2 SAMUELI 7

Nrumi ya Natan Kwa Davidi

(1 Fye 17:1-15)

1Naasa Mangyi Davidi kakukaya ando afoo sau efo mmba yakwe ya kimangyi, Nndumi Iruva kansimba ufoo nalashaatarwaa ni vakiduva vakwe nta taari imwi. 2Naasa mangyi kavia Natan ulya nnabii, “Lolate ulaalu yeny mmbo shakaa mmba shisha ya mieresi, lyo isanduku lya Nndumi Iruva mmbo lyikee efo yemeny.” 3Natan kavia mangyi, “Lola kumuni efo nriminywafo shaasa kukundye itana, mashika ni Nndumi Iruva akuteteraa,” 4Nalyo kio ekyo kyeni irero lya Nndumi Iruva lyikasheya Natan lyikammbia, 5“Sora nsero wakwa Davidi, kumbie, ‘A yewe mmbo kushitannyaa inda mmba ishimaa ikaafo? 6Mashika yeny nshikaa mmba uka elyo na llya shileuta vana va Israeli kulya Misri, fika inu-fo, ando shikaa ni efo yeemeny na ikwaanuny yeele. 7A ndesa wo ando shileenda na vana va Israeli, shilemaamba kindo kyoose shavia nndu mmbe nnang'ani ya Valeti yewo va Israeli, shambavasya kya Israeli shaamba, Nkyikyi elyi kulare nsero yeto wakwa Davidi anshitanya mmba ya mieresi?’

8“Nndumi Iruva muni matorito aamba indi, ‘Ni efo mfiriny wa moonri shilekuuta, kwiishisaa moonri, kushesalallya vandu vakwa, mmbo Israeli. 9Neeny mmbo shilekaa neewe wo ando kuleira, na vakiduva vafo shavanyanyata kwiilollye, neeny mmbo nshekung'anisaa sha vamangyi va kunu ulaniny, 10Na vandu vakwa va Israeli shavaniinga ando eekaa, shavavika-fo, ando awo veni, valekiukaau, nta vakiduva vawo valavasaveesaa sheelyo mbee. 11Shaasa shilevavasya Valeti vasalallye vandu vakwa va Israeli, niindo neeny nshekuningaa ufoo vakiduva vafo valollye.” Na lyingyi Nndumi Iruva kaamba, “Ni Nndumi Iruva ashekutannyaa mmba yewe 12Neelyi kushookaa yaa ulaniny kundelala na vandoo, mmbo nsheipoo mwana wafo muni, na umangyi lwakwe shilung'anise, 13Yeto mmbwe ashetanaa mmba yakwa, na kitima kyakwe kya umangyi nshikivika finya fika llung'anu. 14Shive ndeye nawe nave mwana wakwa, kashilyamarya shinkape shaasa vana vakapwaa. 15Nta nshimwimaa isarya lyakwa shaasa shileima Sauli yeto shilekuvika ando akwe-fo. 16Neewe mmbo kushelollyaa shaasa nshekaarisaa umangyi lwafo na ufyari lwafo. Na umangyi lwafo lushekumbuwa llung'anu.’” 17Niindo Natan alerera na Davidi neemoora efyo fyoose.

Kiterewo kya Davidi Kyeeningya Kiraso

(1 Fye 17:16-27)

18Naasa mangyi Davidi kaanga na ando kweele narere na Nndumi Iruva kaamba, “A yeny nkyoki Nndumi Iruva, na vandu vakwa nawo Nndumi Iruva, kutani kwasenda mmba yakwa, yeny nsero wafo, ikeeu myaaka miingyi, kwavia nndu wa vandu woi Nndumi Iruva. 19Indi yeki kyekee kyindo kyinnywa misony afo, woi Nndumi Iruva, Iruva wakwa; mmbo kwaamba kya mmba ya ishinga lyafo kya kyeeri kyaasa kyikeesha na kwanshoora ngyeeri tishaa woi Nndumi Iruva, Iruva wakwa. 20A yeny Davidi shikuvie-se kyi, neewe kwammaa yiirikya nsero wafo, woi Nndumi Iruva? 21Kimaruma kya irero lyafo nshaasa kulekunda yewe kumuni, kwatana fya wende indo koora nsero wafo namanyi. 22Naasany, muni usuri ni yewe woi Nndumi Iruva, mashika nkwiifo akuvakye yewe-fo, nta Iruva ungyi nnyeefo kuuta yewe-fo, shaasa luleita na maarwi eru luveni. 23A ni vandu va isanga lyingalyi vvakye vandu vafo va Israeli, yewo Iruva alevawouwa muni, irina lyakwe lyimanyike, navetana na mashora maniini, aeresye urukeny, na vandu vafo kulevawouwa kulya Misri vakalollya, sheelyi nshi indo masanga engyi akai-fo. 24Neewe mmbo kulevangisa vandu vafo va Israeli vave vafo llung'anu neewe kuve Iruva waawo, neewe Nndumi Iruva, kulewa Iruva waawo.

25“Naasany irero llya kuleamba kya nsero wafo na mmba yakwe sheelyi kushembangisyaau llung'anu woi mbee kwiinutyeny shaasa kuleamba. 26Na irina lyafo lyiitikiswa llung'anu, indi, ‘Nndumi Iruva muni matorito Iruva wa Israeli, nayo mmba ya nsero wafo Davidi ishevangiswa kimaruma kyafo.’

27“Mashika yewe Nndumi Iruva wa matorito kukee Iruva wa Israeli mmbo kuleshirambuya kwashivia, ‘Ni yeny shikutannyaa mmba.’ Nkyo kimaruma yeny nsero wafo shasenyo ikutereva indi. 28Na yewe Nndumi Iruva mmbo kukee Iruva na irero lyafo lyikava dede, kwavikya nsero wafo kyaasa ekyi kisha. 29Na ulaalu nkyeirikyany ivikya mmba ya nsero wafo mbora, ikeeny fyeeri fyoose, mashika niindo kuleamba woi Iruva Nndumi, Naasany na mmba ya nsero wafo ivikyo mbora llung'anu.”

Currently Selected:

2 SAMUELI 7: MAS2

Highlight

Compare

Copy