AMOSI 3

1Yeni vandu va Israeli, arannyiny nrumi yei yooka kwa Nndumi Iruva, yeni moose muleuka Misri. 2Nnang'ani ya vandu va masanga moose ni yeni tupu shilemusauwa shimukapannyi. Neekyi nkyo kyeenngye ngyulyamari tany tikang'ana nnu, neeny nkuti shimukapeeny:

Uramba lwa Nkisuku

3A vandu vavii vakeyeenda kyaaro kyimwi varee valavika mbele mirwe ando amwi? 4A miiso idinaa ilalollya kindo? A miiso irung'unaa ruu ilakeerutwa kindo? 5A ndeye ishidimaa itiryo ando kulaiyo nreiyo? A nsoori uterukaa to mweni kulore wampaanwa nkindo? 6A iranda lya fira lyikapwaa vandu vare valeereve? A vandu vasheywaa nngapo kulore Nndumi Iruva annyiruma? 7Nndumi Iruva wa matorito nnyatanaa kindo nare nalakyoora mmbele vasero vakwe wo vakisuku-fo. 8Miiso ikadina mmbi araa nalairyaa? Na kwakooya Nndumi Iruva wa matorito arera, mmbi araa nalaamba ekyo arera?

Mmbony ta Samaria

9Endevia yewo vakee mmba ta ki-mangyi ta Misri na Ashdodi, “Kusanyiryeu efo fidoorony fya Samaria, mulole uravi na urumato lukeetanyika-fo.” 10Nndumi Iruva aamba indi, “Vandu yeva mmbo vaishura mmba tawo usimba lulesokwa vandu vafote. Mmbeeshi nta iva vasaari-fo. 11Naasany vakiduva mmbo vasheshingillyaa uruka lwawo, vavamamite neerumata mammba yoo awo.” 12Nndumi Iruva kawuya kaamba, “Shaasa mwiisa findo asoka miiso marende avii ao kuri keni ka yoonri, ni indo kishevaa vandu vaangu deny va Samaria vashekiaa, yewo ulaalu vaimuyi neekushengala mmbeny shisha. 13Aranyiny-te ulaalu, mwiikimbe vana va Yakobo, shaasa Nndumi Iruva muni matorito muni finya shoose aamba, 14‘Nkonu yeto nshekabaa Israeli kimaruka kya ngyulyamari tawo, mmbo nshemamitaa na fitara fyerasya fya Beteli. Taari toose ta fitara tishewunduwaa nakyo kirengukye si. 15Mmbo nshewundwaa mmba tawo toose, tekaa kyeeri kya mbeo neeto ta kyeeri kya nrike. Nato mmba yetu shaakare tishewaa. Na mmba niini tishemandaa. ‘Ni Nndumi Iruva aamba indo.’”

Currently Selected:

AMOSI 3: MAS2

Highlight

Compare

Copy