2 SAMUELI 8

Matorito a Davidi Avinga

(1 Fye 18:1-17)

1Naasa numa yavayo Davidi kandekapana na Vafilisti, kavavinga, katira muri wao Gati na fyuungo fya vayo kasoka Vafilisti. 2Nalyo kandekapa Moabu kavavinga, kavaara si, wo vandu vararu kawaau vavii neekirau umwi nsi. Vamoabu vakava mashinga a Davidi, vakamwengye findo fya pya. 3Numa kandevinga mangyi ya Siria wa kulya Soba, na Hadadeza we mwana wa Rehobu mashika mmbwe yeto eshitiraa ushilyi lwa mureny wa Efrata. 4Davidi kaidima insoka vasikari va farasi kiku na mayana mfungare, na vasikari va marende fikumakumi avii. Davidi kafirisa farasi toose, kuuta iyanalyimwi tupu. 5Nawo vandu va Siria ya Dameski kyeeri valeruma vasikari vasheekya mangyi Hadadeza wa soba, Davidi kavawaa, nawo veefikye vasikari makumi avii na vavii. 6Davidi kavika turuve kulya Dameski ukee muri wa Siria, na vandu va vayo vakava mashinga a Davidi vakamweengye findo fya pya. Na wo ando Davidi aleenda Nndumi Iruva kanninga-fo uvingyi. 7Nawe Davidi kaipoo ngawo ta saabu yeto ta vandu va Hadadezeri kateende na Yerusalemu. 8Na tingi aletira kulya Tebhati na Berotai nayo mmiri ya Hedadezeri, Davidi kawonisa-fo minya ya arera shiingi nnu. 9Na llya mangyi ya Toa wa kulya Hamati aleeta sheelyi Davidi annyanyata vasikari va Hedadezeri woose, 10karuma mwana ulya wakwe Hadoramu nandemwidikira neembya neesha elyi alevinga Hadadezeri, mashika elyi na Hadadezeri enkabana na Tou. Kasha anriye fiiya fya minya na fya saabu na fya fesa. 11Nawe Davidi kandefirwaa kwa Nndumi Iruva 12ando amwi na filya fileuka Edomu na Moabu, na kulya Amoni na Vafilisti, na fya Vaameleki na filya fileutwa fireny ya Hadadezeri wa Rehobu we mangyi ya Soka. 13Davidi kaona nnduma nniini kyeeri alooka ikabana na Vaedomu kulya imungony lya Shumbi, kundo alewaa vandu fiku ikumi na nyanya 14Kulya Edomu kavikafo vasikari veeringa turuve ilya, na Veedomu woose vakava mashinga a Davidi. Nawe Nndumi Iruva kaniinga Davidi uvingi wo ando aleenda ikabana. 15Davidi kashillya Israeli koose, na vandu vakwe woose vakatannyo fya mesha na fya usumanu. 16We Yoabu mwana wa Seruya mmbo ekee nniini wa Vasikari, na Yosefati wa Ahiludi, kava mmbwe mwiireiya wo kindo kyatanyika na nkonu wa vayo, 17na Sadoki mwana wa Ahitubu, na Ahimeleki mwana wa Abiatari vakava vakohani, na shausha kava mwiireiya. 18Benaya mwana wa Yehoyada kava mwiisalallya vakereti na Vapeti. Nawo vana va Davidi vakava makohani.

Currently Selected:

2 SAMUELI 8: MAS2

Highlight

Compare

Copy