ESEKIELI 4

Esekieli aora iwa lya Yerusalemu

1Yewe mwana wa nndu, ipoo itofali, kwalyivika mbee yafo, naambo uwe ya vayo kwaale kya fireiyo muri; yee, Yerusalemu. 2Kyoore sheelyi mmbo ukeenringitye riti. Yefo mbai ya vayo kuvike-fo isimamba lya finya kuringitye koose na muri, na meema a vasikari amwi na masinde a iwunndwa. 3Naasany kuruuye minya shipala kuiselese ivake isimamba lya minya nnang'ani yafo na muri. Kyiwo kulole neefo muriny yeto ukeeringitywa, koore sheelyi mmbo ukeeringitywa. Kuvike kindo kyeyoora sheelyi ukeenringitye. Yekyi mmbo kyiwaa kyiringisyo kwa mmba ya vandu va Israeli.

4Lyingyi-se lala na taari ya woko umuso. Kyeeri kyoose kwiilele ngata yeyo mmbo nshekurikaa ulyamari uroo lwa mmba ya Israeli. 5Mashika mmbo shikuvikaa kulya ando a mikonu mayana araru na makumi kyeenda, mikonu yeyo iinany na myaaka ya ngapo yaawo; ni indo kukuvika ngapo ya mmba ya Israeli. 6Kwamminutya mikonu yeyo, mmbo kushelala-se na taari ya woko usha, llyo kushekurikaa ngapo ya vandu va Yuda ando a kyeeri kya mikonu makumi aana, mmbo shakuniinga nkonu umwi, kimwi sha mwaaka umwi.

7Naasa kushelola muri wa Yerusalemu yeto ukeennringitye kooroye-fo woko lulakee usikye kwiishaawuyaa fisuku. 8Mmbo shishekufingaa na nse wa minya naambo kulaidimi yaaluka taari yei ao taari ingyi; kutani Yerusalemu yalotorwa.

9“Ulaalu ipoo nganu na shayiri, maarakyi na dengu, ntama na umbi fyoose kusasande ando amwi, naasa kusongosye nkate. Nkate-eto nto ushevaa shoonga yafo kyeeri kyoose yekyo kushekooya ilala uvari lumwi, ando a mikonu yeyo mayana araru na makumi kyeenda. 10Shoonga kulyaa ni kuti yeeswa, nayo ni shekyelyi makumi avii kwa nkonu umwi, nalyo kwa nkonu mmbo kulyaa lyimwi nsi kwa kyeeri kyikwaanyi. 11Mura nato mmbo kunaa kwa yeesywa upata lumwi ava karindaru kune lyimwi kwa nkonu kwa kyeeri kyikwaani. 12Mmbo kushiipoo mando a nndu, kwaate muro kukore nkate kuulyiyye mbee ya vandu.” 13Nndumi Iruva kaamba, “Niindo vandu va Israeli vashekooya ilya nkate wawo ntefusu nnang'ani a masanga yefo kundo shikevarwaa.”

14Llyo shemmbia, “Woi mmbe, Nndumi Iruva, tusu nshilekutefuse kweelya kindo kifiiye kyeni ao kiwaawa ni ifisi lya ngoroshony, nta nshilekooye ikomba kaniny nyama ya ifisi itefusu ukya shikee nkoo-fo.”

15Naasa kashivia, “Shakuniingany mumu kwipoo kirashi kya ng'umbe, ando a mando a nndu naambo kukoore nkate wafo.”

16Lyingyi kashivia, “Yewe nndu, lola yeny mmbo shilyamara kisike kya shoonga kusurummyi yaa muriny Yerusalemu, vandu va muriny yeu, mmbo valyaa shoonga yeyo vasheesywa kwa usau. Vani mura yeto vasheesywa veshising'ang'aa. 17Niindo shitanaa naambo vature shoonga na mura, na wo umwi mmbo ashuuta pa kwa mwanamaye, nawo mmbo vasyaa kimaruma kya ngapo yaawo.”

Currently Selected:

ESEKIELI 4: MAS2

Highlight

Copy

Compare