ESEKIELI 5

Esekieli oota fii takwe

1Nndumi Iruva kashivia, “Yewe mwana wa nndu, ipoo usu woovi sha weembe lweyuuta nrwe na nguyo tafo, kwavika nrweny na kyeeriny kyafo; naasa kweepo misani ya yeesa, kwaava fii tafo. 2Kyenga kyimwi ya firaru taate muro yoo nnang'ani ya muri, masiyony a mikonu ya iringitywa kyenga kyimwi ya firaru mmbo kukakapaa na usu kwiringityaa muri, kyenga kyimwi ya firaru nkushenanataa na uraato, na yeny mmbo nshesommwa usu lwakwa shiwasore. 3Ni kyenga kyidu deny kya fii tafo, kusheepoo na ifingya yoo ikeduny lya uvany lyafo. 4Indi lyo mmbo kushipoo fii shaangu kutimamite na muro. Muro ushukaa-fo mmbo ushekoraa mmba shoose ya Israeli.”

5Nndumi Iruva aamba indi, “Yeu ni muri wa Yerusalemu, nshileuvika nnang'ani ya masanga, ukaringitywa ni ngyuruka tingyi toose. 6Mmbo uleepala mavavaso ngota masanga moose na uramba lwakwa ngota ngyuruka toose tiuringittye. Vakalema ilatya mavavaso na uramba lwakwa. 7Kweekyo, yeny Nndumi, Nndumi Iruva shaamba indi: Kimmba yeni mukee filemi mukailannya masanga yoo amuringitye nta mulakunndye ilatya ngyuramba takwa, nta itira mavavaso akwa, lyo mukalatya na itana fya masanga yoo amuringitye, 8naasany, yeny Nndumi, Nndumi Iruva shaamba indi: Yeny, yee, Yeny shikapanaa neeni, mmbo shimuutya uvingo na masanga moose alollye. 9Kyeendwa ni utefusu lwaany, mmbo shimukapa na ngapo ing'ani mulandelollye nta shilakaa shiiwuuye lyingyi. 10Yefo miriny, womi mmbo valyaa vana vawo veni kwiilollye na vana valye va-nde vawo. Mmbo nshiinutya ngapo yeti kwany na valya vasaa-fo na muu shivanyanyate taari toose.

11“Kimmba ni indo, mmbo shamulyisya mboo yeny Nndumi, Nndumi Iruva, yeni muletefusa mmba yakwa ya iterevya na ivarya findo fyaany fya mwaala, mmbo shimukapa ngapo niini shimweere si kuleefo usari nta kulasaa-fo nndu umwi. 12Kimwi kya firaru kya vandu vafo mmbo vawawaa ni ndwari na itura shoonga; kyenga kyingyi kya firaru mmbo vawawaa ni usu vekuringitye, na yewo vengyi vasaa-fo mmbo nshevananataa urukeny koose na iwalatya na usu.

13“Ni indo nsheoraa unyafi lwakwa na ifwerisa ngoo yakwa, na nrima wakwa ukooye irelela shikwiitye urilalyi nriminy wakwa. Llyo vashemanyaa sheelyi valeshirosya ngoo yeny Nndumi Iruva, kutani shavakapa king'ani indo kimaruma kya itura wiindi. 14Yewe muri wa Yerusalemu mmbo shishekwallwa kuve ukiva nnang'ani a masanga akuringitye na vandu woose yewo vasheera kufii na yewe.

15“Kwafo mmbo kivaa kindo kya usutu na kiila, wiikyimbi na yeeresa kwa masanga moose yoo akuringitye. Yelyi kyeeri shisheinutyaa uvingo uwe yafo mmbo ishevaa ngapo ivavaa kyeendwa ni kiila kyafo uwe yakwa, ni Yeny Nndumi Iruva shaamba. 16Kyeeri shishelekeya mife yakwa mikasha ya shaa, mife ya imamita, eyo shilekeyaa imuwaa, elyi shishemweengeryaa shaa niini nnu na inikira wo shoonga kutiri. 17Shikurikkye shaa na mafisi a ngoroshony akusoke vana vafo, ndwari na ngyufu shikasha amwi na fira ishekumamita yewe. Ni Yeny Nndumi Iruva shaamba.”

Currently Selected:

ESEKIELI 5: MAS2

Highlight

Copy

Compare