1 VATESALONIKE 5
5
Laleny shoovi Nndumi akeesha
1Lyo vanavama, Kya mbony ta mikonu na fyeeri nshitiri kimaruma kya imureiyafo. 2Kimmba yeni muveni mmbo mwiishi ninsha sheelyi nkonu yeto wa Nndumi weewuya mmbo usheshaa sha inyinyi kyeeri kya kio. 3Kyeeri ekyo vandu vakusaraa mmbo kukee kusha kukatira urilalyi, llyo urumato lusheshaa tiny, shaasa usu lwasheya nka llemwa, nalyo mmbashekirwaa-fo. 4Kyaindi lyo yeni vanavama, mmukee ireeminy kutani nkonu yeto ushemusheyaa tiny-fo. 5Mashika yeni mmbo mukee vana va sa, mmbo va nsanyiny; ee, yese llukee va ireema nta va kio-fo. 6Kyasiany, lulalale sheewo vengyi-fo, lukae na mwiiyanu lusinde luvereyaa Nndumi. 7Mashika yewo velala mmbo valala kio, neewo veenangwa mmbo vanangwa kio. 8Kyaindi yese lukee va nsanyiny luve vandu va mwiina, luveraa kyikusiryo na ikunda five sha fisha ando amwi na ivikya ukiro nsia. 9Mashika Iruva nnyaleluvika yaa ulaniny luvereye unyafi lwakwe-fo, kyaindi naambo luwoni ukiro efo kwa Nndumi weeru Yesu Kristo; 10yeto alefwa kimaruma kyeru naambo lusinde nawe lukee na muu ulaalu kwakooya lwafwa. 11Naasany, kuviiryeny muu neekukaarisa wo nndu na ungyi shaasa mwiifo mutanaa.
Kyeefurumya na fiidikiro
12Na kingyi-se vanavama, lukunndye mumanyi valya vakekwaatara kimaruma kyany, valya valemusalallya na irina lya Nndumi vemwikimbaa; 13naambo muveendye nnu mukee na ikunda kimaruma kya ishora elyo lyawo. Muveva vandu va urilalyi yeni muveni na veni.
14Vanavama, mmbo lwamutereva mwikimbe yewo valakee vasaari, muvekaarisa yewo vakee vafwafwa, neevikya kilyilyika yewo vafiiye nrima, muvesisirya vandu woose. 15Kevekwiiseny naambo kulakae-fo nndu ataiya makasha na makasha, mmbo muvaa vandu veetana mesha kyeeri kyoose, muveni na veni na kwa vandu woose.
16Veny vefura wo nkonu; 17tereveny kulaifo iderya. 18Veny veana Iruva kya wo kindo, mashika efyo mfyo Iruva akundye kwany kimmba mukee va Kristo Yesu. 19Mulaimi Mumuyo mwaanya. 20Nta mulasheemina ukisuku; 21eseny findo fyoose, musauwe-u ekyo kyikee kyisha; 22muvekwiisa na uravi lwa wo ngata.
23Naasany Iruva yeto wa urilalyi namwiilyise nakamwi, naambo ngoo tany na mirima yaany na miili yaany mukooye iringwa nisha, mukae-fo mulatiri kiteve, kufike nkonu yeto Nndumi weeru Yesu Kristo asheshaa nato. 24We Nndumi yeto amuvaangye mmbo akee nsaari nawe mmbo asheinutyaa fyaasa fyakwe.
25Vanavama, keveluterevyeny, 26Idikireny vanavama na kimimindo kyeele. 27Mmbo shamuvavasya shikee na Nndumi, vakristo woose vasomywa barrwa yei. 28Isarya lya Nndumi weeru Yesu Kristo lyimukaye yeni moose.
Currently Selected:
1 VATESALONIKE 5: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
