YUUKA 25

Firaso Fyeele fya Yeemeny

(Yuu 35:4-9)

1Nndumi Iruva karera na Mose kammbia, 2Via vana va Israeli vashuutye firaso, wo nndu yeto nrima wakwe wammuruma muwarye kwakwe kiraso kyakwa. 3Na firaso mushewaryaa efo kwawo nfyo efi, saabu na fesa na minya ya arera. 4Na nruu ta fwana idodorye na ta sambarau, na soori ta, ruu, na mafwaa a mburu, 5na masara a suva maambe fwana idodorye, na shonyi ta pomboo na miri ya mshita, 6na mafura a taa yeyo na mafura afwaama ekwaamba, 7Mushisongosye soori ya iraa ya shohamu ya mbafuny ishevikwa-fo naivera. 8Nawo vandesongosya ando kweele kuve ni ando kwekaa nnang'ani yaawo. 9Efi fyoose ndesa shammaa imoora kiringisyo ni indo mushekoyaa ifitana.

Isanduku lya Kyaasa

(Yuu 37:1-9)

10“Songosya isanduku lya nri wa mshita waasha lwa vayo luve marambo avii na kyenga na ivari lya vayo irambo lyimwi na kyenga na yeenda uwe irambo lyimwi na kyenga da. 11Neewe kulyisikye na saabu efo mbai koose. 12Neewe mmbo kusongosyaa nrashi yiinya kuvike marende yoo a vayo nrashi ivii taari imwi na ivii taari ingyi. 13Neewe vika ngo shaasha ta nshitaa na iisikkya na saabu. 14Neewe vika nrashi tilya tikee efo taariny ivii ta isanduku naambo teekkye yiiboo isanduku elyo. 15Ngo eto mmbo tikaa efo nrashiny eto ta isanduku, tilauto-fo-fo. 16Kwammaa vika maboo amma efo isandukuny elyo nshekuningyaa.

17“Neewe mmbo kusongosyaa kitima kya saabu shisha, kitima kya isarya waasha lwa vayo marambo avii na kyenga na ivari lya vayo sentimita makumi aana na isaanu. 18Neewe songosya makerubi avii a saabu kyive ni ishora lya maako, kuvike yoo kiriny ekyo kyeelyillya taari na taari. 19Vika Kerubi lyimwi mbai yei na lyingyi mbai yeyo ingyi, songosya a ngata imwi na kiri kyesaria, taari yei na taari yei. 20Na yoo mmbo ashiipoiyoo maaru uwe, neesikkya kitima ekyo kyesarya na maaru awo, na fisangu fyawo fikulole, yeu na yeu, fisangu fya ewo mmbo filolaa kiri ekyo kyesarya. 21Vika kiri ekyo kyesarya yoo uwe ya isanduku elyo, llyo kushevikany ukureeki elo nshekuninngyaa efo isandukuny elyo. 22Na yoo ng'u nshekwanannyaa neewe, neerera neewe yoo shikai uwe ya kiri ekyo kyesarya, nnang'ani ya vayo yoo kukee uwe ya isanduku elyo lya mma, findony efyo fyoose nshekuvavasyaa kimaruma kya, vana va Israeli.”

Mesa Yeniingya Nkate kwa Iruva

(Yuu 37:10-16)

23Neewe mmbo kusongosiaa mesa ya nri wa mshita, waasha lwa vayo maako avii, na ivari lya vayo woko lumwi, na yeenda uwe woko lumwi na kyenga. 24Kuisikkye na saabu shisha, kuiringitye na saabu taari toose. 25Kuiringitye na urungo taari toose, ivari lya vayo marambo aana, na urungo lulya kulutokope na saabu efo mbai ya vayo taari toose. 26Kuisongosie fipulyi fiina fya saabu, kuvike fipulyi efyo yoo mbai eto yiinya yoo marendeny a vayo aana. 27Fipulyi efo fivii fikee kufii na urungo elo, kuve ando eevika firi filya fya yiipoo mesa eyo. 28Vika firi efyo fya nri wa mshita, neefisikya na saabu, five fya yiipoo mesa eyo. 29Neewe songosia saani tavayo, na miriko ya vayo na makopo a vayo, na fikombe fya vayo fyeletya, fyoose fisongosie na saabu shisha. 30Neewe mmbo kushevikaa mikate eyo ya yoora yoo meseny mbee yakwa kyeeri kyoose.

Kisinde kya Yeekyerya taa

(Yuu 37:17-24)

31Neewe songosya kirembo kya taa kya saabu shisha, kirembo ekyo kisongosywa ni mfuru, kirembo kya vayo, na kiri kya vayo, fikombe fya vayo, utore lwa vayo, fyoose mmbo fivaa fya ngata imwi. 32nakyo mmbo kishetiraa maako arindaru ookye yoo mbee ya vayo, maramba araru a kirembo taari imwi na maramba araru a kirembo ekyo taari ya kavii. 33Wo iramba lyimwi, mmbo lyishevaa na fikombe firaru fivakkye kivaro kya mlosi wo lyimwi lyitiri kirembo na kivaro kya-va-yo 34Amwi na urungo elo, mmbo kushevaa-u na fikombe fiinani fivakkye fivaro fya mlosi, amwi na fifiringisyo na fivaro fya-vayo. 35Ando maramba alya arindaru akeesomukkya nang'u mmbo kushevaa na fifiringisyo kwasi ya maramba alya arindaru. 36Fifiringisyo efyo na maramba a-vayo mmbo ashevaa kindo kyimwi amwi na ando yoo kweevika taa. Nakyo kyoose mmbo kishesingwaa na saabu shisha. 37Kuwuye isongosya taa tingyi mfungare, kushetivika uwe ando a-vayo naambo tikooye imikkya yefo mbee. 38Kushesongosya-se wo mwaaro na saani ya vayo kwa saabu shisha. 39Kusheruuya filo makumi araru na firaanu fya saabu shisangye nisha, neesongosya ando yoo kwayeekyera taa amwi na ffya fyavayo. 40Lola kumanyi shelyi mmbo kushesongosya ndesa llya kuleloshwa kulya ifumbuu.

Currently Selected:

YUUKA 25: MAS2

Highlight

Copy