2 PETRO 3
3
Nkonu wa Nndumi
1Vakunde vakwa, barrwa yei nnyo ya kavii shilemureiya yeni. Kunu barrueny eti mmbo shikunndye shaante mirima yaany shiimukumburaa, 2mukooye ikummbwa marero alya alererwa ni vakisuku valya veele va mbee, na ivavaso lyilya lya Nndumi na Mwikira lyileendwa ni varumi vakwe. 3Mwimanyaa mbele irero lya elyi kya yaamba elyi mikonu ya ifurumya mmbo vasheshaa vandu va kinyala na vetatala, vesoraa lango tawo veni. 4Veshambaa, “A-kyaasa kilya kya isha lyakwe kyikee kwi? Mashika uka elyo vande veru valelala, findo fyoose mmbo fikwiiyo indo-da, uka elyo ulana luumbwa.” 5Yeva mmbo vasingira miso awo alalollye sheelyi kweiifo ngina uka elyo mbee, na ulana-da, lyo mmbo fileumbwa fyuuka efo mureny ni irero lya Iruva. 6Kyaindi ulana lulya lwa kyeeri kilya mmbo lulerumatwa ni mura lukasarummya. 7Indi ngina na ulana lwa ulaalu mmbo fikee fivike-u fivere muro, kyeendwa ni irero elyo, fikaringywa-u fivere muro nkonu wa mwaandu, na vandu yewo valashiindyaa Iruva nawo vashesarumya-da. 8Lyo vakunde vakwa, loleny mulasheerekyo irero elyi, sheelyi kwa Nndumi nkonu umwi mmbo ummbiiye sha myaaka kyiku, na myaaka kyiku ikammbiiya sha nkonu umwi. 9Nndumi nnyakyeywaa iinutya fyaasa fyakwe shaasa vandu vengyi vakee ikusara mmbo ankyeeywa-fo, lyo mmbo asanda-fo imusisirya mbele mashika elyi nalakunndye nta nndu umwi nareke, naambo woose vakooye yaalashika mirima. 10Mashika lyo nkonu yeto wa Nndumi mmbo usheshaa tiny sha inyinyi, llyo nkonu yeto ngina ishekweete-u na ntiri nniini, na fyuumbe fyoose fya mbee fisheyaa na yeeka deny, na ulana loose na mashora a vayo moose mmbo ashesarummyaa. 11Naasany kimmba findo efi fisheekaa indo, mmbo kimukooye yeni muve vandu va ngaa-kyi? Weendo lwany luve weele na utele. 12Mwivereyaa kutani nkonu yeto wa Iruva washa, na iwiitika; nato nkonu eto llyo ngina isheekaa na fyuumbe fyoose fya mbee fishesarumyaa na yeeka. 13Lyo shaasa kyaasa kyakwe kyikai, mmbo luvikye nsia ilollya ngina shiiya na ulana wiiya, ando usumanu lushekaa.
14Kimmba ni indo, vakunde vakwa, kimmba muvikye nsia ilollya findo efyo, kutakureny naambo musalale iirikyony kyeyoora sheelyi mmutiri kiteve-fo nta ifiiya sony mbee yakwe-fo. 15Loleny sheelyi usisiryo lwa Nndumi weeru mmbo lwaluukya ukiro lweru, shaasa naakwa ni mwanamaye weeru we Paulo alevemureiya ekee na waarya alesimbwa. 16Shaasa kivekee efo barrueny takwe toose, kauta-fo mbony ta findo efyo, efo barrueny eto mmbo kwiifo mbony tikee shuumu imanya. Na vandu valandetumaa nta valasommyi mmbo vakee yeveta mbony eto shaasa vevetaa na mareiyo engyi, kyikava kyevarumata wo veni. 17Kyasiany vakunde vakwa, kimmba mwansongwa imanya efyo, kwiiseny muveni, naambo mulashekurikwa ni urekwa lwawo, mukooye ireta ukaari lwany. 18Lyo, endeny mwitumaa efo isaryeny lya Iruva, mwimanyaa Nndumi weeru we Mwiikira Yesu Kristo. Nnduma ni wakwe ulaalu na llung'anu.
Currently Selected:
2 PETRO 3: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
