ESEKIELI 26

Ukyisuku lwa Tiro

1Kwikee mwaaka wa ikumi na lyimwi, mwiri lyimwi, irero lya Nndumi Iruva lyikashisheya lyikaamba: 2“Yewe mwana wa nndu, Kimmba Tiro anrera kya Yerusalemu, ‘A! Ngyiri ya masanga a vandu amisya finya, nnyakishiidimaafo.’ 3Naasa Nndumi Iruva mmbo aamba indi, Yewe Tiro, lola mmbo shikee kyilasha kyafo, neeny mmbo shikweengye masanga meengyi ekapana neewe sheelyi yeeve irosaa matundulu a vayo! 4Nawo mmbo vashelyamara masimamba a Tiro, na ifishafisha minara; neeny mmbo shishaiyaa-fo kiluulyi kyoose kushesaa-u ngyina sheni. 5Kusheva ando kweyaanika mireiyo ya veereiya makunga nnang'ani a yeeve; mashika yeny mmbwe sharera irero yelyi; ni Nndumi Iruva aamba, nawe mmbo ashevaa ulyamaro lwa masanga, 6na vefu vakwe yewo vakee yefo mareminy mmbo vashewaawa na usu; nawo llyo vashemanyaa sheelyi yeny mmbwe Nndumi Iruva.

7“Mashika mmbo Nndumi Iruva aamba indi; Lola, mmbo nsheende Nebukadnesa, mangyi ya Babilony, mangyi ya vamangyi, uwe ya Tiro ooka na taari ya ndoo, amwi na frasi na mitika ya fira, na vesaama frasi na itorito lya fira amwi na vandu veengyi. 8Mmbo vefu vafo vashewaawa na usu yefo mareminy; ashesaleesa ulale lwa vandu ishekapana neewe, ashewaaya ntaato ikapana neewe, asheeboo ngawo yeekapana na yewe. 9Nawe asheeboo fisha fyakwe fyeewundwa masimamba afo, amwi na fyaara fyakwe, ashetuula si minara yafo. 10Ngata frasi takwe tikee shiingyi, mmbo funga yeyo ya fireto ishekulumalumaa, masimamba a mmba tafo mmbo ashering'inaa kyimaruma kya ntiri na kyoorongye, kyeendwa ni vesaama frasi na mitika yaawo; kyeeri asheangaa yefo ngiriny yafo sha vandu vashaangaa andu muri wafishwa. 11Kyuuka na mbungashu ta frasi takwe mmbo ashevavara shia tafo toose, nashewaa vandu vafo na usu, na minara ya finya tafo mmbo ishewaa sumbai.

12“Mmbo vasheallwa umasi lwafo luve mifungwa amwi na fimu fyafo, vashewunndwa masimamba afo. Na ilyamara mmba tafo shisha, mawe afo, mbau na uteeri fyoose vashefyeera yefo ndillyiny nnang'ani. 13Mmbo shishevikaa umando lwa fiimbo fyafo, na unyanga lwa fiwale fyafo yefo lulakaa luitiwa lyingyi. 14Neeny mmbo shishekwaallwa iwe lya ngyina, kusheva ando kweyaanika mireiyo ya veereiya makunga, nkukyikaa kutanwa lyingyi-fo; mashika ni yeny Nndumi Iruva sharera, Nndumi Iruva mmbwe aamba.

15“Nndumi Iruva mmbo avia Tiro irero yelyi: A ndesa fingyuruka yefyo fikee mbaamba ya yeeve mfiring'inaa yelyi kushewaa na ntiri nniini, elyi valya woondore veelaa, elyi ishishwa lyisalala nnang'ani yafo? 16Llyo vasongoru woose va yeeve vashelekyeyaa fitima fyawo fya ushilyi na ikwaammbwa masara awo na ikuuta soori tawo yeto shishope; Vatirwa mmbweerei, vashekaa sumbai vereremaa kuleefo kyiimuyo na ikutinnywa. 17Nawo vashekuyiiya vashekuvia, ‘A mmbo kileva inda kutani kwalyamarika! Yewe kweekee na veni muri,

Vandu va muri yeu vakashillya yeeve shoose

yewe na vandu vafo woose

Yeni moose sanda na valya mufiitani nawo mukeereswa

18Ulaalu fingyuruka nfirerema,

yelyi nkonu wa iwa lyafo ushefikaa

Yee, fingyuruka yefyo fikee yefo

nnang'ani a yeeve fishesavaa.’

19“Mashika Nndumi Iruva mmbo aamba indi; Yelyi kyeeri shishekwaallwa kuve muri nkiva sha miri ilakawa ni vandu, kyeeri shisheende ndilyi uwe yafo, na mura mwiingyi uwe yafo ushekulumaluma. 20Llyo shishekoolotaa sumbai, shikusande amwi na valya vakeeyooloka irininy, yefo kukee vandu vakuu, shikurike irininy sumbai kundo kutiri ukyiva ukya kasha, shikusande na valya vakeyooloka yefo irininy; naasa yefo kwafo kulasheva-fo vandu, nta kulashelollywa lyingyi kunu urukeny nta itumbe lyafo kunu nnang'ani ya uruka lwa vandu vatiri muu 21Shishekwaallwa kuve kindo kya weeresi, nta nkukikaa-fo lyingyi-fo na kwaruuywa nkulollywa lyingyi deny-fo, ni Nndumi Iruva aamba.”

Currently Selected:

ESEKIELI 26: MAS2

Highlight

Copy

Compare