2 SAMUELI 23

Marero a Davidi emarisya

1Naasany yaa nng'u marero a Davidi eefurumya. Davidi mwana wa Yese aamba indi, Yeu aleipoiywa uwe mmbwe akeerera, Yeu mmwaambe mafura wa Iruva wa Yakobo. Mwiisongosya fiimbo fya Israeli fisennyi

2Mmumuyo wa Nndumi Iruva uleshikaya,

Na irero lyakwe lyikakaa kaniny kyakwa.

3Iruva wa Israeli mmbo alerera,

We mbanga ya Israeli kashivia,

Yeto mwishillya vandu kya usumanu,

Kashillya na usumanu lwa Iruva.

4Mmbo ashevakaa sa ya nkyeere kyeeri kya ngama

Ngama ilatiri mafishi mmbo weende mooro urukeny

Elyi weende mwi ukasorya mmbwa.

5A Nndumi Iruva nshi indo alollye mmba yakwa?

Elyi alevika neeny kyaasa kya llung'anu

Uramba lwavayo llwa meeri moose.

Llo ukiro lwakwa, llo shilulanngye.

6Lyo nnyasherosaa vandu va tangalu-fo,

Wo mmbo vashevaa sha miinga ya kasa.

Ilavaa itira na maako.

7Kwakooya nndu atira na woko

Nkuti naipaane na minya

Nawo nng'u kweni vasherumatywa mmuro.

Vasikari va Davidi vatiri nnduma

Vasikari Vatakusu va Davidi

(1 Fye 11:10-41)

8Na yaa nng'u marina a vandu vakaari va Davidi valya va fira. Ni Yashobeamu, Mhakmoni, nsongoru wa vashilyi, yeu mmbo eedima iwaa vandu mayana nyanya na ifumu we muni.

9Ungyi ni Eleaseri mwana wa Dodai, mwahohi, yeu ni umwi wa valya vakaari vararu va Davidi. Kyeeri valearara Vafilisti naambo vakabe nawo vandu va Israeli wo mmbekiiyo-fo. 10Eleasari kakupoo, kakaba Vafilisti kutani maako aaraa, katira usu nawe Nndumi iruva kanniinga uvingyi uniini nnu, na Israeli vakashesha numa yakwe ishetira findo.

11Numa yakwe kweifo Shama mwana wa Agee Mharari. Vafilisti mmbo venkusang'irya kulya Lehi, ireminy lya sosoko, Israeli vakarisha Vafilisti, 12lyo Shama kasalala yoo nnang'ani ya irema llya, kakabannya-u na Vafilisti kavawaa, Nndumi Iruva kanniinga uvingyi uniini.

13Efo yeekeniny lya vandu makumi araru, vararu veesongoye vakasoka vakandevia Davidi, nakyo nkyeeri kya fimu fika Adulamu, na Vafilisti mmbo veemannyi ulale kulya imungony lya Varefai. 14Na Davidi nawe nkulya turuveny eekai na vasikari va Vafilisti vakakaa Betlehemu. 15Nkonu umwi Davidi kaamba, “A shoota kwi nndu ashininga mura wa kirori kya Betlehemu, kilya kifiitani na ngiri.” 16Naasa vandu yewo vakaari vararu vakareka muu vakanderorova alya nnang'ani kavii ya Vafilisti valya, vakanderaa mura alya kiroriny kya Betlehemu kifiitani na ngiri, vakarwaya Davidi mura yeto, lyo nalakunde yuuna, kandeurwaa ando kwa yiinndya Nndumi Iruva. 17Kaamba, “Oode Nndumi Iruva nshinaa mura yen-fo, mashika mura nkyimwi na samu ya vandu yewo vakureeka-u indo kya muu wawo.” Vandu yewo vararu vakaari niindo valetana.

18Naasa Abishai mwanamaye wa Yoabu, mwana wa Seruya mmbwe yeto eesongoye yewo vengyi. Yeu mmbo aleepoo ifumu lyakwe kandekabana na mayana araru, kavawoo, katirany nnduma ngota yewo vengyi vavii. 19A yeto nshi aletira irina ngota yewo vengyi? Kavikwany nave nsongoru waawo. 20Na Benaya nawe, we mwana wa Yehoyada, nndu nkaari wa kulya Kabseeli eke mwiitana findo finiini, nawe mmbo eedima iwaa miiso shinyaasi ivii ta Moabu, kookafo kandewaa miiso yeekee irininy kyeeri kya laura shiroo. 21Kaidima iwaa Mmisri, nndu mwaasha eetiri ifumu, kantira kankaba na iriinga, kansoka ifumu elyo lyakwe kammbwaa nalyo. 22Benaya niindo aletana, katira nnduma nawe nnang'ani ya valya vararu. 23Nnang'ani ya vandu valya makumi araru kawona nnduma lyo nshi sha valya vararu-fo. 24Nawe Asaheli mwanamaye wa Yoabu, ekee umwi wa valya makumi araru, na Eehanani we mwana wa Dodo, wa Betlehemu. 25Na Shama nawe, Mharodi na Elka Mharodi. 26Na Helesi, Mpeloni, na Ira, mwana wa Ikeshi, Mtekoi. 27Na Abieseri va kullya Anatoti, na Sibekai, Mhushati. 28Na Salmon, mwahohi, na Maharai Mnetofati, 29na Heledi mwana wa Baana, Muetofati, na Itai mwana wa Ribai wa vana va Benyamen va Gibea, 30na Benaya, Mpiratoni, na Hurai wa kulya ngyusokeny ta Gaashi. 31Na Abieli, Mwarbati, na Asaweti, Mbarhumi, 32na Eliaba, Mshalboni, na Yasheni na Yonatan, 33mwana wa Shama, Mharari, na Ahiamu mwana wa Shalali, Mharari, 34na Elifeleti mwana wa Ahasibai na Heferi, Mwaakati, na Eliamu mwana wa Ahitofeli, Mgiloni. 35Na Hesro, Mkarmeli, na Paarai, Mwarbi, 36na Igali mwana wa Natan, wa Soba, na Bani, Ngadi. 37Na Seleki, Mwamoni, na Naharai, Mbeeroti, mmbo veeipoo fisha fya Yoabu mwana wa Seruya, 38na Ira, Mwitri na Garebu, Mwitri. 39Na Uria Mhiti woose ando amwi ni vandu makumi araru na mfungare.

Currently Selected:

2 SAMUELI 23: MAS2

Highlight

Compare

Copy