YUUKA 26

Yeemeny lya Nndumi Iruva

(Yuu 36:8-38)

1Naasany songosya ando ekaa kukee kwaave ka ikumi, nsoori shisha ikee shyooke, ando amwi na nruu ta fwana ya samawi na ya sambarau, na idodorye, ando amwi na, ishora isha lya mfuru. 2Waasha lwa soori yeyo luve maako ikumi na avii na ivari lya vayo maako avii, soori eto teerummbwa tive ta kyeeso kimwi-nsi. 3Soori eto isaanu mmbo tilungwaa ando amwi, yei na yei na engyi-se araanu alungwa ando amwi elyi na elyi. 4Neewe mmbo kushesongosya, ifiringiso lya fwana ya samawi taari imwi yoo ikeduny lya vayo, indo kutani yoo mbai ya soori yeyo. 5Vika mafiringisyo makumi, araanu yoo sooriny imwi na mafiringisyo makumi araanu yoo mbai ya soori eyo yoo ikulunngye, mafiringisyo yoo aiduvani. 6Kusongosye-u fifungo makumi araanu fya saabu neelunga soori eto na fifungo efyo, na ando yoo ekaa ashevaa amwi.

7Neewe songosya ipasia lya mafwaa a mburu ave yeema yoo uwe ya ando ekaa, songosya mapasia ikumi na lyimwi. 8Waasha lwa wo ipasia ni maako makumi araru, na ivari lya wo ipasia ni maako aana, mapasia yoo ikumi na lyimwi mmbo asheva a kyeeso kimwi. 9Naasany kulunge mapasia araanu kyaanya, na mapasia arindaru kyaanya na ipasia lyilya lya karindaru kulyivike yoo mbee ya ando yoo. 10Vika mafiringisyo makumi araanu yoo kufurumyi taari ya ipasia elyo lyifurumyi kwa yoo malunge, na mafiringisyo yoo kufurumyi kwa ipasia elyo lyikee kipoo ya yoo a kavii akee malunge ando amwi. 11Lyingyi songosya fifungo makumi araanu fya arera, kufivike efo mafiringisyony alya neelunga yeema ando amwi, naambo lyive lyimwi. 12Na kyenga kilya kya kyasaa-u, ekyo kyilunngye mapasia a yeema kyenga kilya kya ipasia kyasaa, kyinunuke taari ya numa ya ando yoo ekaa. 13Na waasha elo lwa woko lumwi taari imwi na woko lumwi taari yeyo ingyi, ya waasha lwa mapasia yeyo ilesaa, mmbo tishewoyaa yoo mbai ya ando yoo, taari yei na taari yei na taari yei naambo iisikkye. 14Neewe songosya kifiniko kya yeema elyo, kya masara a suva akee maambe fwana idodorye, na yoo uwe ya vayo kifiniko kya masara mesha.

15Neewe songosya maboo a ando yoo eele a nri wa mshita asaleeswa, 16Wo iboo mmbo lyishevaa waasha lwa maako ikumi, na ivari lya iboo lyive woko lumwi na kyenga. 17Wo iboo lyitire ngyulumi ivii, tikee shilunge ando amwi, niindo maboo moose a ando yoo ashevaa. 18Kusongosye maboo a ando yoo, maboo makumi avii avikwa taari ya sinde alle-fo. 19Neewe songosya firembo makumi aana a fesa kwasi ya maboo alya makumi avii, firembo fivii kwasi ya iboo lyimwi, fiwarye ngyulumi tilya ivii, na firembo figyi fivii si ya iboo lyingyi fiwarye ngyulumi ivii. 20Na taari ya kavii ya ando yoo, taaari ya ndoo maboo makumi avii, 21na firembo fya vayo fya fesa makumi aana, firembo fivii kwasi ya iboo lyimwi, na firembo fivii-se kwasi ya iboo lyingyi. 22Lyingyi kusongosye maboo arindaru kimaruma kya taari ya numa ya ando yoo taari ya nkwaany. 23Lyingyi songosya maboo avii kuvike mbai efo numa.

24Efo kwasi ni ivii ivii, nato mmbo tilungwaa ando amwi eto tivakyani, tifike uwe yoo kiringityeny kya vayo, toose ivii niindo tishevaa, kimaruma kya mbembe eto ta vayo. 25Maboo mmbo ashevaa nyanya, na firembo fya fesa, firembo ikumi na firindaru, firembo fivii kwasi ya iboo lyimwi, na firembo fivii kwasi ya iboo lyingyi. 26Neewe songosya fyeeko fya mshita, fyeeko firaanu kwa maboo a taari imwi ya ando yoo, 27na fyeeko firaanu kwa taari yeyo ya kavii ya ando yoo na fyeeko firaanu kwa taari yeyo ya numa taari ya nkwaany. 28Na kifyeeko ekyo kikee nnangani a maboo yo lyilollywa taari yei na yeyo ingyi. 29Na maboo yoo ashesikyoo ni saabu na pete ta vayo teevika fyeeko filya kufisongosye ta saabu na fyeeko efyo kufyaambike na saabu. 30Na ando yoo ekaa kusheasaleesa shaasa kuleorwa kulya ifumbu-u.

31Numa kusongosye ipasia lyesikkya lya ruu ta fwana ya samawi na fwana ya sambarau na fwana idodorye ya kitambaa kisha kikee kyooke, lyifumwa neevikwa lyive ishora lya mfuru nsha, 32naasa kulyivanike ngony iinya ta nri wa mshita tikeeshisikkye kwa saabu, fifingyo fya vayo five fya saabu na firembo fya fesa fiina. 33Neewe vanika ipasia elyo efo kwasi ya fifungo filya, neewe kweendeny isanduku elyo lya mavavaso kulyivike efo numa ya ipasia elyo lyaave yoo nnang'ani a ando yoo kweele na yoo kweele mmwasi. 34Neewe vika kitima ekyo kyesarya yoo uwe ya isanduku elyo lya mma, ando yoo kweele nnu deny. 35Na mesa ilyayo kuivike kipoo ya ipasia elyo na kiri ekyo kya yeekyera taa kufii na mesa taari ya sinde, yo mesa ikee taari ya kwa ndoo. 36Lyingyi kusongosye kindo kyesiika mwaango wa yeema, kusongosye na ruu ta fwana ya samawi, na sambarau na fwana idodorye, ta ruu shisha shooke neevikwa utore. 37Neewe songosya ngo isaanu ta nri wa mshita kwa kindo ekyo kyesiika mwaango kutisikye na saabu; na kulabu ta vayo tive ta saabu, kureiye na firembo fya vayo firaanu fya minya ya arera kimaruma kya vayo.

Currently Selected:

YUUKA 26: MAS2

Highlight

Copy