YUUKA 2

Iwonika lya Mose

1Nndu umwi wa mmba ya Levi kakupoo kandeora mwana wa kyika wa mmba yeyo ya Levi. 2Nka ulya kakufinga kaira mwana, nawe ekilollya ni mwana nsha nnu kansuruma ando a miiri iraru. 3Ekilollya nnyashidimaa insuruma mmwasi, kansongosya isambi lya makongye, kalyaamba muuya muu, kavika-fo mwana, kandemmbika yoo mbaa-mbaa ya mura wa Naili 4Mfwamaye wa nkoku ulya kakaa kwaasha nalole kindo kipaana mwana. 5Naasa mfu wa Farao kaoloka naambo nandekusangya efo mureny, na fishinga fyakwe fikarua-rua efo mbai ya mura; nawe kalollya kiisambi kilya kulya mureny, karuma kyishinga kyakwe naambo nandekyeende. 6Kakyifunnwa, kalollya mwana ulya, nawe ate mmbo akeiya. Naasa kallyillya, kaamba, “Yeu ni umwi wa vana va Vaebrania.” 7Naasa mfwamaye wa mwana kavia mfu wa Farao, “A sheenda shindevanga mwilela efo kwa vaka va Kiebrania, nashe kwafo, nakweekkye yoota mwana yeu?” 8Mfu wa Farao kaamba, “Yee, enda. Mwana ulya keenda kandevaanga maye wa mwana.” 9Mfu wa Farao kammbia, “Ipoo mwana yeu kusheekkye imoota, neeny nshekuningaa weesi lwafo.” Nka ulya kawarya mwana ulya kandemoota. 10Mwana kang'ana, maye kamweende kwa mfu wa Farao, kava mwana wakwe. Kanfishya irina lyakwe ni Mose, kaamba, “Ni elyi shilemuuta mureny.”

Mose Arisshya Midiani

11Naasa, Mose ekiva nndu nniini, nkonu umwi kakupoo keenda kwa vana va maye, nalole mario awo. Kalollya Mmisri akeekapa Mwebrania, mmbwe umwi wa vandu vakwe. 12Kalola efo neefo, eekilollya nkwiyo nndu, kakapa Mmisri ulya kansuruma nsangeny. 13Kakupoo-se elyi lya ndesi, kalollya vandu vavii nawo ni Vaebrania nawo vakekapana. Kavia ulya ekeelammya ulya ungyi, Nkyiki elyi kukeekapa yeto ungyi? 14Nawe kammbia, “Ni vi alekuvika yewe kuve mwilusalallya na mwiluleta? A mmbo kukunndye ishiwaa neeny shaasa kulewaa Mmisri ulya kwansuruma nsangeny. Mose keereya, kaamba, ‘Ate mbony ilya ilemanyika.’” 15Naasa kyeeri Farao alemanya kakunda iwaa Mose, kyeendi Mose karisha kooka kwa Farao, kakaa urukeny lwa Midiani kakaa kufii na kirori kya mura. 16Naasa nkohani wa Midiani mmbo eetiri vana va kyika mfungare nawo vakasha isheraa mura, vakaishura fiiya fyawo mura naambo vaniinge findo fya ndeye waawo. 17Veesa findo vakasha vakavaumbuta, kyeendi Mose kasalala kaveekkya, kaniinga findo fyawo mura. 18Kyeeri valefika kwa nde waawo Reueli, kaamba, “A mmbo kyava inda elyi inu mwawuya uviny?” 19Ni Mmisri umwi alwaauwa maakony a veisa findo, na mmwasi yeefo, karaiya mura kaniinga ironda. 20Kavia vefu vakwe, “A nkwi akainy? A nkwi mwara nndu yeto? Endemmbaangeny nashelya shoonga.” 21Mose kalanga ikaa kwakwe, nawe kanninga mfu wakwe, Sipora. 22Nawe Sipora kairya Mose mwana wa womi, kammbaanga Kershomu, kaamba, “Mmbo shikee muny urukeny weny.”

23Naasa numa ya mikonu yeyo mangyi wa Misri kafwa; vana va Israeli vakarovywa kimaruma kya ushinga elo, vakakapa kiiyo kyikarwa kikafikkya Iruva kimaruma kya ushinga elo. 24Iruva keeta kiiyo kyawo, Iruva kakummbwa kyaasa kilya kyakwe alevikkya Abrahamu na Isaki na Yakobo. 25Iruva kalollya ilyiswa ukyiva lwa vana va Israeli, na Iruva kamanya ukyiva lwawo.

Currently Selected:

YUUKA 2: MAS2

Highlight

Copy