AMOSI 2
2
Moab
1Nndumi Iruva kaamba, “Kya Moabu iwuiya ullyamari kyeengyi nkuti shivakabe. Mmbo valemina mafwa a mangyi ya Edomu elyi valeakora. 2Mmbo nsherikaa muro urukeny lwa Moabu, shikore turuve ta Kerioti. Vandu va Moabu mmbo vashewawaa nkyorongye kya fira elyi maranda ashekapwaa na vasikari woongore. 3Nndumi Iruva aamba, ‘Mmbo nshewaa mangyi ya Moabu na vasongoru va uruka.’”
Yuda
4Nndumi Iruva mmbo aamba, “Kya Yuda iwuiya ulyamari keengyi nkuti shivakabe Mmbo valemina ufundo lwakwa nta valaringe mavavaso akwa. Vakaevetwa maruva a wongo alya meni vakuu vawo valeendya. Lwakwa nta valaringe mavavaso akwa. Vakaevetwa mmaruva a wongo alya meni vakuu vawo valeendya. 5Naasa nsherikaany muro efo urukeny lwa Yuda shimamite turuve ya Yerusalemu.”
Uvingo lwa Nndumi Iruva kwa Israeli
6Nndumi Iruva kaamba, “Kya Israeli iwuiya ulyamari keengyi nkuti shivakabe. Mmbo vakeekumba vandu vasaari veende ushingeny kimaruma kya sye, nawo ni vandu vakiva valatiri nta kindo. 7Mmbo vakakasha vandu vakiva valatiri ngarami, vakavavivya efo mbai. Mmbo kukoyaa nndu na mwana valalaa na nndu nka umwi ntuusi, vakatefusa irina lyakwa. 8Wo ando kwa miindye mmbo kukoyaa-u vandu valaaya soori tilesokwa vakiva kimaruma kya sye. Neefo mmba ya Iruva vakaniiya-fo mfinyo wasokwa valya vatiri sye.
9“Na kimaruma kyany mmbo shilemamita Vaamori, shamukapannya yeni vandu vakwa. Nawo mmbo veetiri finya vakaveva vaasha sha miri ya nsitony. 10Mmbo shilemuuta Misri, shamutetera kasa koomu myaaka makumi aana, shamuniinga uruka lwa Vaamori luve lwany. 11Shasauwa vana vany vave vakisuku, na vandu vakoo vave va kyaasa. Nshiindo-se, yeni vandu va Vaisraeli?” Ni yeny Nndumi, shavesa indo. 12Lyo yeni mmbo muleniinga vandu yewo va kyaasa wari, mukeema na vakisuku valarere.
13“Ulaalu mmbo shimuvavaryaa efo si, murovyo muve sha ikari lyirovyo nnganu. 14Naakwa ni yewo veeshi irisha mmbasheturunyaa-fo. Na vandu vatiri finya mmbo vasheelelekaa, nta itorito va fira mmbasheidimaa ikuuta-fo. 15Veasa na mfe mmbo vashelemwaa, na veerisha vare valateshwa nta urende. Nta vesaama frasi mmbashekyaa-fo. 16Naakwa vava itorito vatakusu inda nkonu yeto mmbo vashetulaa fisha fyawo yoo si varishe mbereto.” Ni Nndumi Iruva aamba indo.
Currently Selected:
AMOSI 2: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
