MWIILOSHA 7

Muu wa nndu

1Ngaa shisha ya nndu, mmbo yiilannyi, mafura afwaamaa nisha a wuuru

Ni kyeni nkonu wa ifwa ngota nkonu wa iwonika.

2Ni kyeni kweenda ando vafiiywa,

Ngota kusheenda ando vakeefura mashika ewo vakee na muu,

Nkikwaani vamanyi sheelyi ufu ni kwa vandu woose.

3Tingwa ni kyeni ngota seko,

Mashika tingwa yoo usanguny mmbo yafweerisa nrima.

4Nrima wa nndu nrango ni mmba ya kiiyo,

Indi nrima wa nndu nrung'ani ni mmba ya seko.

5Ni kyeni yaarannya usakiro lwa vandu varango,

Ngota yaarannya fiimbo fya vandu varung'ani.

6Mashika seko ya nndu nrung'ani,

Mmbo ivakye miinga ikeeriika rukony na efyyo fyoose ni maariso.

7Kwakooya nndu nrango alamya o fyoose,

Nndu mmbo akwaallwa nrung'ani we muni,

Kwakooya nndu awarya kindo kisurukumu mmbo akeefuluta usumanu,

8masiiyony a mbony ni kyeni ngota mapookyony a vayo,

Mwisisirya efo nriminy ni mbusha ngota yeto mwikushopa.

9Kulave mwaangu weerosa nyashi-fo,

Mashika nyashi mmbo ikaa mbafuny ya nndu nrung'ani.

10Kulavese, “Nkyiki elyi fyeeri fya mbee fyeekee mbusha ngota fyeeri fya ulaalu?”

Ivesa indo ni kindo kya urung'ani.

11Iva nnrango ni mbusha sha ya mwiiningwa ding'u,

Nakyo nkuti kwa valya veefo na muu.

12Iva nndu nnrango;

ni kyimwi sha nndu atiri ding'u,

13Kusare kya mashora Iruva atannyi;

Mmbi ashiidimaa yoorwa filya fikee malomilomi?

14Kyeeri kya mbora fura nakyo na kyeeri kya ukiva kuveekusara efyo fyoose fivii, kya mbee na ekyo kya kavii mmbo fyuukye kwa Iruva, naambo nndu alaidimi imanya nkyoki kilatyaa numa yavayo. 15Efyo muuny wakwa moose mmbo shilellollya wo kindo, ifwa nndu nsongovisi, lla neefo akee nsongovisi nndu alakee nsongovisi ikaa-fo na muu mwaasha lla neefo alakee nndu nsongovisi. 16Naasany lola, kulave nndu nsongovisi nnu-fo; nta nndu nnrango-fo mashika mbusha nnyo-ki ikuuta muu wafo yewe kumuni? 17Lola kulasheeva nndu nkasha nnu nta nrung'ani! Nkyiki elyi kufwaa kulaore kyeeri kyamfika? 18Kindo kyikwaani ni yiindya moose akee avii, mashika kwava mwiyiinndya Iruva mmbo kushevaa wa ngoma. 19Urango luniinga nndu nsongovisi finya mmwasi kailannya vamangyi ikumi vakee muriny. 20Ni kya dede nkwiifo nndu nsongovisi ulaniny atanaa mesha kyeeri kyoose nalatani ulyamari-fo. 21Kulasheyiirikya mbony toose yeto tishambawaa mmbandu, kulasheyiitya ishinga lyafo lyilenkwaarara. 22Neewe efo nriminy wafo kwiishi-deny sheelyi kulemming'asha vengyi kyeengyi.

Itereva iva na urango

23Efi fyoose shilefisoongya na urango lwakwa shaamba, “Ni kyeni nndu iva nnrango!” Shatura wiidimi. 24Ni shia-ki, nndu ashiidimaa imanya muu nkyokyi; ni kindo kiroo, kweru ni kindo kyuumu deny imanya. 25Mmbo shilemmatarika nnu neekulosha shive na urango lweemanya findo fiifo nnang'ani ya muu wa nndu shakooya iva ntondo ni upeere, neeva nrung'ani ni ukwale.

26Shashekwaanannya lyingyi na kindo kivavaa ngota ufu ni nndu nka, eto nrima wakwe uvakye nreiyo wa makunga, na maako akwe akavaka mise kulashiidimaa ikuporommwa. Kweekyo nndu mwiindya Iruva ni kuti akwiise nka yeto. Lyo nndu llyamari kwakwe ni kindo kyuumu. 27Ni yeny Mwiilosha shakuvia efi mfyo findo shilekooya-fo kyeeri shekeesununda mbony eti ntere kwi ntere. 28Mmbo shikunndye isuma mmwasi mbony eti, indi-lyo shalemmywa nnang'ani. Nnang'ani a vomi kyiku kyimwi mmbo shilekooya-fo nndumi umwi-nsi akwaani yiindywa. Lyo vaka sheewo nshilekooya-fo nta umwi akwaani yiindywa-fo. 29Kunu mbony yei mmbo shilekooya-fo sheelyi Iruva mmbo aleumba nndu nsha nsongovisi aorokye nisha, lyo kasheva ntefusu neekwaaruwa efo ulyamariny.

Currently Selected:

MWIILOSHA 7: MAS2

Highlight

Copy

Compare