ESEKIELI 27
27
Kiiyyo kya Tiro
1Irero lya Nndumi Iruva, lyikashisheya lyishaamba: 2“Yewe mwana wa nndu, kapa kiiyyo kya Tiro, 3kuvie Tiro, yewe kukaa yoo mwaangony wa yeeve, kwava mwiikapa mbusha na vandu va ngyuruka tilya tifiitani na yeeve, Nndumi Iruva mmbo aamba indi:
‘Yewe Tiro mmbo kulaamba,
Yeny mmbwe muni usha!
4Minyanu yafo ni yefo nnang'ani ya yeeve ikai;
yewo veekwiikara kwasennya deny!
5Mbau tafo toose ni misonobari yuukye Seniri
vakapasha mieresi ya Lebanoni;
yeesongosya ngo shaasha.
6Kwa mialoni ya Bashani,
vakasongosya-fo makasia afo;
Teesongosya kirembo ni nri muumu wuuka Kiprus.
7Kitambaa kisha kyuumu kya itira uraato kyuuka Misri,
kyikeeshifumi nisha naambo kyive pendera yafo,
na ishandarua lyafo lyikee lya fwana ya samawati na sambarau fyuuka fingyuruka fya Elisha.
8Yewo kwekee irunda nawo ni vandu wookye Sidoni na Arvadi
vandu vatiri wiidimi usha
mmbo kwekee nawo vakava veerwaa meelyi.
9Vamiku va Gebali na vafuru vesha
mmbo vekee nnang'ani yafo.
Veekwekya ilunga merikebu amwi
na varundi na vekapa mbusha
mmbo kwekee nawo yefo mashoreny afo.
10Vandu va Ajemi, na Ludi na Puti,
mmbo vekee nnang'ani ya itorito lyafo,
vandu vafo va fira.
Vakaekyera ngao tawo na kofia ta fira yefo turuveny yafo;
vakakweengye uviny.’
11“Vandu va Arivadi na Hele mmbo vesalelyi iringitya riti masimamba a turuve yafo, na vandu va Gemadi vakasalala yefo minareny yafo, vakandevanika-fo ngao tawo vakaringitya isimamba lya turuve yafo, taari toose vakaringitya usha lwafo. 12Tarshish mmbo ekee mwikapa mbusha kwafo, kimaruma kya umasi lwafo lwa wo ngata; mmbo kwetiri fesa, na minya, na mabati, na risasi, vakakapa mbusha naambo vakooye iwona findo filya fyekee ikumbwa. 13Vayunani, na Tubali na Meshiki mmbo vekee vandu vafo vekapa mbusha neewe. Valya vekumba vandu na findo fyawo fya arera. 14Vandu va mmba ya Betitogama mmbo vekekapa mbusha, kwa frasi ta fira, yee kwa frasi ta fira na mishungu, naambo vakooye iwonisa findo fyafo filya fyekeekumbwa. 15Vadedani mmbo vekee veekapa mbusha fingyuruka fya kulya mbambaa ya yeeve, fiingyi mfo kundo kwekee ikapya mbusha kwialashaa findo fyafo nawo, vakakweengye mbembe na mpingo. 16Vandu vengyi wooka Shamu, vakava vekapa mbusha neewe kimaruma kya findo fiingyi fya mashora a maako kwetiri, vakakweengye soori, sumaridi, sambarau, soori shifumi, kitani kisha mawe a yeela na akiki. 17Uruka lwa Yuda na Israeli, mmbo vekee vekapa mbusha vafo, naambo veedimi iwonisa findo fya mashora a maako afo, vakakweengye: nganu ya miniti, na ntama, na wukyi, na mafura afwaamaa. 18Demaski mmbo vekee vekapa mbusha vafo, naambo veedimi iwonisa findo fiingyi fya mfinyu wa Helboni, na sufu shaa pyai. 19Vedani na Yavani mmbo vekapa mbusha kupookya Usali kwa masaa afo, kwa minya ikee shikape, na mdalasini, na surumuta, ni findo fyekee yefo umasiny lwafo. 20Dedani mmbo ekee mwikapa mbusha wafo, wa soori ta wuuru uniini ta yeallya frasi. 21Arabia, na vaniini woose va Kedari mmbo vekee vekapa mbusha va woko lwafo, ekee ni moonri, na suva na mburu kwa yewo vekapa mbusha neewe. 22Vekapa mbusha va Sheba na Rama, mmbo vekapa mbusha neewe, mukaalashana findo. Vakaniingya marashi akee mesha, na wo ngata ya mawe a wuuru, na saabu. 23Haran, Kane na Eden Ashuru na Kilmadi mmbo vekee vekapa mbusha vafo. 24Yewo mmbo kwekapa nawo mbusha ya findo fya wuuru, soori shisha ta wo ngata, na masanduku evika soori, akee mafinge na fyoove fya nri wa mieresi yefo maseeny afo. 25Merikebu ta Tarshish tikava nto tikekurika masaa a umasi lwafo ndesa akee meengyi.
‘Kwava nndu kwavesywa nnu,
yefo mashoreny a maako afo.
26Kyeeri varundi vafo valekukyira na mura
uraato lwa taari ya ngama
lukakurwaa kwaasha urukeny na mbai ya yeeve.
27Masaa afo, fimu fyafo na umasi lwafo,
varundi vafo va mureny na nginiiu,
neewo vepasha malalo vafo,
na vekapa mbusha vafo,
na vandu vafo woose vekapa fira,
neewo vakee yefo nnang'ani yafo,
amwi na itorito lyafo lyoose yelyo lyikee nnang'ani yafo,
mmbo vashemirwaa ni uroo lwa yeeve,
nkonu ushaa va imamitwa lyafo.
28Kyoorongye kya varundi vafo,
va mureny na nginiiu mmbo kisheresee.
29Yewo woose verunda na merikebu yefo mureny
mmbo vashekillya sumbai.
30Nawo mmbo vashekapa kiiyo kimaruma kyafo,
nawo vashefiira kwa mavavio,
na ikufwallya kiluulyi mirweny yaawo,
na ikwalalaa yefo sumbai ifuny.
31Mbashoota nrwe na weembe kimaruma kyafo,
neekufingya makunnya,
kiiyo kya mavavio kishevarovya miriny yaawo.
32Vekee kiiyony, vakakuyiiya yewe vakakufuuya nnu.’
A mmbovi avakyaniswa na Tiro
yeto alemmirwa ni yeeve?”
33Llya kuleilula masaa afo ooka yeeven,
mmbo kulewuutisa vandu va masanga,
umasi lwafo lukaallwa vamangyi
va ulana vakava masimba.
34Kyeeri kulefishwafishwa mmatundulu a yeeve,
kwafika-si kidede kya mura,
umasi lwafo na varundi vafo woose,
vakarekya mureny amwi na yewe.
35Woose valya vakee kulya fingyurukeny filya, firingyityo ni mura,
mmbakeekutinnywa yewe,
na vamangyi vawo vakeereya nnu,
na weerei lukalollywa fisanguny fyawo.
36Vekapa mbusha nnang'ani a masanga vakasongololo vakairyaa nnu,
kwava kindo kyeeresye valashewovywa ni ngatara tafo, elyi
kulakilollywa-se lyingyi llung'anu.
Currently Selected:
ESEKIELI 27: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
