluwuraa-fo. Nkyo kimaruma valammyaa masanga na masanga valawuuraa. 6Valya velammyo mmbo vallaa na yaamba, oshiny lwa yeto alammya kaonisa ekyo kilakee kyakwe, nkyo mmbo akee n-denge. A mmbo kufikaa indii kwivaa isimba na findo fya yaakuya? 7Lyo kulore kwammanya, yeni mukelammya vengi mmbo musheveswaa siye mutaa na fya mmwasi. Mmbo musheyoo mmisa vamureremise. Mmbo vashekuraa ruu! 8Yewe mmbo kulelammya masanga engi kwavara ruu, ulaalu valya valekia-fo mmbo vashekulammyaa vataiye uwai lwafo na ufiri lwafo lwefota vandu va ulana na miri yaawo.
9Oshiny lwa nndu eengye mmba yakwe umasi lwa usoki, luve llo ngarami ya muu wakwe lumuute ando kuumu. 10Na urundi lwafo lukaengye mmba yakwe nsutu. Elyi kulelyamara masanga engyi ni yewe kumuni kulekuwonisya urumato. 11Naakwa mmawe a isimamba lya mmba mmbo akeekufuuya na firi fya kai nafyo. 12Oshiny lwafo! Mmbo kuletana muri na uravi na yuurosa na findo fya uwai. 13Valya kulevavinga mmbo valeviniswa mmashora afo vakava ruu, neekyo kyoose valetana kyikava sheelyi kyakorwa na muro kikavivika. Ni Nndumi Iruva muni matorito atana indo. 14Lyo ulana loose lusheishwa umanyo na itumbe lya Nndumi Iruva shaasa yeeve iishwe mura.
15Oshiny lwafo ewe, yewe mmbo kulelyilyisa vengyi neevasuta kutani vasinga-singa sheelyi vanangyo. 16Neewe ulaalu mmbo lyishevaa ikamba lyafo kusheonaa usutu ando a usuri. Neewe kusinge-singe sheelyi kunangyo. Nawe Nndumi Iruva mmbo ashekuniingaa efyo luve llo upata lwafo kuluni, na usuri lwafo luwuye iva usutu. 17Mmbo kulemanya nsito wa Lebanoni, ulaalu neewe kushemanywaa. Kwawaa mafisi avayo, ulaalu mafisi nng'u ashekurishisaa. Efi mmbo fishekukooyaa kyeendwa ni uwai llwa kuletana, na waafinya llwa kuletannya vandu va masanga na miri yaawo.
18Mafwanu atiri mbusha-ki ndesa? M'findo fisongosye na maako a vandu-da, na ishora lyavayo ni ivalemba yeni. Nkyokyi lyitanyaa mwilyivikau kutani alyivikaa nsia ifwanu elyo? Lyo mmbo lyikee iruva lyilareraa nta. 19Oshiny lwafo! Ewe mmbo kwavia ifwanu lya kiri, “Kwiipoo,” ao ifwanu lya iwe, “Salala-te.” Ifwanu lyitanaa-u nta kimwi kya efyo? Naakwa lyaambwa sahabu, lyikatanwa nnyo, lyo mbuiyoo muu nnang'ani yavayo-fo.
20Nndumi Iruva mmbo akee efo mmba yakwe sheele. Wo nndu nasyedo yoo mbee yakwe.
Currently Selected:
HABAKUKI 2: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
