2 VATESALONIKE 1
1
Fiidikiro
1Yeny Paulo na Silvanu na Timoteo, mmbo lwamureiya yeni va siri ya Tesalonike, siri ya Iruva Nde weeru na Nndumi Yesu Kristo. 2Isarya lyimukaye ando amwi na urilalyi luukye kwa Iruva Nde na kwa Nndumi Yesu Kristo.
Uvingo lwa kyeeri kya isha lya Kristo
3Vanavama, mmbo kilukooye lwaani Iruva kyeeri kyoose kimaruma kyany, shaasa kilusumannyi, mashika elyi iirikyo lyeru lyikee inga'na nnu, na ikunda lya wo umwi waany lyikang'ana nnu. 4Neese luveni mmbo lutirwa ni nsia nniini kimaruma kyany yeni va siri ta Iruva kyeendwa ni usisiryo lwany, na kya usisiryo lwany kya ngatara na waataro lukee kwany. 5Elo llo ukureekyi loora uvingo luukye usumanuny lwa Iruva, naambo kyoore shaasa musumanyi yaanga umanginy lwa Iruva yelo yeni mukeelyiswa ukyiva kimaruma kya vayo. 6Mashika ni kindo kisumani mbee ya Iruva valya vakeemulyisa ukyiva nawo valyiswa ukyiva. 7Neeni mukeelyiswa ukyiva mutawa nsia ando amwi neese kyeeri ekyo Nndumi Yesu asheorwaa paa akee na finya eriyani na vasu va efo iruveeu. 8Ekee na kipalapala kya muro, etaiyaa yewo valaishi Iruva neewo valairikye Nrumi ya Nsia ya Nndumi weeru Yesu; 9vasheorotwaa ni urumato lwa llunganu, irauwa deny vauke kisanguny kya Nndumi na itumbe lya wiidimi lwakwe. 10Kyeeri we asheshaa narumishwa ni veele vakwe, na yaambyo ni valya vamwiirikye nkonu yeto, (mashika ukureekyi lweru mmbo luleirikyo efo kwany). 11Nkyo kimaruma lukamuterevya mikonu myoose, naambo Iruva weeru nairikye uvaango lwany, naveinutya na wo kindo kimutinnyi na wo ishora lyuukye kikusiryony na finya yakwe. 12Irina lya Nndumi weeru Yesu lying'aniswa nnang'ani yaany, neeni nnang'ani ya vayo, kyeendwa ni isarya lya Iruva weeru na lya Nndumi Yesu Kristo.
Currently Selected:
2 VATESALONIKE 1: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.