MWIILOSHA 8

1Mmbi eto akee sha nndu nnrango?

Mmbovi eeshi isununda ngata mbony tikai?

Urango mmbo lweengye nndu nsia,

Na makusaro yoo anrovye akaalashika.

Inndya mangyi

2Yeny mmbo shaamba: Inndya ivavaso lya mangyi, mashika ekyo ni kyaasa kyeele kwammbika kulootepa-fo. 3Kulaangusye yuuka mbee ya usangu lwakwe-fo, nta itana efyo filansennyaa mashika mangyi mmbo ashiidimaa itana ekyo akunndye. 4Ekyo mangyi ammaamba nkwiifo nndu ashiidimaa yaalasha-fo; mmbovi akarya immbesa nkyoki kukeetana. 5Eto ashiinndya mavavaso nkwiifo mbony aveswaa-fo, na makusaro a nndu nnrango mmbo amanyaa fyeeri na shia. 6Mashika wo kindo mmbo kitiri fyeeri na shia ya-va-yo; lla neelyi mwana wa nndu akee nrovye ni ngatara shiingyi. 7Mashika nnyeeshi kindo kyikee numa-fo; mmbi-nta ashiidimaa immbya ekyo kyikeesha numa? 8Nkwiifo nndu atiri wiidimi lwa muu wakwe-fo; ao nkonu wa ifwa lyakwe-fo. Nkonu wa misa nkwiifo nndu aturunnyaa-fo; na ukasha llushiidimaa ikira nkasha-fo.

Vakasha na vasongovisi

9Kyeeri sheekesununda mbony eti mmbo shilekooya findo efyi fyoose fikeetanyika yaa ulaniny. Kyeeri nndu atiri finya yeelammya ungyi neemwaafinya. 10Shalollya vandu vakasha veerikwaa, veishivye yaanga neesomuka efo kundo kweele nawo mmbo veekeyiindywa neerumishwa efo kweni muriny kundo veekerunndya makasha yoo awo. Efyo fyoose ni maariso. 11Vandu mmbawona ngapo llya yeni-fo nkyo kimaruma vakeetana makasha wo nkonu. 12Nndu llyamari mmbo ashiidimaa itana ulyamari ka iyana lyo kakaa-fo na muu. Lyo yen kindo kyimwi shiishi, ni ngoma valya veinndya Iruva kyimaruma vakee vasongovisi. 13Lyo kwa valyamari nkwiifo ifura-fo. Wo mmbo vashiira veru sha kirishe nta mmbavaa na muu mwaasha-fo mashika mmbaleinndya Iruva-fo. 14Mmbo shilekooya kindo kyingyi kikasha deny yaandi ulaniny: Kindo kyikwaani itannywa vandu vesha vakatannywa vandu vakasha na kindo kyikwaani itannywa vakasha vakatannywa vandu vesha (vasongovisi). Nafyo efi fyoose ni maariso. 15Yeny mmbo shaamba, ni kyeni nndu kafura yaandi ulaniny mashika nkwiifo kindo kisha sha nndu ilya na ina na ifurisa nrima-fo. Efyo mfyo findo nndu ashiidimaa itana, efurukannyaa muu wakwe kyeeri kyoose, eto Nndumi Iruva anniingye yaa kwaasi ya ngina. 16Kyeeri shilesununda mbony kwa urango lwakwa loose ikunda imanya mmwasi ngata findo fitanyikaa yaandi ulaniny, mmbo shilekooya ate nndu mmbo kushiidimaa ilala rembo kio na nsanyiny, 17naasa shakooya nndu wa vandu nnyashiidimaa imanya mashora yaa a Iruva akeetannyika kunu ulaniny-fo. Ewo vatiri urango mmbo vakee kwaatara kyaruu. Veshaamba vashiidimaa lyo mmbashiidimaa imaanya-fo.

Currently Selected:

MWIILOSHA 8: MAS2

Highlight

Copy

Compare